Yoane 12 - Ecorit Aŋejuk 2003

Ijuhoni Ariaa jio Yesu to Betani

¹ Ninyia afitoroi oŋitek ille iyomori eyom ono Allaŋan, ette Yesu leten Betani, amaji ninyia amanyari Lasaro, atulo linyia itubuhu inyi toye.

² Diya, imahini nyia jihonyi aŋiria otto 'tari, buo Marta ette isiarana jihosi. Oŋiyo nyia Lasaro arabotie iko aati hinyia oŋiye 'to iko Yesu.

³ Attati Maria iduhuna ariaa, onno ogol te enyiaŋa, hiny likarajaja enne ittok, ette ijuhonia ihejek Yesu, ette ifufus eejek Yesu to oofir honyi. Oŋuo nyia atua haji 'daŋ fitaa ariaa.

⁴ Ati ojio nyia lobo olo lejifak Yesu, afure honyi Yuda Iskariot (linyia ottu 'to itinyiaŋara Yesu) jio,

⁵ “Nyio duo obeŋi itinyiaŋari ariaa ania ta arobiyaa esiha hunihoi, ette isiarana arobiyaa hua jio alociaŋak?”

⁶ Obeŋ nyia inyi ikiana ihuo nyia jio, igigilo inyi te eram lociaŋak; ati ara nyia inyi olohoho. Ara nyia inyi a hattoŋoni senuk robiyaa, buo ohoholutta omuk teya.

⁷ Ati itarraŋ nyia Yesu jiojio, “Idehina Maria dee, ijiara inyi ottunak ariaa ania ahono oloŋ onno onuhanierek adi nani.

⁸ Odulori adi alociaŋak awanan ikatai, ati abeŋ adi ni adulo awanan ikatai.”

Ewwahuna Ittohori Lasaro

⁹ Ninyia itayiruni aati arriai jio Yesu otto Betani, ette isi ifuatan diya. Obiaŋara igonyuniere Yesu hama, ati igonyuniere buo fe Lasaro linyia itubuhu inyi toye.

¹⁰ Tania, ottifiai nyia ehumak elettaha obo ekoi ittohori Lasaro buo fe.

¹¹ Nyio, te eram Lasaro, ihari nyia Yudei arriai eram hosi, buo ette iruk jio Yesu.

Ajiŋana Yesu Yerusalem

¹² Jio ebotie holoŋ, itaniŋu nyia eluluŋ waati ninyia ottu 'to iyomori eyom ono Allaŋan jio, olo Yesu ittuna Yerusalem;

¹³ ania, ette isi isaluna afore, ette ifuatan irraŋuna inyi, buo iwuwoŋitai jiojio, “Hétahabuyete Hollum! Hotomunoi lia, ollo ottu 'to ta afure ono Lamonye! Hotomunoi Hobu Isiraeli!”

¹⁴ Orumak nyia Yesu aŋarri sigiria, ette idahina ihoruoŋ honyi, ette itoŋo ihuo igioroni nyia ibuk Hollum jio,

¹⁵ “Hèbaŋata, itai aati Sayon! Hobu hatai ollo ottu olo; elle itoŋo ihoruoŋ ŋarri sigiria.”

¹⁶ Obeŋi nyia lejifak Yesu omijani erre hunia tetteri. Ati ninyia itubuhuni inyi ta akuatan, ette isi igiluna jio, ikiana nyiadi Abuk Hollum tenyi, buo fe ihani erre hunia jihonyi.

¹⁷ To ninyia iloŋiere Yesu Lasaro telume, ette itubuhuna inyi, owon nyia eluluŋ waati diya. Isi nyia iramani aati hullomuk erre hunia.

¹⁸ Ania, ofuarik aati arriai irraŋuniere inyi, nyio, itayiruni nyia isi jio inyi nyia ihan eduarit ania.

¹⁹ Attati Farisei ikiana isi hama jiojio; “Igonyuna itai, ijifatie aati 'daŋ inyi! Ettallik ihan obo ariŋ.”

Ottifiai nyia Omuk Aati Grik Yesu

²⁰ Owoni nyia buo fe omuk aati hulo Grik ihiji waati hunyia ofuoi 'to Yerusalem imojori to oŋitek huno neyom.

²¹ Ofuoi nyia isi jio Filipo (olo Besseyida otto Galilea), ette jiaran jihonyi, “Lettok, ewak hohoi ikiana jio Yesu.”

²² Attati Filipo leten, ette iramana Andrea, buo isi 'daŋ arrihai, ette ifuatan iramani Yesu.

²³ Itarraŋ nyia Yesu isi jiojio, “Ihuania, attuba asaa enne itahabuyerek Lonyi Tulo.

²⁴ Hode hode, eramak ni itai jio, arasa adi emmai irahan abotie alla abeŋi idulani iboro, ette ye. Ati alla aye inyi, ette atibuo inyi isuaru emma arriai.

²⁵ Lia, ollo omuno 'to nesu honyi, italitohi adi inyi, buo lia, elle iha 'to nesu honyi ifau dini, ogottiere adi inyi nesu ania many jio nesu 'tulaŋ.

