Roma 16 - Ecorit Aŋejuk 2003

Etifonyo Paulo Aati

¹ Ijiara nani eramak itai jio ara haniye hohoi Foyibe, atulo eyijo, enne igiama jio Eklesia otto Senkreya.

² Ifuotuna inyi ta afure ono Lamonye ihuo osiru jio aati Hollum. Oluahata inyi te erre 'daŋ hunna awak inyi jihatai; nyio, aluak inyi aati arriai buo fe oluak nani.

³ Itifonyana ba Prisila iko Akuila, hulle egiama 'to ikoŋ jio Kristo Yesu.

⁴ Itamuttiŋani nyia isi nesu hosi toni. Nani iko eklesiahien Lufajak 'daŋ, esiarak hohoi jihosi ahumo.

⁵ Itifonyana buo fe eluluŋ heruhok onno omojotio 'to ihaŋ hosi. Imalahina illaŋ Epenitos alla amuno ni, atulo linyia itter 'to eruk jio Kristo ta ŋati Asia.

⁶ Imalahina Maria, enne igiama 'to bebe tetai.

⁷ Imalahina buo fe Andronikos iko Yunia, Yudei hohoi hinyia efita 'to ikoŋ ibabus. Omijani efahat isi bebe. Ifuotuni nyia isi Kristo ahosiere jihoŋ.

⁸ Imalahina Ampiliatos, illaŋ alla amuno ni bebe, te enoso iko Lamonye.

⁹ Imalahina buo fe Urbanos, elle igiama 'to ikohoi arabotie jio Kristo. Itifonyana buo fe Stakis, illaŋ alla amuno ni bebe.

¹⁰ Imalahina Apellis, elle etahutak 'to hode hode eruk honyi Kristo. Itifonyana aati hutta haŋ Aristobulus.

¹¹ Imalahina Erodion a Yudeitanani ihuo nani; iko Kristiani hutta haŋ Nartisio.

¹² Imalahina Trifena iko Trifosa hulle igiamai 'to jio Lamonye. Itifonyana buo fe illaŋ Persis, alla amuno ni bebe, elle igiama 'to bebe jio Lamonye.

¹³ Imalahina Rufus, legiamani olo Lamonye alla agalik 'to 'daŋ. Itifonyana buo fe honyonyi onno odulo 'to ittoŋotio nani ihuo iyaŋ.

¹⁴ Imalahina Asinkritos, Flegon, Herms, Patrobas, Hermas iko Kristiani 'daŋ hullo owoni 'to ikosi.

¹⁵ Imalahina Filologos iko Julia, Nereyos iko haniyonyi, buo Olimpas iko aati Hollum 'daŋ hullo owoni 'to ikosi.

¹⁶ Ifonyati ahuattek hatai ta ahucio 'yaha ono nelik tajia. Itifonyai aati hutte eklesiahien Kristo 'daŋ, itai.

Ettittotia Esidita

¹⁷ Illarak iko haniyarak hoŋ, ehum ni iramana itai; ihumata mijio aati hulle iyaŋuttai 'to ebubuanya iko etisiabara heruhok. Ihari isi ettiyenita hunyia ifuotuna itai. Hènyihati jihosi!

¹⁸ Nyio, obeŋi aati ihuo hulia igiamai jio Kristo, Lamonye hohoi, ati ihanie isi ewahiti huattek hosi. Inyobie isi aati hullo omutari hossi te ekenita hosi hunne ilamani buo arai etafittaŋita.

¹⁹ Amijani aati 'daŋ ababo aniŋio hatai Asayyo Ayijok. Inyi eram ania anna amunori ni itai. Awak ni oŋida itai imijana te elofioro erre ayijok, buo itimoti ehanio erre arrohojak.

²⁰ Tania, Hollum elle iyaŋuno 'to nelik tajia, itariehi adi inyi kokuak Sittan ihejek hatai. Ijiara ayiji taji Yesu, Lamonye hohoi hatawana jihatai

²¹ Itifonya itai Timoteyo elle igiama 'to ikoŋ. Itifonyai buo fe Yudei hohoi itai; isi bo Lucio, Jason iko Sosipata.

²² Nani, Tersios, egioroni hirre Paulo huttono awaraga ana, efonyo ni itai te efonya Kristiani.

²³ Itifonya itai Gayos, latulo elle etoŋori ni, iko eluluŋ heruhok onno omojotio 'to ihaŋ honyi. Itifonya buo fe itai Erastos attunani robiyaa olo abore gala ana, inyi iko illa hohoi Kuartos. [

²⁴ Ijiara ayiji taji ono Yesu Kristo, Lamonye hohoi hatawana jihatai 'daŋ. Amen.]

Amojo Esidi ono Etahabuyo

²⁵ Hétahabuyete Hollum! Inyi oremik itagol eruk hatai ta Asayyo Ayijok huno Yesu Kristo, hunne ettittoyo ni. Asayyo hunia, hunyia italeyehini 'to elahode anna agalik 'to ofioro tulo. Otimoi nyia asik arriai hunyia berien elahode ania.

²⁶ Ati ihuania, asalani elahode ania te egierita huno ekianak Hollum, buo fe Hollum, ollo osio 'to 'tulaŋ, ihum iramana jio, ijiara aati hutta fau 'daŋ omijani elahode ania; oŋida bati isi 'daŋ iruhi ette iniŋio inyi.

²⁷ To Yesu Kristo, ijiara akuatan hatawana 'tulaŋ jio Hollum hama, ollo omijak 'to erre 'daŋ! Amen.