Marko 16 - Ecorit Aŋejuk 2003

Ebuhuna Toye

¹ Ninyia atuho oloŋ Sabatto, ette Maria Madalina iko Salome buo Maria honye Yakobo inyiaŋuno ariaa oŋida isi efuoi iyalana ihuan Yesu.

² Nyia motie berien to Dominika, ninyia iduoŋ oloŋ, ette isi iwany ilume.

^3-4 Ikikianarai nyia isi, isi hama jiojio, “Ŋai adi olo ifidihoro jihohoi amoruo ette ijiŋit ilume?” (Obolo nyia amoruo ania bebe.) Buo ninyia ibonnoi isi ahide, igonyuna nyia isi amoruo nyia ifidihori addi.

⁵ Ania, ette isi ijiŋara attua ilume, ette igonyuna lobo anyarhaluti itoŋo totto ŋati iŋet buo iyyafatio aboŋo aboŋ. Abaŋi nyia isi bebe.

⁶ Ati ojio nyia anyarhaluti alia jihosi jio, “Hèbaŋata, amijak ni ittifiati itai Yesu olo Nasaret linyia isihoni likruce. Labeŋ inyi tene. Itubuhuni inyi! Imijata amaji ana ninyia itaferihinierek inyi.

⁷ Ihuania, ifuatta iramana eram ana jio lejifak honyi iko jio Petro jio: ‘Lia, ikiomoro Galilea to osiere hatai. Ifuatta adi itai igonyuna inyi teya ihuo iramak nyia inyi itai.’ ”

⁸ Ania, ette isi ijiŋuna allet, ette iŋioron telume hunna abaŋi buo fe ijiriŋai. Obeŋi nyia isi iramani obo ariŋ jio obo atulo, nyio, abaŋi nyia isi. [

ETISIDI AMARUANI ONO ASAYYO HUNA Oleyehino Yesu jio Maria Madalina

⁹ Ninyia ibuhu Yesu toye nyia motie berien to Dominika, oleyehino nyia inyi do jio Maria Madalina, ninyia ifuhari addi jihonyi aminiaŋa hattarik. Ofuoi nyia aŋoruo hunia jio Petro iko lejifak hullomuk, ette iramana jihosi, te ekenita kaiyo, erre hunyia iramani jihosi.

¹⁰ Ette Maria leten, ette iramana orriahat Yesu hinyia ijiriŋai buo fe oyyooi. Ihalu erre huna, ette Yesu ta ahuan honyi, iramana eram ono etalahuna onno odua 'to buo fe osio 'tulaŋ imasik 'daŋ te etuhe hejifak honyi.]

¹¹ Buo ninyia itaniŋuni isi jio isu Yesu buo fe Maria Madalina igonyu inyi, obeŋi nyia isi iruhi eram ania.

Oleyehino Yesu jio Lejifak Honyi Arrihai

¹² Ihalu eram ania, oleyehino nyia Yesu jio lejifak honyi arrihai to obo ekoi hama, buo lejifak hulia ofuoi attua matta.

¹³ Ette isi icaharu, ette iramana lejifak hullomuk. Ati obeŋi nyia lejifak hullomuk hulia iruhi eram hosi.

Oleyehino Yesu jio Lejifak Honyi Hula 'Tomon Habotie

¹⁴ Ihalu erre hunia 'daŋ, oleyehino nyia Yesu jio lejifak honyi hula 'tomon habotie buo isi oŋiye, ette iŋerejanio jihosi. Nyio, ta abiaŋan ono eruk iko ta agolon hossi hosi, obeŋi nyia isi iruhi erre hunyia iramani aati hunyia igonyuni 'to Yesu elle isu.

¹⁵ Ette inyi jiaran jihosi, “Ifuatta afau 'daŋ, ittittoyete Asayyo Ayijok jio aati 'daŋ.

¹⁶ Italahuni adi lia, elle iruk 'to ette ifuotu batisimo. Ati, oŋotoni adi epali jio lia, ollo obeŋ 'to iruk.

¹⁷ Isiarani adi agolon jio eruhok ihaniere eduariti. Ifuhatie adi isi aminiaŋa ta afure hoŋ, buo fe ikianai te etuhe hunno olufaji.

¹⁸ Ittallihi adi iriafuna isi duadi bu iniafatie isi amunuok kuyya amati obo eyyeri. Iyabani adi isi ahas hosi jio aŋuak, ette itaŋida isi.”

Iyarai Yesu Lidou

¹⁹ Ninyia latuhok Yesu ekiana jihosi, ette ikafaru inyi idou, ette ititoŋonia iŋati iŋet Hollum.

²⁰ Attati lejifak ifuatan, ette ittittoyo imasik 'daŋ, buo Lamonye oluahio isi, buo fe itahutak jio obisi ettittotia hosi te ehanio hosi eduariti. Amen.] [