Yoane 14 - Ecorit Aŋejuk 2003

Yesu, Inyi Nekoi onno Olo 'to jio Monye

¹ Iramak nyia Yesu isi jio, “Hèlafuhoti buo fe hèhawwati. Iruhoto jio Hollum buo fe iruhoto jihoŋ.

² Oluaji asik ihaŋ Monyoŋ. Alo ni ihuhumana amaji jihatai. Alla abeŋ duo ara ihuo nyia, abeŋ duo ni eramak itai jio alo adi ni ihuhumana amaji jihatai.

³ Alla alo ni diya, ette ihuhumana amaji jihatai, acohuno adi ni iyari itai, oŋida itai ifuatta itoŋo ikoŋ jio amaji anna amanyari ni.

⁴ Imijana itai ekoi onno olo 'to jio amaji anna alari ni.”

⁵ Attati Tomaso jiaran jihonyi jio, “Lamonye, etimo hohoi amaji enne ilari iyye. Aŋai ati emijak hohoi ekoi onno olo 'to diya?”

⁶ Itarraŋ nyia Yesu inyi ojio, “Nani ekoi, elahode, iko nesu. Ittallik obo leten jio Monye, arari fe tottoloŋ.

⁷ Elle imijana itai nani, imijana buo fe itai Monyoŋ. Tania, imijana itai buo fe igonyuna inyi.”

⁸ Buo Filipo ette jiaran jihonyi, “Lamonye, itahutak jihohoi Monye; ariŋ alia ijiai elle ewak hohoi.”

⁹ Itarraŋ nyia Yesu jiojio, “Filipo, abolo etoŋo hoŋ ikatai 'daŋ. Aŋai ati itimo iyye nani? Lia, elle igonyu 'to nani, igonyu buo fe inyi Monye. Aŋai ati ijio iyye jihoŋ jiojio, ‘Itahutak jihohoi Monye?’

¹⁰ Filipo, ibeŋ iyye iruk jio awon ni jio Monye buo fe Monye owon jihoŋ? Obeŋi ekenita hoduo eramak ni itai ofuonni to hou hoŋ. Ati Monye ollo owon 'to jihoŋ, inyi ihanio egiama honyi.

¹¹ Iruhoto ajiaran hoŋ jio, awon ni jio Monye buo fe Monye owon jihoŋ. Buo elle ibiaŋata itai iruhoto, iruhoto ati erre hunne ehanio ni.

¹² Hode hode, eramak ni itai jio, ihanie adi hia, hulle iruhi 'to jihoŋ, erre hunne ehanio ni huna. Hode luŋa, ihanie adi isi erre hunna agalihini 'to 'daŋ, nyio, alo ni jio Monye.

¹³ Ehanio adi ni erre 'daŋ hunne ifiyete itai ta nafure hoŋ, oŋida italeyehini akuatan ono Monye to Lonyi.

¹⁴ Elle ifiyete itai obo ariŋ ta afure hoŋ, ehan adi ni inyi.

Acoronia Loholio Olibo

¹⁵ “Alla abuori atajia hatai nani, iniŋiete adi itai efahita hoŋ.

¹⁶ Efi adi ni Monyoŋ. Isiarak adi inyi jihatai aluahani ollobo, ollo ottu 'to itoŋo ikatai 'tulaŋ.

¹⁷ Inyi Oloholio enne italeyehi 'to elahode ono Hollum. Ittallihi aati ifuotuna inyi, nyio, obeŋi isi igonyuni inyi kuyya omijani inyi. Ati imijana itai inyi, nyio, amanya inyi ikatai buo fe arasa adi ikatai.

¹⁸ “Alla alo ni, abeŋ adi ni ediaharu itai hama; acohuno adi ni jihatai.

¹⁹ Kai dinia, obeŋi adi aati afau ana inyiahi igonyuna ani. Ati igonyuna adi itai nani. Nyio, nesu ni, isuoto adi buo fe itai.

²⁰ Jio oloŋ nyia, imijana adi itai jio awon ni jio Monyoŋ, buo fe itai iwanata jihoŋ ihuo anna awanari ni jihatai.

²¹ “Lia, elle ifuotu 'to efahita hoŋ buo fe oniŋio isi, obuor ataji honyi ani. Buo fe lia, ollo obuor ataji honyi ani, obuor adi ataji Monyoŋ inyi. Obuor adi buo fe ataji hoŋ inyi, ette ni italeyehina ahuan hoŋ jihonyi.”

²² Attati Yuda (Obiaŋara Iskariot) jiaran, “Lamonye, aŋai adi italeyehi iyye ahuan hoi jihohoi buo obiaŋara jio aati 'daŋ?”

²³ Buo Yesu ette itarraŋ ojio, “Lia, ollo obuor ataji honyi ani, oniŋio adi inyi ettiyenita hoŋ. Obuor adi buo fe ataji Monyoŋ inyi; buo ni iko Monyoŋ, ette adi ifuanna jihonyi, ette imanya ikonyi.

²⁴ Lia, ollo obeŋ ataji honyi obuor ani, obeŋ inyi oniŋio ettiyenita hoŋ. Obeŋi buo fe ettiyenita hunne itayiruna itai arai ahunoŋ. Ati arai isi ahuno Monyoŋ linyia ifahu 'to ani.

²⁵ “Eramak ni jihatai erre huna buo ni hawon ikatai.

²⁶ Ati ta afure hoŋ, ifahu adi Monyoŋ jihatai aluahani, inyi Loholio Olibo. Ottu adi inyi ittiyenio itai erre 'daŋ buo fe itagilutta itai erre 'daŋ hunyia eramak ni itai.

²⁷ “Ediaharu ni jihatai elik tajia, elik taji hoŋ enne esio ni jihatai. Abeŋ ni esiarak inyi jihatai ihuo enne isiorierek aati hutta fau. Hèlafuhoti buo fe hèbaŋata.

²⁸ Itaniŋuna nyia itai ani ajio jihatai jio, ‘Alo ni, ati acohuno adi ni jihatai.’ Alla abuori atajia hatai ani, omunoti luŋa aleten hoŋ jio Monye, nyio, agalik inyi ani.

²⁹ Eramak ni jihatai erre hunia hobeŋi isi iduoŋi, oŋida itai iruhoto elle iduoŋi isi.

³⁰ Abeŋ ni aremik ikiana ikatai erre arriai, nyio, elettok olo afau ana alla attu alia. Ittallik inyi ilohittok jihoŋ;

³¹ ati ijiara ani ehanio ihuo iramak ani Monyoŋ, oŋida aati hutta fau 'daŋ omijani jio obuor ataji hoŋ Monye. “Ifuanna, efuo addi jio amaji ana.