²⁶ Ijiara luŋa lia, alla awak 'to igiama jihoŋ, ijifatio nani. Ijiara luŋa inyi owon jio amasik 'daŋ hunna awanari ni. Isiarak adi Monyoŋ olohuo jio lia, elle igiama 'to jihoŋ.

Ikiana Yesu te Eram ono Naye Honyi

²⁷ “Ihuania, omi ataji hoŋ bebe, ajio adi ni anyio? Ijiara ati ani ajio, ‘Monyoŋ hèlaha asaa ana ottu jihoŋ’? Obeŋ. Inyi eram ania ninyia attuniere ni.

²⁸ Monye, itahutak akuatan fure hoi!” Attati ekiana ittuna tedou onno ojio, “Etahutak ni akuatan honyi. Enyiak adi ni ihan ihuo nyia!”

²⁹ Itaniŋu nyia eluluŋ waati ekiana ania, ette omuk igigilo jio etiri hilai ania, buo hullomuk ojiori jio, “Ajilo elle ikiana 'to alia jihonyi!”

³⁰ Ati itarraŋ nyia Yesu isi jio, “Obeŋ ekiana ania ara toni, ara inyi tetai.

³¹ Ihuania, attuba asaa onno oŋocierek eram ono afau ana. Osulari adi elettok olo afau ana addi.

³² Alla akafani nani ahide, eyaŋuno adi ni aati 'daŋ ajihoŋ.” (

³³ Ikiana inyi ihuo nyia, itahutaniere jio, ottu adi naye honyi aŋai.)

³⁴ Attati eluluŋ ania itarraŋ inyi ojio, “Ojiori efahita hohoi jio, ara adi Olonyimoto olosiohol. Aŋai ti ijio iyye jio akafi adi Lonyi Tulo ahide? Ŋai buo Lonyi Tulo lia?”

³⁵ Itarraŋ Yesu ojio, “Arasa adi afaŋan ikatai obo kai. Oduloro idaha buo afaŋan howon jihatai, ŋadi edumele erumak itai. Nyio, otimo atulo alla adaha 'to idumele amaji anna alari inyi.

³⁶ Iruhoto jio afaŋan, howon inyi ikatai, oŋida itai irata aduri hulo afaŋan.” Ninyia atuhok Yesu ekiana ania, ette inyi leten jihosi addi, ette idima.

Abiaŋan ono Neruk jio Aati

³⁷ Obeŋi nyia isi iruhi jihonyi, duadi bu ihanio inyi eduariti arriai ihosiere hosi jio,

³⁸ oŋida bati itasiruni ekiana ono Isaya ekianani Hollum linyia ojio 'to jio: “Lamonye, ŋai nyia iruk eram hohoi? Itahutak nyia Lamonye agolon honyi jio ŋai?”

³⁹ Tania, ittallihi nyia isi iruk, nyio, ojio nyia buo fe Isaya jio,

⁴⁰ “Ojio Hollum jio, etaŋodo adi ni oŋite hosi, buo fe etagol ossi hosi, oŋida isi obeŋi omijie, buo fe ossi hosi obeŋi omijani. Obeŋi adi isi oyitunie jihoŋ, oŋida ani etaŋida isi.”

⁴¹ Ikiana nyia Isaya ihuo nyia, nyio, igonyu nyia inyi akuatan Yesu; ania ikianari inyi te eram Yesu.

⁴² Duadi bu iruhi elettaha Yudei arriai Yesu, obeŋi nyia isi ikianai eram honyi sool ihosiere waati. Nyio, abaŋi nyia isi Farisei buo fe jio, ŋadi ifuhari isi addi to haji emojit.

⁴³ Omunoi nyia isi etahabuyo waati isi, agalik etahabuyo Hollum isi.

Aŋocio Hiram te Nekenita Yesu

⁴⁴ Ikiana nyia Yesu jihosi woŋ woŋ jiojio, “Lia, elle iruk 'to jihoŋ, iruk buo fe inyi jio lia linyia ifahu 'to nani.

⁴⁵ Lia, elle igonyu 'to nani, igonyu buo fe inyi lia linyia ifahu 'to nani.

⁴⁶ Attu ni ifau irari afaŋan, oŋida lia, elle iruk 'to jihoŋ, obeŋ arasa idumele.

⁴⁷ Elle itaniŋu obo ekenita hoŋ buo omesio isi, abeŋ adi ni aŋot eram honyi; nyio, abeŋ nyia ni attu ifau iŋociere eram waati. Attu nyia ni italuahuniere isi.

⁴⁸ Lia, elle iha 'to nani buo fe obeŋ iruk eram hoŋ, owon adi aŋotoni hiram honyi. Iholoŋ esidi oŋoti adi ekenita hoŋ, hunyia ekiana ni, eram honyi.

⁴⁹ Abeŋ ni ekiana erre huna ta ahou hoŋ, ati Monye, linyia ifahu 'to nani ihum iramana jihoŋ erre hunne ekiana ni buo fe ettiyenio.

⁵⁰ Amijak buo fe ni jio, iyaŋunie efahita honyi nesu 'tulaŋ. Tania, ekiana ni erre 'daŋ hunne iramak Monyoŋ jihoŋ.”