Yoane 10 - Ecorit Aŋejuk 2003

Etarriamai ono Eyyahani

¹ Attati Yesu jiaran jio, “Hode hode, eramak ni itai jio, lia, ollo obeŋ 'to ojiŋa itua bore kioro totto kol, buo ojiŋa to obo ekoi hama, ara inyi olohoho buo fe a hahoroni.

² Buo lia, ollo ojiŋa 'to diya totto kol, inyi eyyahani.

³ Aŋahi errirriani kol jihonyi ekat, ette akioro itaniŋuna etuk honyi, buo inyi ette iloŋ akioro honyi ta afureta hosi ababo, ette iyyaharu isi.

⁴ Itajiŋu nyia inyi isi addi totua bore, ette leten to osiere hosi, buo isi ijifarai ehalu honyi, nyio, omijani isi etuk honyi.

⁵ Obeŋi adi isi ijifarai obo atulo ollo olufa, ati ofuhororoi adi isi addi jihonyi, nyio, otimoi isi etuk honyi.”

⁶ Iramak nyia Yesu jihosi etarriamai ana, ati obeŋi nyia isi omijani awoyo hiram honyi.

Yesu Eyyahani Oloyijio

⁷ Ania, ette Yesu inyiak jiaran jihosi jio, “Hode hode, eramak ni itai; ani akol kioro.

⁸ Hia 'daŋ, hunyia ofuonni 'to habeŋ ni attu, arai isi ahahalak, buo fe ahahorok. Ati obeŋi nyia akioro itayirie jihosi.

⁹ Ani akol. Italuahuni adi hia 'daŋ hullo ojiŋuni 'to tottoloŋ; ojiŋuni adi isi attua, buo fe ojiŋari allet, iŋiyere amiyaŋ.

¹⁰ Ottu olohoho ihoholiere, ittohiere, buo fe ittarrohojiere. Ati attu ni isiaraniere jihatai nesu; nesu enne ifut 'to bebe.

¹¹ “Ani eyyahani oloyijio, alla aremik 'to iye te eram hosi.

¹² Ati ofuhororo adi atulo ollo ojurunie ijuruno, elle igonyu inyi elewo ottu. Nyio, obiaŋara inyi eyyahani kuyya lamonye kioro. Idiaharu adi inyi akioro hunia buo elewo ette ihonya isi, ette itisarrahina isi.

¹³ Ofuhoro atulo ollo ojurunie ijuruno, nyio, ara inyi olojurata ijiai buo fe obeŋ igigilo te eram akioro hunia.

^14-15 Nani eyyahani oloyijio. Ihuo onno omijaniere Monyoŋ nani, buo fe ni amijak inyi; ihuo nyia buo fe amijak ni akioro hoŋ, buo fe isi omijani ani. Aremik buo fe ni luŋa iye tesi.

¹⁶ Owoni buo fe omuk akioro hoŋ hunno obeŋi owoni jio abore ana. Alo adi ni luŋa iyaŋuno isi dini. Itayirie adi isi ekiana hoŋ, ette irahan eluluŋ kioro abotie, iko eyyahani abotie.

¹⁷ “Obuor ataji Monyoŋ nani, nyio, aremik ni isiarana nesu hoŋ, inyiahari ifuotuniere inyi.

¹⁸ Obeŋ obo oremik iduhara nesu addi jihoŋ, ati nani ta ahuan hoŋ aramik isiarana inyi. Awon ni iko agolon isiaraniere inyi addi, buo fe inyiahuniere inyi. Ariŋ ania ninyia ojio Monyoŋ ijiara nani luŋa ehanio.”

¹⁹ Te ekenita hunia, inyiak egigilo waati Yudei ibuanya.

²⁰ Ojiori nyia arriai hosi jio, “Owon inyi iko aminiaŋati! Isita inyi! Nyio itayiriete itai jihonyi?”

