Matteyo 4 - Ecorit Aŋejuk 2003

Akemio Sittan Yesu

¹ Attati Oloholio itadihoro Yesu itua hidiofo, oŋida Sittan olo ikemio inyi.

² Oferu nyia Yesu oloŋi atomuana aŋuan iko aruejin atomuana aŋuan, teya, ette inyi iniama.

³ Attati Sittan ittuna, ette jiaran jihonyi, “Elle ira iyye Lonyi Hollum, iramak amoruoi huna ijiara oyitoi emunio.”

⁴ Ati itarraŋ nyia Yesu inyi ojio, “Igioroni ibuk Hollum jio, ‘Obeŋ atulo amanya te emune ijiai, ati te ekenita 'daŋ hunno ojio Hollum.’ ”

⁵ Attati Sittan iyaru Yesu Yerusalem, Abore Gala Elibo, ette itawojihina inyi isihidi Haji Emojit enne ittokon,

⁶ ette jiaran jihonyi, “Elle ira iyye Lonyi Hollum, orruaŋai ahuan hoi ifau; nyio, igioroni ibuk Hollum jio, ‘Ifak adi Hollum ajilohien honyi irririari iyye; Ittarrauni adi isi iyye ta ahas hosi, oŋida obo amoruo obeŋ iriafu ara duadi bu eeju hoi.’ ”

⁷ Itarraŋ nyia Yesu inyi ojio, “Igioroni buo fe ibuk Hollum jio, ‘Hèkemio Hollum Lamonye hoi.’ ”

⁸ Attati Sittan iyaru Yesu ihide doŋe onno ohodo 'to bebe, ette itahutana inyi olobiehien 'daŋ hutta fau iko olohuo hosi 'daŋ,

⁹ ette jiaran jihonyi, “Esiarak adi ni iyye erre hunia 'daŋ elle irigoŋo iyye ifau itahabuyere nani.”

¹⁰ Attati Yesu jiaran jihonyi, “Ilo addi Sittan; nyio, igioroni ibuk Hollum jio, ‘Itahabuye Hollum Lamonye hoi, buo fe igiama jihonyi hama.’ ”

¹¹ Attati Sittan idiaharu inyi, teya ette ajilohien ifuanna, ette iluahio inyi.

Itterio Yesu Egiama Honyi Ifau Galilea

¹² Ninyia itaniŋu Yesu jio ifitani Yoane ibabus, ette inyi leten ifau Galilea.

¹³ Iwot nyia inyi to Nasaret, ette leten imanya Kapernaum abore gala etteger tafar enne ittokon anna anya 'to Galilea, atta fau Sebulun iko Naftali.

¹⁴ Ihani nyia ihuo nyia, itasiruniere ekiana ninyia ojio Isaya ekianani Hollum jio,

¹⁵ “Afau Sebulun iko afau Naftali, huttekoi hari enne ittokon, afohor owore Yordano tole, Galilea, afau Lufajak!

¹⁶ Igonyuni adi aati hulla amanyai 'to idumele afaŋan onno obolo. Afaŋ adi inyi jio hia, hulla amanyai 'to ifau ette idumele ono naye.”

¹⁷ Many to noloŋ tonyia, itterio nyia Yesu ettittoyo jiojio, “Idehina eyyata hatai, nyio, iliaha Olobie ono Hollum!”

Iloŋu Yesu Ayafohok Aŋuan

¹⁸ To ninyia adahari Yesu ilotifor tafar Galilea, igonyu nyia inyi ayafohok arrihai, hulla arai ellarak; Simone (alla anya 'to Petro) iko illanyi Andrea. Ayafohoi nyia isi aham ta aboyo itua tafar.

¹⁹ Attati Yesu jiaran jihosi, “Ijifuniete ani, ettiyanak adi ni itai iloŋuttari aati jihoŋ.”

²⁰ Teya teya, idiaharai nyia isi aboyo hosi ette ijifaru inyi.

²¹ Ninyia holo inyi kai ahosiere, ette inyi igonyuna omuk ellarak arrihai, Yakobo iko Yoane lonyirok Sebedeyo. Owoni nyia isi itogol iko monyosi Sebedeyo, hullo orifie aboyo hosi, ette Yesu iloŋuna isi.

²² Teya teya, ette isi idiaharu atogol iko monyosi ette ijifaru Yesu.

Ittiyenio Yesu, Ittittoyo Buo fe Itaŋidario

²³ Ilur nyia Yesu Galilea 'daŋ, buo ittiyenio buo fe ittittoyo Asayyo Ayijok huno Olobie itua hasik imojiti. Itaŋidario nyia buo fe inyi aati jio eŋuati 'daŋ gele gele.

²⁴ Itaniŋoroi nyia asayyo honyi afau Siria 'daŋ; ania, ette aati iyaŋuno jihonyi aati 'daŋ hullo owoni 'to iko eŋuati gele gele, iko omuk hullo orrohojari 'to: hullo owoni 'to iko aminiaŋa, ahue, buo hullo oye aŋacio huattek, buo inyi ette itaŋida isi 'daŋ.

²⁵ Ijifarai nyia inyi eluluŋi hunne ittaha 'to to Galilea iko jio Aborejin Gala huna 'Tomon, to Yerusalem iko to Yudea buo fe ta fau onno owon 'to ifohor owore Yordano tole.