Matteyo 2 - Ecorit Aŋejuk 2003

Atamonok Hullo Ofuonni 'to te Duoŋi Holoŋ

¹ Isiuni nyia Yesu ibore gala Betelehem atta fau Yudea, to oŋitek hunyia arari Erode Ahobu. Teya, ofuonni nyia omuk alofiorojok tetteduoŋi holoŋ many Yerusalem, ette ifiyo jiojio,

² “Tali olodole elle isiuni ahobu Yudei? Nyio, egonyu nyia hohoi elelef honyi ottu teduoŋi holoŋ; ania, efuanari hohoi itahabuyere inyi.”

³ Ninyia itaniŋu hobu Erode erre hunia, ette inyi iko aati 'daŋ hutto Yerusalem ihawwa.

⁴ Illilloŋu nyia inyi ehumak elettaha arabotie 'daŋ iko ettiyanak Ifahita, ette ifiyo isi jiojio, “Isioi adi Olonyimoto ajia?”

⁵ Itarraŋi nyia isi jiojio, “Ibore gala Betelehem ifau Yudea; ihuo ninyia igioroniere ekianani Hollum jio,

⁶ ‘Iyye Betelehem, atta fau Yuda, obiaŋara iyye emuta jio aborejin gala Yuda hunne ettaha 'to; nyio, tehiji hoi odetuno adi elettok ollo ottu 'to iyyahatio aati hoŋ, Israele.’ ”

⁷ Attati Erode iloŋuna alofiorojok hia jio ewwaha onno obeŋ tulo omijak, ette ihum ittittifuna jihosi jio, nyia baya oleyo elelef ania.

⁸ Attati inyi ifahina isi Betelehem, buo ihum iramana isi jiojio, “Ifuatta, ihumata ittittifuna leto lia. Elle inyurana itai inyi, ifuanna iramana nani, oŋida buo fe nani alo itahabuyere inyi.”

^9-10 Ninyia itaniŋuni isi ekiana hobu, ette isi ifuatan. Ojio ihiji ikoi, igonyuni nyia isi ahuan elelef ninyia igonyuni isi teduoŋi holoŋ, ette isi imuno bebe. Olo nyia elelef ania to osiere hosi duurr, many owotiari totto hide maji ninyia awanari olodole lia.

¹¹ Ninyia ajiŋani isi attua haji, ette isi igonyuna leto iko honyonyi Maria; ania, ette isi irigoŋi ifau itahabuyere inyi. Attati isi iŋanyuna esiorita hosi, ette isiarana jihonyi ayyel, ottogoŋ iko obo aŋallai onno oŋuo gir gir.

¹² Attati isi icaharu ifau hosi to obo ekoi hama; nyio, iramak nyia Hollum jihosi ta arigiai jio, hèlaha isi acaharai jio Erode.

Eluny Ifau Masir

¹³ Ninyia afuoi isi, oleyehino nyia ajilo olo Lamonye jio Yosefu, ette jiaran, “Odiotoi, ofuhorori leto alia iko honyonyi ifau Masir. Itoŋoi diya many eramaniere ni iyye; nyio, ottifia adi Erode leto alia ittohori inyi.”

¹⁴ Attati Yosefu idioto nyia 'tari, ette iyaru leto alia iko honyonyi ifau Masir,

¹⁵ ette itoŋo diya many oyeri Erode. Ara nyia eram ania ihuo nyia, itasiruniere ekiana ono Lamonye ninyia ikiana inyi te etuk ekianani honyi jio, “To Masir, eloŋ ni Lonyi hoŋ.”

Attohio ono Laduri

¹⁶ Ninyia amijak Erode jio, inyobi alofiorojok hia inyi, ette ataji honyi isuaharu, ette inyi ifahina eram oŋida ottohori aduri liawa hulla arai aŋasi hosi arrihai iko hullo homutari 'to 'daŋ, hutto Betelehem iko hutto onyihari honyi 'daŋ. Ihani nyia ihuo nyia, nyio, itaniŋu nyia inyi jio alofiorojok jio, aremehini aŋasi ihuo arrihai many to ninyia igonyunierek isi elelef.

¹⁷ Ania, itasiruno ekiana ninyia ikiana Yeremia ekianani Hollum jio,

¹⁸ “Itaniŋuno aturuk to Rama, aturuk ono atuari onno omi 'to bebe. Oyyoo Rakele aduri honyi; iha ikoddaŋ etadua, nyio, atuhoroi isi.”

Acohuno to Masir

¹⁹ Ninyia aye Erode, oleyehino nyia ajilo olo Lamonye jio Yosefu ta arigia ninyia howon inyi ifau Masir, ette jiaran,

²⁰ “Odiotoi, iyaru leto alia iko honyonyi; acahatti ifau Israele nyio, ayei aati hinyia awahi 'to ittohoro inyi.”

²¹ Ania, odiotori Yosefu, ette inyiaharu leto alia iko honyonyi many Israele.

²² Ati abaŋ nyia Yosefu icahari Yudea nyio, itaniŋu nyia inyi jio arutak Arkelos ahobu olo Yudea imaji monyonyi. Ania, ette inyi leten ifau Galilea ihuo inyiahi nyia iramana jihonyi ta arigiai;

²³ ette imanya ibore gala anna anya 'to Nasaret. Ania, itasirunierek erre hunyia ojiori ekianak Hollum jio, “Iloŋoi adi inyi a Nasaretanani.”