²¹ Buo hullomuk ojiori jio, “Ittallik atulo miniaŋati ikiana erre hunna arai 'to ihuo hunia? Aŋai oremik aminiaŋati itaŋida oŋite ŋodok?”

Ehara Waati Yesu

²² Oŋitek huno ayafajin hacoro nyia hunia, isi oŋitek hunne iyomorik aati Neyom enne isiaranierek Aaji emojit enne ittokon otto Yerusalem jio Hollum.

²³ Ilatta nyia Yesu idafata ono Solomon, Ihaji emojit enne ittokon,

²⁴ ania, ette Yudei ittubanio jihonyi, ette jiaran jio, “Many baya adi ibeŋ iyye ipulok jihohoi eram hoi? Opulok jihohoi sar sar, elle ira iyye Olonyimoto.”

²⁵ Itarraŋ nyia Yesu isi ojio, “Eramak nyia ni itai, ati ibiaŋata nyia itai iruhoto. Itahutani adi erre hunne ehan ni ta agolon ono Monyoŋ jio, nani ŋai.

²⁶ Ati ibiaŋata itai iruhoto, nyio, ibiaŋata itai irata akioro hoŋ.

²⁷ Itayirie akioro hoŋ ekiana hoŋ. Amijak ni isi, buo fe isi ijifatie ani.

²⁸ Esiarak adi ni jihosi nesu 'tulaŋ; obeŋi adi isi oye jio 'tuŋ. Obeŋ adi tulo ohororo isi jihoŋ.

²⁹ Agalik Monyoŋ, elle isio 'to isi jihoŋ, aati 'daŋ. Ittallik obo atulo ihororo isi ta has honyi.

³⁰ Nani iko Monye, era hohoi ihuo atulo abotie.”

³¹ Attati aati inyiak ihuruna amoruoi iruoŋiere inyi.

³² Buo Yesu ette jiaran jihosi, “Ehan ni erre ayijok arriai jihatai hunyia isiarak Monyoŋ jihoŋ ihaniere. Anani jihosi enne iwahatti itai iruoŋiere nani?”

³³ Itarraŋi nyia isi jio, “Ebeŋ hohoi ewak eruoŋio iyye te ehanio hoi erre ayijok, ati te etarrohojo hoi afure Hollum. Iyye atulo asai, buo iyye iwak jiaran jio, iyye Hollum!”

³⁴ Itarraŋ nyia Yesu isi ojio, “Igioroni Ifahita hatai jio, ojio Hollum jio, ‘Irata itai ajiohin.’

³⁵ Emijak hohoi jio, arai erre hutto Buk Hollum ahode, buo fe Hollum iloŋo aati hunyia isiarani asayyo honyi, ajiohin.

³⁶ “Onyimu nyia Monye nani, ette ifahuna jio afau ana; aŋai ati ijiatta itai etarrohojo ni afure honyi, ta ajiaran hoŋ jio, ‘Nani Lonyi Hollum’?

³⁷ Hèruhoto ati eram hoŋ, alla abeŋ ni ehanio erre hunno ojio Monyoŋ oŋida nani ehanio.

³⁸ Buo elle ehanio ni erre hunia, duadi bu ibiaŋata itai iruhoto ani, iruhoto ati erre hunne ehanio ni, oŋida bati imijana 'daŋ jio owon Monye jihoŋ, buo fe ni awon jio Monye.”

³⁹ Awahi nyia isi inyiak inefuna inyi, buo inyi ette ipulucaro jihosi.

⁴⁰ Attati Yesu icaharu ifohor owore Yordano tole, amaji ninyia itifuociere Yoane batisimo jio aati, ette leten itoŋo diya.

⁴¹ Ofuonni nyia aati arriai jihonyi, ette jiaran jio, “Obeŋ nyia Yoane ihan obo eduarit, ati arai erre 'daŋ hunyia ikiana inyi te eram atulo olo hode.”

⁴² Iruhi nyia arriai waati hunyia owoni 'to diya eram honyi.