Matteyo 22 - Ecorit Aŋejuk 2003

Etarriamai ono Agari ono Ayama

¹ Inyiak nyia Yesu ikiana jihosi te etarriamata.

² “Ara Olobie ettedou ihua ana: Owon nyia obo oobu linyia ihuhumak 'to agari ta ayama lonyi honyi.

³ Ifak nyia inyi egiamak honyi oŋida iramani aati hunyia iloŋuni igari. Ati ihari nyia aati hia afuanna.

⁴ Inyiak fe inyi ifahina omuk egiamak héfuahi iramana eloŋot jio, ‘Imijiete, aŋida agari hoŋ, isiahi attamoti iko atawwa hoŋ hunyia itafiri, aŋidari erre 'daŋ. Ifuanna yo igari ono ayama.’

⁵ Ati obeŋi nyia eloŋot hia itaniŋie hirre, arai ifuatan ekotia hosi gele gele. Olo obo mana honyi, buo obo olo idukan honyi,

⁶ buo hullomuk ette inefuna egiamak hulia, ette ibahio, ette ittohoro.

⁷ Ania, ette hobu isuaharu iko ajore, ette ifahina oseŋer honyi héfuahi ittohoro aati hia, osuahini iko abore gala hosi.

⁸ Attati hobu iloŋuna apiti honyi, ette jiaran jihosi, ‘Ehuhumak ni agari hoŋ, ati orrohoji aati hunyia eloŋu ni.

⁹ Ihuania ifuatta ilofirihi, iloŋoto aati 'daŋ hulle iremehina itai irumana, ijiara ofuonni igari.’

¹⁰ Ania, ofuoi nyia egiamak ilofirihi, ette ittuttubuno aati hunyia orumani isi, ayijok iko arrohojak 'daŋ many ifutari atua haji eyemit 'daŋ atamonok.

¹¹ “Ninyia ajiŋak hobu iheriere atamonok, igonyu inyi obo atulo ollo obeŋ iyyafatio eŋotiti huno ayama;

¹² ette inyi ifiyo inyi jiojio, ‘Illa, aŋai ijiŋu iyye dini buo ibeŋ iyyafak eŋotiti huno ayama?’ Ati oduahino nyia latulo lia 'liŋ 'liŋ.

¹³ Attati hobu iramana egiamak jio, ‘Ifitata ahas honyi iko eejek 'daŋ. Opuasara inyi idumele; amaji anna alari inyi iyyoori buo fe oŋuruta aala honyi ta adiaha.’”

¹⁴ Attati Yesu itisidonia jio, “Nyio, oluaji aati hulle iloŋi, ati omutari hullo onyimuni.”

Eram ono Aduma Musuru

¹⁵ Ofuoi nyia Farisei addi, ette iwwahuna ekoi italohuniere Yesu te ekenita honyi.

¹⁶ Teya, ette isi ifahina omuk lejifak hosi arabotie iko lejifak Erode jio Yesu, hinyia ojiori jihonyi jio, “Hettiyanani, emijak hohoi jio ikiana iyye erre ahode hode. Ittiyenio iyye elahode ono awahan Hollum. Ibeŋ iyye ibaŋ obo atulo buo fe ibeŋ igigia aati.

¹⁷ Ike iramak hohoi, igigilo iyye aŋai? Aŋatani soho efahita hohoi idumari amusuru jio Hobu Roma elle ittokon kuyya obeŋ?”

¹⁸ Ati omijak nyia Yesu egigilita hosi hunno orrohoji 'to hunia, ania, ette inyi jiaran jihosi, “Itai etihanak huattek hullo! Nyio iwahata itai italohuna ani?

¹⁹ Iko etahutana ani arobiya onno odumarik amusuru.” Attati isi itahutana jihonyi arobiya.

²⁰ Buo inyi ette ifiyo isi jiojio, “Anaŋai arrijiori ana iko afure enne igioroni ana ihide honyi?”

²¹ Itarraŋi nyia isi jiojio, “Huno Hobu elle ittokon olo Roma.” Ania, ette Yesu jiaran jihosi, “Ihuania, Isiatta Hobu elle ittokon erre Hobu elle ittokon, buo jio Hollum, erre Hollum.”

