Tito 2 - Ecorit Aŋejuk 2003

Ettiyenio onno Obis 'to

¹ Buo jihoi Tito, ittiyenie luŋa erre hunno obisi 'to.

² Isiŋa lamaruak; ijiara ossi hosi afaŋi, ijiara egigilita hosi obisi; ijiara buo fe isi ihumi ittoŋotio ahuattek hosi. Hèlaha luŋa isi itapuahi neruk hosi iko abuaran tajia hosi buo nadihan hosi.

³ Ihuo nyia buo fe, isiŋa namaruak; ijiara amanyai aŋoruo hunne isiori 'to amanya hosi jio Hollum. Hèlaha arai a hetarrohojak fureta waati kuyya a harumak balu. Ijiara luŋa isi ittiyenie erre hunno oyiji 'to,

⁴ oŋida isi ittiyenie aŋoruo anyarhalu itabuoriere atajia jio habiok hosi iko jio aduri hosi.

⁵ Ijiara buo fe isi ottoŋotie ahuattek hosi onno oyyu, ijiara anyalami, ijiara arai aŋoruo ayijok, hunno oniŋie 'to habiok hosi; nyio, ŋadi obo atulo ikiana onno orroho te eram sayyo hunno ofuonni 'to jio Hollum.

⁶ Ihuo nyia buo fe, ihuma buo fe ittittohina nyarhalu hulla arai 'to aliawa, ijiara ottoŋotie ahuattek hosi onno oyyu.

⁷ Oduloi irahan a hetamijani jio aati hullomuk. Ittiyenie luŋa ta ataji onno olibo, hèbala elle ittiyenio iyye.

⁸ Ittiyenie te ekenita hunno obisi 'to, hunno obeŋ tulo oremik itipal. Anyahini adi ariri amiorok hoi alla abeŋi isi orumani obo epali ikianari to hohoi.

⁹ Ijiara luŋa apiti itamunoye elettaha hosi ta aniŋio hirre 'daŋ hunne iramani jihosi. Hèlaha isi itarraŋai iko elettaha hosi,

¹⁰ kuyya ohoholuni erre hosi. Ati, ijiara luŋa isi itahutani abisan iko ayiji hosi. Oŋida bati aati 'daŋ itahabuye ettiyenio ono Hollum etalahani hohoi te erre 'daŋ hunne ihanie isi.

¹¹ Nyio, italeyehi Hollum ayiji taji honyi italahuniere aati 'daŋ.

¹² Ettiyenio hohoi ayiji taji ania, ibusaniere emanyiti hunno orrohoji 'to iko ewahiti huno afau ana. Awak inyi hohoi emanya jio afau ana onno oyyu, obeŋ enyobio,

¹³ buo etilari, te eyihina Noloŋ eyijo, anna alari akuatan ono Hollum hohoi alla agalik 'to iko ono Yesu Kristo etalahani.

¹⁴ Isiarak nyia inyi ahuan honyi to hohoi, italahuniere hohoi jio eyyata 'daŋ jio, oŋida era a waati honyi aliborok, hulla awahi 'to ehanio erre hunno obisi 'to.

¹⁵ Ittiyenie erre hunia; igiamari elohittok ottonohoi itagoliere atajia iko iriŋiere etayirak hoi. Hèlaha obo jihosi iyasio iyye.