Marko 7 - Ecorit Aŋejuk 2003

Ettiyenita huno Hohonyiok

¹ Ofuonni nyia omuk Farisei iko ettiyanak ifahita to Yerusalem, ette ittubanio jio Yesu.

² Igonyuni nyia isi omuk lejifak Yesu oŋiye aŋiria hobeŋi ihumi ifinia. Obeŋi nyia lejifak hulia ihumi illilla ahas hosi ihuo awahi Farisei.

³ (Nyio, obeŋi nyia Farisei iko Yudei hullomuk 'daŋ, oremehini iŋiyo buo isi hobeŋi ihumi ifinia ahas hosi ihuo ojiori ettiyenita huno hohonyiok hosi.

⁴ Ittallihi nyia isi iŋiyo erre 'daŋ hunne iyaŋunie isi to suk hobeŋi illillai. Ijifatie nyia buo fe isi ettiyenita hunnomuk arriai hunyia ifuotuni isi, ihuo ewosio miolohien, ellillayo mocio iko arranyi.)

⁵ Ania, ette Farisei iko ettiyanak ifahita ifiyo Yesu jiojio, “Nyio omesie lejifak hoi ettiyenita hohonyiok hohoi? Nyio oŋiye isi ta ahas hunne iboti?”

⁶ Attati Yesu itarraŋ isi ojio, “Itai etihanak huattek hulo! Ottenu nyiadi Isaya to ninyia ikianari inyi eram Hollum tetai jiojio, ‘Ojio Hollum jio, itahabuye aati hulo ani te etuhe hosi, buo atajia hosi luŋa alamaji jihoŋ.

⁷ Itahabuye isi ani obojiai, nyio, ittiyenie isi efahita waati ihuo anna arai efahita hoŋ!’

⁸ “Idehina itai efahita Hollum buo igottiette ettiyenita waati.”

⁹ Ette Yesu inyiak jiaran jihosi jio, “Igigiloti itai jio ibisata itai te edehina hatai efahita Hollum buo igolihina kok kok jio ettiyenita hatai!

¹⁰ Nyio, iramak nyia Mose jio, ‘Abaŋa monyohoi iko honyohoi,’ buo ‘Atulo elle ittarrohojio 'to afure monyonyi, kuyya ono honyonyi, ijiara luŋa ottohori inyi.’

¹¹ Ihuania, owoni omuk hulatai iko omuk asaŋ iluahiere monyie hosi kuyya honyie hosi. Ati oliai isi jio, ‘Arai isi Korban’, (onno ojio 'to jio, arai isi ahuno Hollum).

¹² Tania, ittiyeniete itai jio, oŋida aŋatani isi obeŋi oluahierek monyie kuyya honyie hosi.

¹³ Te ekoi ania, itapuahi ettiyenita hunne ittiyeniete itai jio aati eram Hollum. Owoni buo fe erre arriai ihuo hunia hunne ihaniete itai.”

Erre hunne Itiboti 'to Atulo

¹⁴ Attati Yesu inyiak iloŋuna eluluŋ waati, ette jiaran jihosi jio, “Itai 'daŋ, itayiriete jihoŋ buo fe omijana jio,

¹⁵ obiaŋara ariŋ onno ojiŋa 'to totto hutuk tulo itibot inyi, ati ariŋ onno ojiŋu 'to totua tulo itibot inyi.

¹⁶ [Itayiriete, alla awoni ayyaha jihatai].”

¹⁷ Ninyia abusaru inyi eluluŋ waati ette ijiŋana itua haji, ifiye nyia lejifak honyi inyi oŋida iramak awoyo hiram ono etarriamai ania.

¹⁸ Buo inyi ette itarraŋ isi jiojio, “Ibiaŋata buo fe itai imijana ihuo aati hullomuk? Ibiaŋata itai imijana jio obeŋi erre hunno ojiŋari 'to attua tulo itiboti inyi.

