Tito 3 - Ecorit Aŋejuk 2003

Amanya Kristiani

¹ Inyiaha iramana aati hatai, ijiara abaŋi elettaha iko gala; ijiara oniŋie isi buo fe ihuhumi ahuattek ihaniere onno oyyu oŋitek 'daŋ.

² Iramak isi, hèlaha ittarrohojie afure obo atulo, hèlaha omunoi aŋalafa, ijiara anyalami; ijiara odulori emorot jio aati 'daŋ.

³ Berien, obeŋi nyia ossi jihohoi; era nyia a hamiosok, a hepalak, apiti jio awoi iwahiti iko emuniti 'daŋ. Etuhok nyia amanya hohoi 'daŋ jio ajujon tajia iko jio ahaini. Oliwarik nyia aati 'daŋ hohoi, buo fe eliwari ahuattek hohoi.

⁴ Buo ninyia italeyehini ayiji iko abuaran taji ono Hollum etalahani hohoi,

⁵ ette inyi italahuna hohoi; obiaŋara nyia jio to omuk erre ayijok hunne ehan hohoi. Ati, italahu inyi hohoi ta amehino honyi, ta agolon ono Loholio Olibo elle esiorio 'to jihohoi esiuno iko nesu aŋejuk te etaliborio honyi hohoi.

⁶ Itufutak nyia Hollum jihohoi Loholio Olibo to Yesu Kristo etalahani hohoi jio,

⁷ ta ayiji taji honyi, oŋida bati era ahabisak to hosiere Hollum, ette ifuanna ifuotuna nesu onno osio 'to 'tulaŋ, enne eyihi.

⁸ Ara eram ania luŋa hode. Awak ni oŋida iyye ihum iduloro ekiana erre hunia jio, oŋida bati hulle iruhi 'to jio Hollum igigiloi ituhoniere oŋitek hosi 'daŋ ihaniere erre ayijok, hunno oŋidari buo fe oluahie aati 'daŋ.

⁹ Ati, idehina etarisa obojiai, idehina ehenio fureta hohonyiok; idehina ebubuanya iko aŋalafa te eram ono Efahita. Erre asai hunia, obeŋ obo ayiji jihosi.

¹⁰ Alla arroho 'tuŋ, isiarak esariti arrihai jio hia hulle iyaŋunie 'to ebubuanya. Tania, hènyiak ihutonia jihosi.

¹¹ Omijak jio, omuyahi ossi aati hulia, buo fe eyyata hosi itahutani jio ipali isi.

Ettiyenita Etisidita

¹² Elle efak ni Artemis kuyya Tikikos jihoi, orumak luŋa obo ekoi ittuniere jihoŋ Nikopolis, nyio adioto to hou hoŋ ilari itoŋori diya ta ayafajin hacoro.

¹³ Orumak luŋa obo ekoi iluahiere Sena, aŋotoni hiram, iko Apolo oŋida isi itterie amomoriya hosi. Hèlaha luŋa obo ariŋ aŋaramahi jihosi.

¹⁴ Ijiara luŋa aati hohoi ittiyenuni ituhoniere oŋitek hosi ihaniere erre ayijok, iluahiere ewahiti hunna arai 'to hode. Hèlaha amanyai asai asai.

¹⁵ Itifonyai aati 'daŋ hullo owon 'to dini. Itifonyak eruhok ihuo hohoi. Hatawana ayiji taji Hollum jihatai 'daŋ.