Roma 6 - Ecorit Aŋejuk 2003

Esu te Enoso iko Kristo

¹ Ejio 'tadi anyio? Edulo 'tadi eyyautta oŋida ayiji taji Hollum ofuananio?

² Obeŋ 'tuŋ! Era ahayak alla awon eyyau. Aŋai ti eremik iduloro amanya te eyyau?

³ Hode, imijana itai jio ninyia efuotuniere batisimo inosori iko Kristo Yesu, efuotu nyia batisimo iyeri ikonyi.

⁴ Enuhanio nyia ikonyi buo fe eye ikonyi te efuotuna batisimo, jio, oŋida bati emanya namanya aŋejuk, ihuo ninyia itubuhunierek Kristo toye ta aduaran Monye onno okuat 'to.

⁵ Ihuania enosonio arabotie ikonyi iye ihuo ninyia oyeri inyi, ihuo nyia buo fe efuo adi inosonio ikonyi jio ebuhuna ihuo ninyia itubuhunierek inyi.

⁶ Emijak jio isihonie nyia ahuattek hohoi eberien ikonyi likruce jio, oŋida bati ottohori ahuattek hohoi eberien hunyia omunoi 'to eyyau, jio oŋida ebeŋ ewon igolon ono eyyau.

⁷ Nyio, alla aye atulo, abeŋ inyi owon jio agolon ono eyyau.

⁸ Ati ta aye hohoi arabotie iko Kristo, eruk jio esu adi buo fe ikonyi.

⁹ Emijak jio, itubuhuni nyia Kristo toye; obeŋ adi inyi inyiak iye 'tuŋ. Nyio, ittallik inyi inyiak iwanan jio agolon ono naye.

¹⁰ Ta naye Kristo, abeŋ inyi inyiak iwanan jio agolon ono eyyau; ihuania, amanya inyi amanya anna awak Hollum.

¹¹ Ihuo nyia buo fe, omijana luŋa jio, irata nyia itai ahayaak jio agolon ono eyyau. Ati te enoso hatai iko Kristo Yesu, imanyati itai ihuania amanya anna awak Hollum.

¹² Tania, hèlaha luŋa agolon ono eyyau inyiak iwanan jio ahuattek hatai hunia hunno oremehini 'to iye, ŋadi itai ijifatiete ewahiti huattek hatai.

¹³ Hèŋatana aŋacio huattek hatai jio eyyau irari ehanita hirre arrohojak. Ati isiatta ahuattek hatai jio Hollum ihuo aati hunyia itubuhuni toye. Isiatta ahuattek hatai 'daŋ jio Hollum irari ehanita hirre ayijok.

¹⁴ Hèlaha luŋa eyyau ogottiere itai, nyio, ibiaŋata itai imanyati te Efahita; ati imanyati itai ta ayiji taji Hollum.

Apiti hulo Abisan

¹⁵ Anyioti? Oŋida ti eyyau, ta amanya hohoi ta ayiji taji Hollum buo obiaŋara te efahita? Obeŋ 'tuŋ!

¹⁶ Itimoti ti itai jio, elle isiatta itai ahuattek hatai apiti iniŋiere obo atulo, irata itai luŋa apiti lia, elle iniŋiete itai; kuyya apiti hulo eyyau enne iyaŋuno 'to aye, kuyya apiti hulo aniŋio enne iyaŋuno 'to abisan ihosiere Hollum?

¹⁷ Ati humo jio Hollum! Nyio, duadi bu irata nyia itai apiti hulo eyyau, iniŋiete itai, ta atajia hatai 'daŋ, nelahode onno owon 'to jio ettiyenio ninyia ifuotuna itai.

¹⁸ Ahouni itai jio agolon ono eyyau irari apiti hulo abisan.

¹⁹ (Ekiana ni ihuo atulo nyio, irata itai awaati hullo obeŋ agolon.) Isiatta nyia itai ahuattek hatai 'daŋ apiti hirre hunne iboti iko erre 'daŋ arrohojak. Ihuo nyia buo fe, isiatta luŋa ahuattek hatai 'daŋ apiti hulo abisan, imanyari amanya elibo.

²⁰ Ninyia hèrata itai apiti hulo eyyau, obeŋ nyia agolon ono abisan jihatai.

²¹ Inyurana nyia itai anyio yiji to ninyia ihaniette itai erre hunne iyaŋunie 'to ihuania jihatai ariri? Isi hunia erre hunne iyaŋunie 'to aye.

²² Ati ihuania, ahouni itai addi jio eyyau. Irata itai apiti Hollum. Inyurana itai amanya elibo, enne iyaŋuno 'to nesu onno osio 'to 'tulaŋ.

²³ Ara naye edumit ono eyyata, buo nesu onno osio 'to 'tulaŋ, ara esiorio ono asai, enne isiarak Hollum, onno ottu 'to te enoso iko Yesu Kristo, Lamonye hohoi.