Marko 3 - Ecorit Aŋejuk 2003

Atulo ollo Oye Hani

¹ Ania, attati Yesu icaharu attua haji emojit ninyia awanari atulo ollo oye hani.

² Owoni nyia omuk aati diya hunyia awahi 'to itisiahina Yesu jio, ihanio inyi erre hunno orrohoji. Ania, ette isi ihum irriria inyi imijaniere kuyya itaŋida adi inyi atulo alia to oloŋ Sabatto.

³ Ette Yesu jiaran jio atulo ollo oye hani, “Waŋ dini.”

⁴ Attati Yesu ifiyo isi jio, “Anyio anna aŋatani efahita hohoi ihaniere to oloŋ Sabatto? Iluahiere kuyya ittarrohojiere? Italuahuniere atulo kuyya ittohori inyi?” Ati oduai nyia isi 'liŋ 'liŋ.

⁵ Attati Yesu mijio jihosi elle ijoria, ette ataji honyi imehino jihosi ta agolon hossi hosi, ette jiaran jio atulo lia, “Itabisak aani hoi.” Buo inyi ette itabisana, buo aani honyi ette inyiak iŋidari.

⁶ Attati Farisei fuatan addi to haji emojit, buo teya teya, ette isi iwwaha iko omuk lejifak Erode irumaniere ekoi ittohori Yesu.

Eluluŋ Waati otto Hutuk Tafar enne Ittokon

⁷ Olo nyia Yesu iko lejifak honyi itafar enne ittokon, buo eluluŋ waati enne ittok ette ijifaru inyi. Ofuonni nyia isi to Galilea, ta fau Yudea,

⁸ to Yerusalem, ta ŋati Idumea, ta ŋati fohor Yordano etteduoŋi holoŋ, to borejin gala Taya iko Sidon. Ofuonni nyia isi arriai jio Yesu nyio itayiruni nyia isi erre hunyia ihanio inyi.

⁹ Ania, ette Yesu iramana lejifak honyi oŋida iyaŋunie obo atogol jihonyi, nyio, ŋadi eluluŋ waati ottehini inyi.

¹⁰ Itaŋida nyia inyi aati arriai, many odulorik aŋuak 'daŋ efudaru ajihonyi jio oŋida bati isi ettir inyi.

¹¹ Ibatatie nyia aati miniaŋa ihosiere honyi elle igonyuni isi inyi buo ituruhoi jiojio, “Iyye Lonyi Hollum!”

¹² Ati ihum nyia Yesu iramana aminiaŋa hunia oŋida obeŋi iramani obo atulo jio ŋai inyi.

Onyimu Yesu Lefahat 'Tomon Harrihai

¹³ Attati Yesu leten ihide doŋe, ette iloŋuna jihonyi aati hinyia awak inyi. Ofuonni nyia isi jihonyi,

¹⁴ ette inyi inyimuna aati 'tomon harrihai hinyia ifurak inyi lefahat, ette iramana isi jiojio, “Anyimu ni itai oŋida iwanata ikoŋ. Efak adi ni itai ittittoyere.

¹⁵ Owon adi agolon jihatai ifuhatiere aminiaŋa.”

¹⁶ Aati 'tomon harrihai hinyia onyimu inyi hulo: Simone (linyia ifurak inyi Petro);

¹⁷ lonyirok Sebedeyo, Yakobo iko illanyi Yoane, (hinyia ifurak inyi Bonerges, onno ojio 'to jio, “Laati hilai”);

¹⁸ Andrea, Filipo, Bartolomeyo, Matteyo, Tomaso, Yakobo lonyi Alfeyo, Tadeyo, Simone alla anya 'to Silot

¹⁹ iko Yuda Iskariot etinyiaŋani Yesu.

Yesu iko Belsebul

²⁰ Attati Yesu leten haŋ, buo obo eluluŋ waati enne ittok ette inyiak ittubanio diya many obiaŋarak asaa inyi iko lejifak honyi iŋiyere

²¹ Ninyia itayiruni haŋ ba Yesu eram ania, ette isi ifuanna inefiere inyi, nyio, ojiori nyia aati jio, “Isita Inyi!”

²² Buo omuk ettiyanak Ifahita hinyia ofuonni 'to to Yerusalem ojiori jio, “Iniafatio Belsebul inyi! Hobu miniaŋa isiarak jihonyi aduaran ifuhatiere aminiaŋa.”

²³ Ania, ette Yesu iloŋuna isi ajihonyi, ette ikiana jihosi te etarriamata jiojio: “Aŋai oremik Sittan ifuhara addi Sittan?

²⁴ Elle ibibuanya afau aŋacio aŋacio hunno orriomonie, otturo adi afau nyia.

²⁵ Buo fe elle ibibuanya ahaŋ abotie, eluluŋi eluluŋi hunna aŋalafai, otturo adi ahaŋ nyia.

²⁶ Tania, elle ibibuanya olobie ono Sittan eluluŋi eluluŋi hunno orriomonie, ittallik adi inyi iwotia, otuhoro adi inyi, ette ilitohina.

²⁷ “Ittallik obo atulo ijiŋara ihaŋ olottir ihorori asaŋ honyi, buo hobeŋ ifit olottir alia, ŋati inyi ihalu oremik ibialaru asaŋ honyi.

²⁸ “Hode, eramak ni itai jio, ohohini adi eyyata waati 'daŋ iko erre arrohojak 'daŋ hunne ikenuni isi.

²⁹ Ati obeŋi adi ohohini eyyau tulo elle ittarrohojio 'to afure ono Loholio Olibo; nyio, iyyau inyi eyyau onno osio 'to 'tulaŋ.” (

³⁰ Ikiana nyia Yesu ihuo nyia, nyio, ojiori nyia omuk aati jio, “Owon aminiaŋati jihonyi!”)

Illarak Yesu iko Honyonyi

³¹ Attati illarak Yesu iko honyonyi ifanyan diya, ette iwotia illet, ette ifahina eram oŋida iloŋi inyi.

³² Itoŋo nyia eluluŋ waati iger honyi, ette isi jiaran jihonyi, “Honyohoi iko illarak hoi hutto 'let, awahi isi iyye.”

³³ Itarraŋ Yesu jio, “Ŋai iyaŋ? Ba ŋai illarak hoŋ?”

³⁴ Attati inyi mijio jio aati hunyia itoŋoi 'to iger honyi, ette jiaran, “Heyaŋ iko illarak hoŋ huna!

³⁵ Atulo elle ihanio 'to erre hunna awak Hollum, inyi illaŋ, inyi haniyoŋ, inyi iyaŋ.”