Matteyo 5 - Ecorit Aŋejuk 2003

Ettittoyo otto Doŋe 5:1—7:29

¹ Igonyu nyia Yesu eluluŋ waati, ette idahina jio obo adoŋe ollo odiha ette itoŋo. Okudani nyia ejifak honyi inyi,

² buo inyi ette itterio ettiyenio isi.

Amuno Ahode Hode

³ “Hotomunohi hia, hulle ilociaŋi 'to to hosiere Hollum; ara Olobie ettedou ahonosi!

⁴ Hotomunohi hia, hulla atarihai 'to, itilik adi Hollum atajia hosi!

⁵ Hotomunohi hia, hulla anyalami 'to, ifuotuni adi isi ecoriti Hollum!

⁶ Hotomunohi hia, hulla awahi 'to bebe abisan, isio adi Hollum erre 'daŋ jihosi!

⁷ Hotomunohi hia, hullo owoni 'to iko amehino jio aati hullomuk, omehino adi Hollum jihosi!

⁸ Hotomunohi hia, hullo olibori tajia, igonyuni adi isi Hollum!

⁹ Hotomunohi etumuarak waati, iloŋoi adi isi aduri Hollum!

¹⁰ Hotomunohi hia, hulle ittigemie te ehanio hosi erre hunna awak Hollum; ara Nolobie ettedou ahonosi!

¹¹ “Omunoti alla amorie aati itai, ittigemie itai, buo fe ikianai tetai erre hunno orrohoji 'to ta agesemi ta arahan hatai a huloŋ.

¹² Omunoti buo fe isahuttati; nyio, obolo adi esiorio jihatai idou. Nyio, ittigemie nyia isi ekianak Hollum hunyia berien ihuo nyia.

Amile iko Afaŋan

¹³ “Irata itai ihuo amile jio aati 'daŋ. Ati elle ilik amile, inyiahini adi eduarit honyi aŋai? Abeŋ inyi inyiak iyiji; tania, oruasari adi inyi addi, ette aati irrirrieyo inyi.

¹⁴ “Irata itai ihuo afaŋan jio aati 'daŋ hutta fau. Obeŋ abore gala onno oduhoni ihide doŋe oremik idima.

¹⁵ Obeŋ tulo itawulohi allomo, ette imuhonia ta arrany. Ati oyihak adi inyi allomo ania ihide fillili, oŋida afaŋ jio aati 'daŋ hutto tua haji.

¹⁶ Ijiara afaŋan hatai hatafaŋa jio aati, oŋida isi igonyuni ehanita hatai hunno oyiji 'to, ette itahabuyo Monyatai ollo owon 'to idou.

Ettiyenio te Eram ono Efahita huno Mose

¹⁷ “Hègigiloti jio, attu ni itapuahiere efahita Mose iko ettiyenita huno ekianak Hollum. Abeŋ ni attu itapuahiere isi, ati attu ni itasiruniere isi.

¹⁸ Hode, eramak ni itai jio, many iholoŋ ono esidi idou iko afau, obeŋi adi iyari addi obo ekiana jio efahita, ara duadi bu egieri ollo odiha 'to, many itasirunierek isi 'daŋ.

¹⁹ Lia, ollo omesio 'to efahi abotie duadi bu ollo omuta 'to buo fe ittiyenio aati ihuo nyia, ofiaha adi inyi Ilobie ettedou. Ati lia, elle ijifatio 'to efahita buo fe ittiyenio isi jio aati, ara adi inyi elettok Ilobie ettedou.

²⁰ Tania, eramak ni itai jio, alla abeŋ abisan hatai agalik ayiji ono ettiyanak ifahita iko ono Farisei, ibiaŋata adi itai ijiŋana jio Olobie ettedou.

Ettiyenio te Eram ono Ajore

²¹ “Itaniŋuna nyia itai jio, iramani nyia jio aati hunya berien jio, ‘Hèttohoro; buo lia, ollo ottoho 'to oremehini adi iŋotonia jihonyi eram.’

²² Ati eramak ni itai jio, lia, elle iloŋojita 'to jio illanyi, oŋotoni adi jihonyi eram. Lia, ollo omor 'to illanyi, oŋotoni adi jihonyi eram. Lia, ollo ojio 'to jio illanyi jio, ‘Obeŋ hou’ oremehini ibironia inyi iferno.

²³ Tania, elle ilo iyye ititiek ehumi isioriere esiori hoi jio Hollum, buo diya itte iyiyiuna jio iloŋojita illahoi jihoi to obo eram,

²⁴ idiaharu esiorio hoi ihosiere ititiek ehumi; ilo do itabisaniere eram hoi iko illahoi. Ojio teya, ocohunie yo isioriere esiorio hoi jio Hollum.

²⁵ “Itimuoru atulo alla awak 'to iyaru iyye ilokikoi, hèbiaŋata itai ifanyata diya. Alla abociere inyi iyye many ihosiere aŋotoni hirre, isiarak adi aŋotoni hirre iyye jio oseŋer; buo isi ette ifitana iyye ibabus.

