Matteyo 20 - Ecorit Aŋejuk 2003

Egiamak Hutto Mana Fino

¹ “Ara Olobie ettedou ihua ana; iwany nyia obo latulo ijuruniere omuk egiamak igiamari imana fino honyi.

² Ninyia iruk inyi idumari isi ababo oloŋ abotie arobiya abotie, ette inyi ifahina isi igiamari imana fino honyi.

³ Ninyia ara saa hottoŋuan, inyiak inyi leten isuk, ette igonyuna omuk aati awajatie diya obeŋi igiamai.

⁴ Ania, ette inyi iramana isi jiojio, ‘Ifuatta buo fe itai igiamati itua mana fino hoŋ aduma adi ni itai onno oyyu.’

⁵ Ania ette isi ifuatan. Ninyia ara akil fanni iko asaa hunihoi otto otoriai, inyiak inyi ihan ihuo nyia.

⁶ Buo ninyia iliaha saa miyet otto kekai, inyiak inyi leten isuk ette igonyuna omuk aati hullo owajatie diya, ette jiaran jihosi, ‘Nyio ituhoto itai oloŋ obojiai ta awajatio obeŋ egiama?’

⁷ Buo isi ette itarraŋ ojio, ‘Obeŋ bu tulo hohoi ojuraru igiama.’ Attati inyi iramana isi jiojio, ‘Ifuatta buo fe itai igiamati imana fino hoŋ.’

⁸ “Ninyia ara akekai, ette lamonye mana iramana elettok hegiamak hulia jio, ‘Iloŋu egiamak hulia, itte iharana isi arobiyaa hosi. Itterie jio hoduo hetek ijuruno many ifunyari iyye jio hoduo ejuruno tetteri.’

⁹ Ninyia afuonni hinyia ojurunie ta saa miyet otto kekai, ette inyi iharana isi 'daŋ ababo arobiya abotie abotie.

¹⁰ Ninyia afuonni hunyia ojurunie tetteri, igigiloi nyia isi jiojio ofuoi adi iharana jihosi arobiyaa hunna agalihini huno hullomuk. Ati aharani nyia buo fe jihosi 'daŋ ababo arobiya abotie abotie.

¹¹ Ninyia ahoruni isi, ette isi itterio eŋuŋunita jio lamonye mana,

¹² ette jiaran jihonyi, ‘Igemuni aati hoduo iloŋuno iyye ehalu, asaa abotie ijiai, buo hohoi edik anahan holoŋ afanni 'daŋ. Ati itarriamahi iyye arobiyaa hosi iko hunohoi!’

¹³ “Buo lamonye mana ette itarraŋ obo olosi ojio, ‘Itaniŋie, illa. Abeŋ ni enyob iyye. Ibeŋ duo soho iyye iruhok jihoŋ igiamari oloŋ abotie ta arobiya abotie?

¹⁴ Hibe edumit hoi, ilo haŋ. Awak ni isiarana jio latulo olo oduo eloŋu ni ehalu, ihuo enne esiaraniere ni jihoi.

¹⁵ Obeŋ soho obis jihoŋ ihaniere ihuo awak ni ta ariŋ ottonoŋ? Kuyya ihayin ti iyye emorot hoŋ?’ ”

¹⁶ Attati Yesu itisidonia ekiana honyi ette jiaran, “Tania, aati hulla arai 'to ihuania ecuŋita, arai adi isi etterita. Buo hulla arai 'to ihuania etterita, ette adi irahan ecuŋita.”

Ikiana Yesu Enyiahi Etahunihi Ta Aye Honyi

¹⁷ To ninyia alari Yesu many Yerusalem, ojio ihiji ikoi, ette inyi iloŋuna lejifak honyi hula 'tomon harrihai aŋati honyi, ette jiaran jihosi,

¹⁸ “Itayiriete, efuo ihuania Yerusalem, buo diya isiori adi Lonyi Tulo jio ehumak elettaha iko ettiyanak ifahita, buo isi ette iŋotonia aye jihonyi.

¹⁹ Isiori adi inyi jio Alufajak. Osuhotierek adi isi inyi, abahie adi isi inyi, ette isihonia inyi likruce. Ati ihalu oŋitek hunihoi itubuhuni adi inyi.”

Efiyo ono Nonye

²⁰ Attati ŋoruoi Sebedeyo iko lonyirok honyi ifuanna jio Yesu, ette irigoŋi ihosiere honyi, ette imojo jihonyi obo ariŋ.

²¹ Attati Yesu jiaran jihonyi, “Iwak iyye anyio?” Buo inyi ette itarraŋ ojio, “Ocorok jihoŋ jio ofuoi adi lonyirok hoŋ hula arrihai hulo itoŋo, abotie totto hani iŋet hoi, buo abotie totto ihorroŋ, elle ittu iyye irahan ahobu.”

²² Ati itarraŋ nyia Yesu ojio, “Itimoti itai anyio enne ifiyete itai. Iremehina adi itai idihuna ematit ono ettigemio anna alo ni irumana?”

²³ Itarraŋi nyia isi jio, “Eremik hohoi.” Buo Yesu ette jiaran jihosi, “Hode, iremehina adi itai idihuna ettigemita hunna alo ni irumana. Ati abeŋ ni aremik inyimuna ŋai adi olo itoŋo totto hani iŋet kuyya totto ihorroŋ hoŋ. Nyio, arai amasik hunia ahuno hia hinyia ihuhumak Monyoŋ jihosi.”

²⁴ Ninyia itaniŋuni lejifak honyi hula 'tomon eram ana, ette isi iloŋojita jio ellarak hula arrihai hulia.

²⁵ Ania, ette Yesu iloŋuna isi 'daŋ arabotie, ette jiaran, “Imijana itai jio ilohittohi oobuok hulo Alufajak jio aati hosi, buo fe elettaha ihumi ilohittok jio aati hosi.

²⁶ Ati obeŋ adi inyi ara ihuo nyia jihatai. Alla awak obo alatai igalihina hullomuk, ijiara inyi luŋa ara ahegiamani jio hullomuk.

²⁷ Buo alla awak obo alatai igalihina hullomuk, ijiara inyi hétera apit hatai;

²⁸ ihuo Lonyi Tulo, linyia obeŋ 'to ottu jio oŋida aati igiamai jihonyi, ati igiamari buo fe isiaraniere esu honyi italahuniere aati arriai jio eyyata.”

Itaŋida Yesu Laŋodok Arrihai

²⁹ Ninyia itterie bo Yesu iko lejifak honyi afuatan addi to Yeriko, ette eluluŋ enne ittok ijifaru isi.

³⁰ Owoni nyia omuk laŋodok arrihai hinyia itoŋoi iger hikoi. Ninyia itaniŋuni isi jio Yesu ollo ottu tolia, ette isi iwuwoŋita jiojio, “Lettok, lonyi Dafide, omehinie jihohoi!”

³¹ Iŋerejanio nyia eluluŋ waati jihosi, ette iramana isi hotoduahinie. Ati ihumi nyiati buo isi ifudana ewuwoŋita bebe jiojio, “Lettok, Lonyi Dafide, omehinie jihohoi!”

³² Ania, ette Yesu iwotia, ette iloŋuna isi, ette jiaran, “Iwahata itai ani ehan anyio jihatai?”

³³ Itarraŋi nyia isi jiojio, “Lettok ijiara oŋite hohoi omijie!”

³⁴ Attati Yesu imehino jihosi, ette ittir oŋite hosi. Teya teya, ette isi imijio, ette ijifaru inyi.