Marko 4 - Ecorit Aŋejuk 2003

Etarriamai ono Ayani Hinyomo

¹ Inyiak nyia Yesu itterio ettiyenio ihutuk tafar enne ittokon ono Galilea. Ottubanio nyia eluluŋ waati enne ittok iger honyi, ania ette inyi idahina itua togol, ette itoŋo diya. Owon nyia atogol ania itua hari, buo eluluŋ waati ilotifor hari.

² Iduhutta nyia inyi etarriamata ette ittiyeniere isi erre arriai, jiojio:

³ “Itayiriete! Olo nyia obo aromoni iyehina enyomo.

⁴ Ninyia ayehi inyi, ofodoŋonie nyia omuk ihiji ikoi, ette aheny ikukubuna isi.

⁵ Ofodoŋonie nyia omuk ihiji moruoi, amaji anna ahaharaŋi aboro, ette isi isuruna kokuak, nyio, ahaharaŋi nyia aboro diya.

⁶ Ninyia anok oloŋ, ette inyi isuahina ayyalaŋa himma hunia; nyio, obeŋi nyia aadde hosi ihumi irriomonio attua, ette isi iyohojoro.

⁷ Ofodoŋonie nyia buo fe omuk ihiji hikua, ette eekua ibolori, ette itabunara isi, ette ibiaŋan oŋijana emma.

⁸ Okuahinie nyia buo fe omuk jio aboro hunno oyiji 'to, ette isuruna, ette ibolori, ette isuaru, omuk atomuana hunihoi, buo omuk atamuana ille, buo fe omuk esiha abotie.”

⁹ Attati Yesu itisidonia ekiana honyi jiojio, “Itayiriete, alla awoni ayyaha jihatai!”

Nyio Ittiyenio Yesu te Etarriamata

¹⁰ Ninyia awon Yesu inyi hama, ette omuk aati hunyia itayiruni 'to inyi ifuanna iko lefahat jihonyi, ette ifiyo inyi oŋida iramak awoyo hiram ono etarriamata hunia.

¹¹ Itarraŋ inyi isi ojio, “Isiarani jihatai amijana hirre huno Olobie Hollum hunyia otimoi. Ati, iramani jio aati hutto 'let te etarriamata,

¹² jio oŋida, ‘Isi luŋa ihumi imijio, buo obeŋi igonyuni buo fe ihumi itayira, buo obeŋi itayiruni. Alla amijani duo isi ŋaduo isi iloiti atajia hosi jio Hollum, buo duo Hollum ette ihohina eyyata hosi.’ ”

Iramak Yesu ojio Etarriamai ono Ayani Hinyomo Anyio

¹³ Attati Yesu ifiyo isi ojio, “Itimoti itai ojio etarriamai ania anyio? Aŋai 'tadi imijana itai etarriamata hunnomuk 'daŋ?

¹⁴ Oyehi ayani hinyomo ekiana Hollum.

¹⁵ Arai omuk aati ihuo enyomo hunno ofodoŋonie 'to ihiji ikoi. Ninyia hètaniŋuni isi ekiana Hollum ihuania, ette Sittan ittuna, ette ikuararu eram ania.

¹⁶ Arai omuk aati ihuo enyomo hunno ofodoŋonie 'to ihiji moruoi. Ninyia itaniŋuni isi ekiana Hollum ihuania, ette isi ifuotuna inyi ta namuno.

¹⁷ Ati obeŋ inyi ihum idioro itajia hosi, buo fe obeŋ itoŋo diya fur. Ojiori ettigemita kuyya etahawwata ofuonni te eram ono Hollum, teya teya, ette isi ihara.

¹⁸ Buo omuk aati arai ihuo enyomo hunno oyehini ihiji hikua. Isi aati hulle itayiruni 'to ekiana Hollum,

¹⁹ ati obunaru inyi te ehawwata hosi hutta fau, ta amuno esamit, iko ta adaya hirre hunnomuk 'daŋ; ania obiaŋari inyi oŋijari.

²⁰ Ati arai omuk aati ihuo enyomo hunno oyehini jio aboro hunno oyiji 'to. Itayiruni isi ekiana Hollum, ette iruk, ette iŋijana eŋija: omuk atomuana hunihoi, omuk atomuana ille, buo omuk esiha abotie.”