²⁶ Hode, eramak ni iyye jio, ibeŋ adi iyye ihouno many idumari iyye edumiti 'daŋ, hunno oŋotoni jihoi.

Ettiyenio te Eram Roto

²⁷ “Itaniŋuna nyia itai ojiori jio, ‘Hèrototi.’

²⁸ Ati eramak ni itai jio, atulo alla adaya 'to obo aŋotte; aroto inyi luŋa ta ataji honyi.

²⁹ Elle iyaru onyek iŋet iyye iyyau, ogolotu inyi, ibiroi addi! Nyio, iyyak iŋotik iyye aŋati huan hoi, buo ahuan hoi 'daŋ obeŋ ibironio iferno.

³⁰ Buo fe elle iyaru aani iŋet hoi iyye iyyau, oŋutu inyi tub itte ibiroro addi! Nyio, iyyak iŋotik iyye aani, buo ahuan hoi 'daŋ obeŋ ibironio iferno.

Ettiyenio te Eram ono Apiaha

³¹ “Ojiori nyia buo fe jio, ‘Atulo ollo opiahai 'to iko ŋoruoi honyi, ijiara luŋa inyi isiarak jihonyi awaraga ono apiaha.’

³² Ati eramak ni itai jio, lia, elle ifuhak 'to ŋoruoi honyi obojiai, buo obiaŋara te eram silara, itaroto inyi ŋoruoi honyi; buo alla ayemu obo atulo aŋotte onno opiahai 'to iko habi, oroto buo fe alle alia 'daŋ.

Ettiyenio te Eram Ittuŋo

³³ “Itaniŋuna nyia buo fe itai jio, iramani nyia jio aati hunyia berien jio, ‘Hètapuahata ettuŋo hatai, ihanata jio Lamonye ihuo ittuŋotti nyia itai.’

³⁴ Ati ihuania eramak ni itai jio, hèttuŋoti luŋa. Hèttuŋoti te nedou nyio, ara inyi aseger ilohittok ono Hollum.

³⁵ Hèttuŋoti buo fe ta afau; nyio, ara inyi amaji ebalori hejek honyi. Hèttuŋoti to Yerusalem, nyio, abore gala ono Loobu elle ittokon ania.

³⁶ Hèttuŋoti to ossi hatai; nyio, ittallihoto itai ihan obo ofitti aboŋ kuyya emoli.

³⁷ Elle ijiatta itai ‘Aafe’, ijiara luŋa ara Aafe; buo fe elle ijiatta itai ‘Obeŋ’, ijiara luŋa ara obeŋ. Obo ariŋ enne inyiahata itai ifunnihina, ottu nyia jio Sittan.

Ettiyenio te Eram ono Eniono

³⁸ “Itaniŋuna nyia itai ojiori jio, ‘Alla agolotu obo onyek hoi, ogolotu buo fe ononyi; buo fe elle isiahu obo aalai hoi isiahu buo fe ononyi.’

³⁹ Ati eramak ni itai jio, hènienu lia, elle ihan 'to onno orroho jihatai. Alla annaŋ obo amahalio hoi etteŋet, ijiara buo fe inyi annaŋ ebotie.

⁴⁰ Elle iyaru obo atulo iyye ilokikoi iyari agamis hoi, isiarak buo fe jihonyi akout hoi.

⁴¹ Alla arrosok obo iyye iwwahari erre honyi many amail abotie, akafaru isi amaili arrihai.

⁴² Isiatta erre jio lia, ollo omojo 'to; hèyimoti buo fe lia, alla awak 'to ohuroni jihonyi obo ariŋ.

Itabuarata Atajia jio Amiorok Hatai

⁴³ “Itaniŋuna nyia itai ojiori jio, ‘Itabuarata atajia jio mottiarak hatai buo iliwati amiorok hatai.’

⁴⁴ Ati eramak ni itai jio, itabuarata atajia hatai jio amiorok hatai buo fe imojoti to hia, hulle ittigemie 'to itai.

⁴⁵ Oŋida bati irata olonyirok Monyatai ettedou. Nyio, itafaŋak inyi oloŋ honyi buo fe itasahi ahide honyi jio ayijok iko jio arrohojak 'daŋ arabotie.

⁴⁶ Alla abuori atajia hatai ijiai hia, hullo obuori atajia hosi itai; anyio 'tadi enne inyiahata itai irumana? Ara duadi bu eddudduhak musuru, obeŋi soho isi ihanie ihuo nyia?

⁴⁷ Elle ifonyati itai mottiarak hatai ijiai, owon ti obo ariŋ anna agalik 'to ottoloŋi? Obeŋi soho Alufajak ihanie ihuo nyia?

⁴⁸ Oyijoto, ihuo onno oyijori Monyatai ettedou.