¹⁹ Nyio, obeŋ inyi ojiŋak itua taji honyi, ati ojiŋak inyi itua hohe honyi, ette iculuna addi to huan.” (Ta ajiaran honyi erre hunia, itahutak inyi jio oyiji amat 'daŋ iŋiyere.)

²⁰ Attati inyi jiaran jio, “Erre hunno ojiŋuni 'to totua tulo, isi itiboti inyi.

²¹ Nyio, to tua iko to taji tulo ofuonni egigilita hunno orrohoji hunne iyarai 'to inyi ihaniere erre ihuo; erre somon, ahoho, attohoro tulo, aroto,

²² adaya, arrohojita, enyobio, asilara, ahaini, etarrohojo fureta waati, etadara, iko abiaŋan hou.

²³ Ofuonni erre hunno orrohoji 'to hunia 'daŋ to tua tulo, ette itibot inyi.”

Eruk ono obo Aŋotte

²⁴ Teya odioto nyia Yesu ette leten jio aŋati fau etteger borejin gala Taya iko Sidon, ette ijiŋana itua haji buo fe obeŋ awak obo atulo omijak jio awon inyi diya, ati ittallik nyia inyi idima.

²⁵ Owon nyia obo aŋotte diya ninyia owon ŋarri honyi iko aminiaŋati. Teya teya, ninyia itayiru inyi awanan Yesu, ette inyi ittuna, ette irigoŋo ihosiere honyi;

²⁶ ette ittana Yesu oŋida ifuha aminiaŋati ania addi jio ŋarri honyi. Ara nyia aŋotte ania ahono Grik, ta ŋati Fonisia atta fau Siria.

²⁷ Ati itarraŋ nyia Yesu inyi jio, “Hétanyata do aduri, nyio, obeŋ oyyu iruoŋoniere aŋiyo duri jio aŋohe.”

²⁸ Buo aŋotte ania ette itarraŋ ojio, “Aafe Lettok, ara duadi bu aŋohe hutto woyo 'teremeja, ihuhuroi buo fe isi ebenyiti ŋiria hunno oddoddouni 'to jio aduri.”

²⁹ Ania, ette Yesu jiaran jihonyi jio, “Te etarraŋi hoi ania otto icaharu haŋ. Irumak adi iyye aminiaŋati nyia alo addi jio ŋarri hoi!”

³⁰ Attati aŋotte ania leten haŋ, ette inyurana ŋarri honyi ofer iŋeref buo aminiaŋati nyia luŋa alo addi jihonyi.

Itaŋida Yesu obo Olottuho buo fe Ittallik Ikiana

³¹ Attati Yesu icaharu addi ta ŋati etteger Taya, ette leten totto Sidon iko totto ŋati Aborejin Gala Huna 'Tomon many itafar enne ittokon ono Galilea.

³² Otto omuk aati iyaŋuno jihonyi obo olottuho buo fe ittallik ikiana, ette ittana Yesu oŋida iyabak ahas honyi jio olottuho alia.

³³ Ania, ette Yesu iyaru inyi iger te iluluŋ, ette ittironia afiala honyi iyyaha atulo alia, ette imitana amilak, ette ittir aŋadief honyi.

³⁴ Attati Yesu ibonno ahide idou, ette iyiri hau, ette jiaran jihonyi, “Efata,” onno ojio 'to jio, “Aŋati!”

³⁵ Teya teya, ette ayyaha atulo alia iŋa, buo fe aŋadief honyi ette iwalaha ette inyi ikiana onno oyyu.

³⁶ Attati Yesu ihum iramana aati jio, hèlaha isi iramani eram ania jio obo atulo. Ati elle ihum inyi iramana isi ihuo nyia, inyiahi tibuo isi itisarrahina eram ania.

³⁷ Buo aati 'daŋ hunyia itayiruni 'to eram ania ette illilliha bebe ette jiaran, “Ihanio inyi erre 'daŋ onno oyyu! Ara duadi bu attuhok, itayirie; buo fe aati hulle iriatai aŋadiafa, ikianai!”