Allomo enne Imuhoni ta Arrany

²¹ Ette Yesu jiaran jihosi jio, “Iyaŋuno soho obo atulo allomo ette imuhonia itua 'rany, kuyya ette ihanana iwoyo ŋeref, buo obeŋi oyihani ifilili?

²² Italeyehini adi erre 'daŋ hunyia idimani, buo fe asalani adi erre 'daŋ hunyia imuhoni.

²³ Itayiriete yo, alla awoni ayyaha jihatai!”

²⁴ Iramak nyia buo fe inyi jihosi jiojio, “Osiehina ayyaha jio erre hunne itayiriete itai! Ekemit enne ikiamaniere iyye obo ariŋ jio aati hullomuk, inyi adi buo fe onno okiamanierek jihoi, ette idellehina omuk diya.

²⁵ Nyio, jio atulo ollo owon 'to iko obo ariŋ, ofonihini adi arriai jihonyi. Buo jio atulo ollo obeŋ riŋ jihonyi, iduhari adi addi jihonyi ara duadi bu obo ariŋ kaiyo ollo owon jihonyi.”

Etarriamai ono Enyomoti Onno Obobolororo 'to

²⁶ Inyiak nyia Yesu ikikianaru ahosiere jiojio, “Ara Nolobie ono Hollum ihuo ana: Oyehi nyia obo atulo enyomo imana honyi.

²⁷ Oferio inyi ta attari, buo ohenyu ta afanni ette iddidaha, buo enyomo hunia isuruni ette ibobolororo. Ati otimo nyia inyi obobolororoi isi aŋai.

²⁸ Aboro hama itaboloruni buo fe itaŋijani emma hunia, tetteri isuruni, teya ette itturo ania ette ŋijana emma.

²⁹ Ninyia lado amana, ette atulo alia iduhuna ademi, ette idioŋo; nyio, alum nyia ayafa onno odioŋorik.

Etarriamai ono Aŋerio Cahai

³⁰ Attati Yesu jiaran jiojio, “Etarriamahi adi Nolobie Hollum iko anyio? Anani itarriamai adi enne etahutaniere inyi?

³¹ Ara inyi ihuo aŋerio cahai elle idulak obo latulo. Inyi emuta haŋer ta fau 'daŋ.

³² Buo ninyia isuru inyi ette ibolori ayyani enne ittok, ette isarana atanata hunne ittaha, buo aheny ette iduhonia asik hosi itua honyi.”

³³ Ittittoyo nyia Yesu eram Hollum jio aati te etarriamata ihuo hunia; iramata nyia inyi jihosi ihuo oremehini isi itayiruna.

³⁴ Obeŋ nyia inyi ittittoyo isi omuk erre arari fe te etarriamata hama. Buo alla awon inyi, inyi hama iko lejifak honyi, itahutatta nyia inyi jihosi erre 'daŋ.

Itawoj Yesu Addiŋilla

³⁵ Nyia otoriai to oloŋ nyia, ojio nyia Yesu jio lejifak honyi jio, “Hallaŋata aŋati tafar enne ittok tole.”

³⁶ Ania, ette lejifak idehina eluluŋ waati, ette idahina itogol ninyia awanari Yesu, ette ifuatan ikonyi. Owoni nyia buo fe omuk atogoli diya.

³⁷ Teya teya, ette oyyami enne ittok hutan, ette apoŋia poŋia hari ifoliahino itua togol many ojiari atogol efut ahari.

³⁸ Oferio nyia Yesu itua togol tettehalu buo ibalorok ahou honyi illuri. Attati lejifak honyi itaheny inyi, ette jiaran jihonyi, “Hettiyanani, ibeŋ iyye igigilo ta aye onno ottu 'to ana jihohoi?”

³⁹ Attati Yesu ihenyuna, ette iŋerejanio oyyami ania jiojio, “Oduai!” ette iramana apoŋia poŋia hari jiojio, “Owotiai dee!” Ette oyyami ania iwotia, ette ediofo 'daŋ iwotia dee.

⁴⁰ Attati Yesu jiaran jio lejifak honyi, “Ibaŋata itai anyio? Obeŋ eruk jihatai?”

⁴¹ Ati abaŋi nyia isi 'daŋ bebe, ette ikikiana isi hama jiojio, “Ŋai 'tadi olo? Ara duadi bu aari iko oyyami, oniŋie inyi!”