Matteyo 8 - Ecorit Aŋejuk 2003

Itaŋida Yesu obo Latulo

¹ Ninyia isuru Yesu to doŋe ollo odiha 'to, ijifarai nyia eluluŋi hunne ettaha inyi.

² Attati obo atulo, linyia owon 'to iko aŋuai belelio, ittuna jihonyi, ette irigoŋo ihosiere honyi, ette jiaran, “Lettok, ta awahan ottonohoi, iremik iyye italibo ani.”

³ Attati Yesu ihalamana aani honyi, ette ittir inyi, ette jiaran, “Awak ni, toliboro!” Teya teya, ette aŋuai atulo lia iŋidari.

⁴ Attati Yesu jiaran jihonyi, “Itayirie! Hèramak obo atulo, ati obotik jio ehumani, ijiara inyi ihum imi iyye, attati teya, isiarak ehumi jio Hollum ihuo ojiori efahita huno Mose, itahutaniere jio aati jio, ilibo iyye.”

Itaŋida Yesu Apit Jafit olo Oseŋer Roma

⁵ To ninyia ojiŋaniere Yesu ibore gala Kapernaum, ottu nyia obo ajafit olo Roma, ette ittana inyi

⁶ jiojio, “Lettok, apit hoŋ elle ififiata iko aŋuai itua haŋ; odiaha inyi bebe, ittallik ikoddaŋ idioto.”

⁷ Buo Yesu ette jiaran jihonyi, “Alo adi ni itaŋida inyi.”

⁸ Buo ajafit lia ette itarraŋ ojio, “Lettok, abeŋ ni asiru ifuotuniere iyye ihaŋ hoŋ. Ati ikianai te etuk ijiai, oŋida adi apit hoŋ.

⁹ Orriama ihuo anna aniŋiere ni elettaha hoŋ, buo fe oseŋer hoŋ oniŋie ani. Aremik ni jiaran jio obo, ‘Ilo!’ buo inyi ette leten, buo fe jio olobo, ‘Waŋ!’ buo inyi ette ittuna; buo fe ajio jio apit hoŋ, ‘Ihana enyia!’ buo inyi ette ihan.”

¹⁰ Ninyia itaniŋu Yesu eram ania, illilliha nyia inyi bebe, ette jiaran jio aati hunyia ijifatie 'to inyi jio, “Eramak ni itai jio, habeŋ ni anyurak obo eruk onno obolo 'to ihuo ana, ara duadi bu ifau Israele 'daŋ.

¹¹ Eramak ni itai jio, ofuonni adi aati arriai tetteduoŋi holoŋ iko tettedorroi holoŋ iŋiyere agari iko Abramo, buo Isako, ojio Yakobo, Ilobie ettedou.

¹² Ati irruoŋoni adi idumele, hia, hullo oremehini 'to irahan a hulo olobie. Diya, ituruhoi adi isi buo fe irutai aala hosi.”

¹³ Attati Yesu jiaran jio ajafit alia, “Ilo haŋ, ijiara hétera jihoi ihuo iruk iyye.” Teya teya, ette apit lia iŋidari.

Itaŋida Yesu Aati Arriai

¹⁴ Olo nyia Yesu ihaŋ Petro, ette irumana hamoni Petro ififiata iko anahan huan.

¹⁵ Attati inyi ittir aani aŋotte ania, buo anahan huan nyia, ette iŋatana inyi, ette inyi idioto ahide, ette ihuhumana jio Yesu aŋiyo.

¹⁶ Ninyia ara ollotoriai, iyaŋunie nyia aati jio Yesu, aati miniaŋa arriai. Buo te etuk ijiai, itattur nyia Yesu aminiaŋa, buo aati hunyia oŋuai 'to 'daŋ ette iŋidari.

¹⁷ Ihan nyia inyi ihuo nyia, itasiruniere eram ninyia ikiana Isaya ekianani Hollum jio, “Iduha inyi addi eŋuati iko ediahiti hohoi.”

Aati Hulla Awahi 'to Rahan Ahejifak Yesu

¹⁸ Ninyia igonyu Yesu eluluŋ waati okudani inyi, ette inyi ihum iramana jio lejifak honyi jio, “Hafatta afohor tafar enne ittokon tole.”

¹⁹ Attati obo ettiyanani olo efahita ittuna jihonyi, ette jiaran, “Hettiyanani, ejifaru adi ni iyye jio amasik 'daŋ hunne ilari iyye.”

²⁰ Buo Yesu ette itarraŋ inyi jiojio, “Owoni obeyohi iko ewurio hosi, buo fe aheny owoni iko asik hosi; ati obeŋ obo amaji onno oferiere Lonyi tulo iyiriari.”

²¹ Buo obo olo lejifak honyi ette jiaran, “Lettok, ijiara do nani alo inuhana monyoŋ.”

²² Ati itarraŋ nyia Yesu inyi ojio, “Ijifunie ani. Idehi ayaak onuhani ayaak hosi.”

Itawoj Yesu Addiŋilla

²³ Ninyia ladak Yesu itogol, ijifarai nyia ejifak honyi inyi.

²⁴ Teya teya, ette addiŋilla idiotonio isi tehiji tafar enne ittokon many ojiari atogol nyia adiori ta apoŋia poŋia hari. Ati ojotoro nyia Yesu,

²⁵ attati ejifak ifuatan itaheny inyi, ette jiaran jiojio, “Lamonye! Eluak hohoi, attu naye!”

²⁶ Buo inyi ette jiaran jihosi, “Eii! Anyio baŋi attanatai ania? Itai aati hullo omuta eruk!” Attati inyi idioto, ette iŋerejanio jio addiŋilla iko apoŋia poŋia hari, ette ediofo 'daŋ idua jillili.

²⁷ Illillihai nyia isi 'daŋ bebe, ette jiaran, “Eii! Anyio tulo olo? Ara duadi bu addiŋilla iko apoŋia poŋia hari, oniŋie isi 'daŋ inyi!”

Itaŋida Yesu Aati Miniaŋa Arrihai

²⁸ Ninyia allaŋ Yesu atafar tole, ifau Gerasa, oruaŋanie nyia omuk aati miniaŋa arrihai ikonyi, hullo ofuonni tehiji ilumio, buo iŋereji bebe many abaŋarik aati adaha tolia.

²⁹ Teya, iwuwoŋitai nyia isi bebe, ette jiaran, “Lonyi Hollum, anyio enne iwak iyye jihohoi? Ittu iyye hohoi ittigemio hobeŋ asaa ottuba?”

³⁰ Oŋiye nyia abataha arriai alamarai kai teger hosi.

³¹ Attati aminiaŋa hunia ittana Yesu jio, “Elle ijio iyye ifuha hohoi addi, ifuhak ati hohoi jio abataha hua.”

³² Buo inyi ette jiaran jihosi, “Ifuatta.” Attati isi ifuatan ette ijiŋana jio abataha hua, buo eluluŋ bataha hunia 'daŋ ette isuoro attany olotifor hari jio hutu, hutu, hutu, ette ikuahino itua hari, ette ikoddaŋ iye diya.

³³ Ofuhoi nyia eyyahak bataha hunia, ette ijiŋana itua bore gala, ette iramana erre 'daŋ, hoduo iduoŋi 'to jio aati miniaŋa.

³⁴ Tania, ojiŋuni nyia aati 'daŋ to tua bore gala, ette ifuatan jio Yesu. Ninyia igonyuni isi inyi, ette isi ittana inyi hételo addi ta fau hosi.