Yoane 15 - Ecorit Aŋejuk 2003

Yesu, Ayyani Fino Ahode Hode

¹ “Nani ayyani fino ahode hode, buo Monyoŋ ara a hedulani honyi.

² Igiguanya inyi addi atanata huttonoŋ 'daŋ hunno obeŋi 'to oŋiji; buo ihum isisou atanata 'daŋ hunno oŋijani 'to eŋija jio, oŋida tibuo isi ihumi iŋijana.

³ Italibori nyia itai te ekenita hunyia eramak ni itai.

⁴ Oduloro inoso ikoŋ, adulo adi buo fe ni enoso ikatai. Ittallik atanai iŋijana inyi hama, alla abeŋ inyi inoso iyyani fino. Ihuo nyia buo fe, ittallihoto adi itai iŋijana eŋija elle ibiaŋata itai inosoti jihoŋ.

⁵ “Nani ayyani fino, buo itai atanata. Lia, ollo odulo 'to enoso jihoŋ buo fe ni adulo enoso jihonyi, oŋijak adi inyi eŋija arriai. Ittallihoto itai ihan obo ariŋ, alla abeŋ ni.

⁶ Lia, ollo obeŋ 'to odulo enoso jihoŋ, iruoŋori adi inyi addi ihuo atanai, ette iyohojoro. Aharanyuni adi atanata hunia, ette iruoŋonia ihima, ette eema ituk isi.

⁷ Elle irasati itai jihoŋ buo fe igottiette ekenita hoŋ, tania omojoti erre 'daŋ hunne iwahata itai, buo isiarani adi jihatai.

⁸ Itahutana akuatan ono Monyoŋ ta aŋijana hatai eŋija arriai. Tania, irata adi itai ahejifak hoŋ.

⁹ Obuor ataji hoŋ itai ihuo onno obuarari ataji Monye nani. Oduloro enoso ikoŋ oŋida abuaran taji hoŋ odulo ikatai.

¹⁰ Elle iniŋiete itai efahita hoŋ, odulo adi ataji hoŋ abuaran itai, ihuo anna aniŋiere ni efahita Monyoŋ buo fe ataji honyi odulo abuaran nani.

¹¹ “Eramak ni itai erre huna jio, oŋida bati amuno hoŋ owon jihatai, buo fe oŋida bati namuno hatai ottuba.

¹² Esiarak ni itai Efahi ana: Ijiara abuaran taji hatawana ihiji hatai ihuo onno obuarari ataji hoŋ itai.

¹³ Alla aye obo atulo te eram orriahat honyi, abuaran taji ania anna agalik 'to 'daŋ.

¹⁴ Irata itai amottiarak hoŋ elle ihaniete itai erre hunne eramak ni itai.

¹⁵ Abeŋ ni enyiak iloŋo itai egiamak hoŋ, nyio, obeŋi egiamak omijani erre hunne ihanio elettok hosi. Ati eloŋo ni itai orriahat hoŋ, nyio, eramak ni itai erre 'daŋ hunyia etaniŋu ni jio Monyoŋ.

¹⁶ Ibiaŋata nyia itai inyimuna nani. Nani nyia anyimu itai buo fe egelu itai jio, oŋida itai ifuatta iŋijana eŋija arriai; eŋija hunno osioi 'to 'tulaŋ. Tania, isiarak adi Monyoŋ jihatai erre 'daŋ hunne imojoti itai jihonyi ta afure hoŋ.

¹⁷ Ehum ni iramana itai ariŋ ana: ijiara abuaran taji hatawana ihiji hatai.

Aliwa atta Fau

¹⁸ “Alla aliwarik aati itai, omijana jio oliwarik nyia isi ani tetteri.

¹⁹ Elle irata duo itai a hulo afau ana, obuori duo atajia waati afau ana itai. Ati anyimuni ni itai jio aati afau ana. Tania, ibiaŋata itai inyiahata irahan a hulosi, inyi onno oliwarik isi itai.

²⁰ Ogiluna erre hunyia eramak ni itai jio, ‘Obeŋi egiamak agalihini elettok hosi.’ Elle ittigemie isi nani, ittigemie adi buo fe isi itai. Alla agottierek isi ettiyenita hoŋ, ogottierek adi buo fe isi hunatai.

²¹ Ati ta arahan hatai a huloŋ, ihanie adi isi erre hunia 'daŋ jihatai; nyio, otimoi isi lia linyia ifahu 'to ani.

²² Hara nyia abeŋ ni attu ette ikiana jihosi, obeŋi duo isi owoni iko epali ono eyyata. Ati ihuania, obeŋ obo ekoi jihosi iliari eyyata hosi.

²³ Lia, ollo oliwari 'to nani, oliwari buo fe inyi Monyoŋ.

²⁴ Hara nyia abeŋ ni ehan ihiji hosi egemita hunno obeŋ obo atulo oremik ihan, obeŋi duo isi owoni iko epali ono eyyata. Ati ihuania, igonyuni isi erre hunne ehan ni, ette iliwari nani 'daŋ iko Monyoŋ.

²⁵ Ati iduoŋi erre hunia ihuo nyia, itasiruniere ekenita hunyia igioroni ifahita hosi jio, ‘Oliwarik isi ani obo ijiai.’

²⁶ “Alo adi ni ifahuna jihatai aluahani ollo ottu 'to jio Monye. Inyi Oloholio elle italeyehi 'to elahode ono Hollum. Ottu adi inyi ikiana eram hoŋ.

²⁷ Ikianati adi buo fe itai eram hoŋ, nyio, iwanata nyia itai ikoŋ many tetteri.