Yakobo 2 - Ecorit Aŋejuk 2003

Asario te Eram Igigia

¹ Illarak iko haniyarak hoŋ, te eruk hatai jio Lamonye hohoi, Yesu Kristo, Lamonye olo nakuatan, hègigiati.

² Alla attu obo asamani ittubit hatai, elle iyyafatio ayyel iko aboŋojin hunne ilamani, buo fe obo olociaŋ ottu elle iyyafatio aboŋojin hunno oguguasai,

³ ittata ibaŋi atulo elle iyyafatio 'to aboŋojin hunne ilamani 'to, ittata jiaran jihonyi, “Itoŋoi jio etoŋi enne ilaman 'to ana,” buo ijiatta jio olociaŋ jio, “Owotiai diya, kuyya itoŋoi ifau iger hejek hoŋ;”

⁴ tania, itahutak ania jio igigiati itai, buo fe ipalata ta aŋocio hatai eram waati hullomuk ta atajia hunno orrohoji 'to.

⁵ Illarak iko haniyarak hoŋ, ihumata itayirio! Onyimu nyia Hollum alociaŋak afau ana, isiaraniere jihosi neruk onno obolo, buo fe ifuotuniere olobie ninyia ocorok inyi ahono hia 'daŋ, hulle itabuori atajia hosi jihonyi.

⁶ Ati iyasiete itai alociaŋak. Obiaŋara soho asamak hullo ottehie 'to itai, buo fe oyatattai itai ilokikoi?

⁷ Obiaŋara soho ahuattek hosi hulle ittarrohojie 'to afure Lamonye hatai?

⁸ Ihaniete adi itai onno oyyu, elle iniŋiete itai efahi ono Olobie enne igioroni ibuk Hollum jio, “Itabuara ataji jio onyihari hoi ihuo onno obuarari inyi ahuan hoi.”

⁹ Buo elle igigiati itai aati, iyyauna itai; aŋotoni buo fe efahita jihatai epali ta amesio hatai isi.

¹⁰ Lia, ollo omesio 'to efahi abotie jio efahita, itahutak jio omesio inyi efahita 'daŋ.

¹¹ Nyio, lia, linyia ojio 'to jio, “Hèhanio erre somon,” inyi buo fe ollo ojio 'to jio, “Hèttoho.” Elle ibeŋ iyye ihanio erre somon, buo ira a hattohoni, ira iyye a hamiosoni ifahita.

¹² Tania, ikianati buo fe ihaniete ihuo aati hullo ofuoi iŋot eram hosi te efahita hunne iyaŋunie 'to ahohino.

¹³ Nyio, iholoŋ ono aŋocio hiram, obeŋ adi Hollum omehino jio lia, ollo obeŋ 'to omehino jio aati hullomuk; ati agalik amehino, aŋocio hiram.

Neruk iko Ehanita

¹⁴ Illarak iko haniyarak hoŋ, anyio yiji 'tadi onno onyurak obo alatai alla ajio inyi jio awon inyi iko neruk, buo ehanita honyi obeŋi itahutani neruk honyi ania? Oremik 'tadi neruk honyi ania italahuna inyi?

¹⁵ Alla abeŋ aboŋo kuyya aŋiyo jio obo ella kuyya aniye,

¹⁶ anyio yiji 'tadi enne inyurak iyye elle ijio iyye jihonyi jio, “Ilo onno oyyu, itanaha ahuan, orumak aŋiyo onno obolo,” buo ibeŋ isiarak jihonyi eluahiti hunna awak inyi?

¹⁷ Ihuo nyia buo fe, ara eruk ariŋ asai, alla abeŋ inyi owon iko ehanita hunno oyiji 'to.

¹⁸ Ati ojio adi obo jio, “Iwon iyye iko neruk, buo ni awon iko ehanita ayijok.” Etarraŋ adi ni inyi jio, “Itahutak ani neruk hoi onno obeŋ 'to owon iko ehanita ayijok. Etahutak adi ni iyye neruk hoŋ te ehanio onno oyyu.”

¹⁹ Iruk iyye jio owon Hollum abotie ijiai? Oyyu! Iruhi buo fe aminiaŋa eram ania…ette ikikiro ta abaŋi.

²⁰ Obeŋ hou! Iwak iyye oŋida itahutani jihoi jio, ara eruk ariŋ asai alla abeŋ owon iko ehanita hunno oyiji 'to?

²¹ Aŋai nyia soho itabisani hohonyi hohoi Abramo to hosiere Hollum? Itabisani nyia inyi te ehanita honyi, to ninyia isiaraniere inyi lonyi honyi Isako ehumi ihide ititiek.

²² Ikeja! Igiamai nyia eruk iko ehanita honyi arabotie. Tania, attuba eruk honyi te ehanita honyi.

²³ Tania, itasirunie luŋa ekenita hutto buk Hollum hunno ojiori 'to jio, “Iruk nyia Abramo Hollum, ania, ihiananiere Hollum inyi a habisani.” Ania, arari Abramo a motte Hollum.

²⁴ Igonyuna itai! Etabisanio to hosiere Hollum te ehanita, buo obiaŋara te eruk ijiai.

²⁵ Ara nyia buo fe ihuo nyia jio Rahab, nesomo. Itabisani nyia inyi to hosiere Hollum te ehanita honyi, ninyia ifuotuniere inyi asiri hulo Israele, ette italunyara isi to obo ekoi hama.

²⁶ Tania, ihuo onno oyeri atulo alla abeŋ oloholio jihonyi; ihuo nyia buo fe, alla abeŋ neruk owon iko ehanita ayijok, ara inyi ihuo ariŋ anna aye.