²² Ninyia itaniŋuni isi ekenita hunia, illillihai nyia isi bebe, ette ibusana inyi, ette ifuatan addi.

Eram ono Ebuhuna Toye

²³ To oloŋ nyia ofuonni nyia omuk hulo Sadusei jio Yesu. Isi aati hullo ojiori 'to jio obeŋ ebuhuna toye.

²⁴ Ifiye nyia isi Yesu jio, “Hettiyanani, ojiori nyia efahita Mose jio, alla aye atulo obeŋ isiu hito, ijiara illanyi ojuŋori ŋoruoi honyi isiuniere aduri a hulo ayaani lia.

²⁵ Ihuania, owoni nyia omuk ellarak hattarik ihiji hohoi. Oyemu nyia ahouti aŋotte, ette iye obeŋ hito, buo illanyi ette ijuŋori ŋoruoi honyi.

²⁶ Ara nyia buo fe inyi ihuo nyia jio etarrihi, etahunihi many jio etahattarihi.

²⁷ Ihalu hosi 'daŋ, aye buo fe aŋotte nyia.

²⁸ Ihuania, iholoŋ enne ibuhunierek ayaak, ara adi inyi ŋoruoi ŋai? Nyio, awattarik nyia isi 'daŋ inyi.”

²⁹ Ati itarraŋ nyia Yesu isi jio, “Ipalata itai! Nyio, ibiaŋata itai imijana abuk Hollum kuyya bu eduariti Hollum.

³⁰ Nyio, elle ebuhuni ayaak, obeŋi adi isi inyiahi iyama. Arai isi ihuo ajilohien huttedou.

³¹ Ati te eram ono ebuhuna ono ayaak, hèbiaŋata itai ihenuna erre hunyia ikiana Hollum jihatai?

³² Ojio nyia jio, ‘Ani Hollum olo Abramo, Hollum olo Isako, buo fe Hollum olo Yakobo.’ Obiaŋara inyi Hollum olo ayaak, ati olo esuok.”

³³ Ninyia itaniŋu eluluŋ waati erre hunia, ette isi illilliha te ettiyenio honyi.

Efahi Anna Agalik 'to

³⁴ Ninyia itaniŋuni Farisei jio itaduahi Yesu Sadusei, ette isi ittubanio.

³⁵ Attati obo olosi, alla ara ahettiyanani ifahita, iwahan italohuna inyi te efiyo.

³⁶ Ifiyo nyia inyi Yesu jiojio, “Hettiyanani, anani efahi anna agalik 'to jio Efahita 'daŋ?”

³⁷ Itarraŋ nyia Yesu ojio, “ ‘Itabuara ataji hoi 'daŋ jio Hollum Lamonye hoi to oloyiri hoi 'daŋ, iko te egigilita hoi 'daŋ.’

³⁸ Efahi ania anna agalik 'to 'daŋ, buo fe ara etteri.

³⁹ Ara buo fe etarrihi ihuo inyi, ‘Itabuara ataji hoi jio onyihari hoi ihuo onno obuarari inyi ahuan hoi.’

⁴⁰ Ofuonni efahita Mose iko ettiyenita huno ekianak Hollum 'daŋ jio efahita huna arrihai hunia.”

Eram ono Olonyimoto

⁴¹ Ninyia attubanie omuk hulo Farisei arabotie, ette Yesu ifiyo isi jiojio,

⁴² “Igigiloti itai aŋai te eram ono Olonyimoto? Odetuno adi inyi to woyo ŋai?” Itarraŋi nyia isi jio, “To woyo Dafide.”

⁴³ Attati Yesu ifiyo isi, “Nyio nyiati iramak Oloholio Dafide oŋida iloŋo inyi Lamonye? Ania, ojiari Dafide jio,

⁴⁴ ‘Ojio Lamonye jio Lamonye hoŋ: Itoŋoi tene totto ŋati iŋet hoŋ many ehananiere ni amiorok hoi ariŋ enne irriehiniere iyye eejek hoi.’

⁴⁵ Elle iloŋo ati Dafide inyi ‘Lamonye,’ aŋai ati inyiak Olonyimoto irahan to woyo Dafide?”

⁴⁶ Obeŋ nyia obo oremik itarraŋ Yesu. Ania, many to oloŋ tonyia, obeŋ nyia tulo inyiak irinyana ifiyere inyi.