Marko 14 - Ecorit Aŋejuk 2003

Ewwahuna Ittohori Yesu

¹ Arasarai nyia oŋitek arrihai iyomori neyom ono Allaŋan iko ono emune onno obeŋ lobou. Ottifiai nyia ehumak elettaha iko ettiyanak ifahita obo ekoi inefuniere Yesu lit, ette ittohori.

² Ati ojiori nyia isi jio, “Hèlaha luŋa enefu inyi to oloŋ ono neyom, nyio ŋadi aati itaŋalafie hohoi.”

Iyalani Ariaa jio Yesu to Bore Gala Betani

³ Owon nyia Yesu ibore gala Betani ihaŋ Simone, latulo linyia oŋuai 'to iko aŋuai belelio. Ninyia hoŋiyo inyi, ojiŋu nyia obo aŋotte attua haji iko akarajaja riaa anna anya nardi, onno obeŋ iharrua iko obo ariŋ buo ogol te enyiaŋa, ette ibut akarajaja nyia, ette ijuhonia ariaa nyia ihou Yesu.

⁴ Iloŋojitai nyia omuk hulo aati hinyia owoni 'to diya, ette ikiana isi hama jio, “Nyio ittarrohojani ariaa ania ihuania?

⁵ Oremehini duo itinyiaŋara inyi ta arobiyaa arriai agalihini esiha hunihoi, ette isiarana arobiyaa hua jio alociaŋak!” Ania, ette isi iŋerejanio jio aŋotte ania.

⁶ Ati ojio nyia Yesu jihosi jio, “Obusana inyi dee! Nyio ittigemiete itai inyi? Ihan inyi ariŋ enne ilaman jihoŋ.

⁷ Odulori adi alociaŋak awanan ikatai, iremehina adi itai iluak isi elle iwahata itai. Ati abeŋ adi ni adulo awanan ikatai.

⁸ Ihan aŋotte ania ihuo oremik inyi ihan. Ijuhok inyi ariaa ania ihuan hoŋ, ihuhumaniere inyi hobeŋ asaa onno onuhanierek inyi afany.

⁹ Ihuania, eramak ni itai hode jio, jio amasik 'daŋ hutta fau hunne ittittoyerek Asayyo Ayijok, iramani adi buo fe ariŋ enne ihan aŋotte ania, igiluttari inyi.”

Iruk Yuda Etinyiaŋara Yesu

¹⁰ Attati Yuda Iskariot, obo olo lejifak hula 'tomon harrihai, leten jio ehumak elettaha itinyiaŋaniere Yesu jihosi.

¹¹ Omunoi nyia ehumak elettaha bebe ninyia itaniŋuni isi ekenita honyi, ette buo fe icoronia isiaraniere inyi arobiyaa. Ania, ette Yuda ittifia obo ekoi onno oyyu itinyiaŋaniere Yesu jihosi.

Oŋiyo Yesu Aŋiyo ono Allaŋan iko Lejifak Honyi

¹² Iholoŋ etteri ono Neyom ono Emune onno obeŋ lobou, oloŋ onno oŋocierek olosobio hullo oŋiyerek aŋiria ono neyom ono Allaŋan, ifiye nyia lejifak Yesu jio, “Iwak ati iyye hohoi efuo ihuhumana jihoi aŋiria ono Allaŋan jio anani maji?”

¹³ Attati Yesu ifahina omuk lejifak honyi arrihai, buo iramak isi ekenita huna: “Ifuatta jio abore gala nyia. Oruaŋanio adi obo latulo ikatai, elle iwohuno aari ta atobok. Ijifatti inyi

¹⁴ many jio ahaŋ onno ojiŋaniere inyi. Ijiatta jio lamonye haŋ jio; ‘Ojio ettiyanani jio, tani aaji tamonok anna alari inyi iko lejifak honyi iŋiyere aŋiyo ono Allaŋan?’

¹⁵ Itahutak adi inyi jihatai atua haji anna alat otto amara, buo owon iko erre 'daŋ hunne ehuhumanie. Ihuhumana erre 'daŋ jihohoi diya.”

¹⁶ Ofuoi nyia lejifak hia many itua bore gala nyia, ette irumana erre 'daŋ ihuo iramak duo inyi isi; ette isi ihuhumana aŋiyo ono Allaŋan diya.

¹⁷ Ninyia ara akekai, otto Yesu ittuna iko lejifak hula 'tomon harrihai.

¹⁸ Buo ninyia hoŋiye isi itteremeja, ette Yesu jiaran, “Hode, eramak ni itai jio itinyiaŋak adi obo alatai nani, obo elle eŋiyo 'to ikoŋ.”

¹⁹ Ijiriŋai nyia lejifak hulia, ette itterio efiyo inyi 'daŋ ababo jiojio, “Ani ati?”

²⁰ Itarraŋ Yesu ojio, “Inyi obo jihatai hula 'tomon harrihai hulo, lia elle edutu 'to ikoŋ emune arabotie to 'rany.

²¹ Oye adi Lonyi Tulo ihuo igioroni nyia tenyi Ibuk Hollum. Ati orroho adi bebe jio atulo elle itinyiaŋak 'to Lonyi Tulo! Osiru obeŋi nyia luŋa isiuni inyi!”

Aŋiyo ono Lamonye

²² Ninyia hoŋiye isi, iduhu nyia Yesu emune, ette isiarana ahumo, ette ibeny inyi, ette isiarana jio lejifak honyi, ette jiaran, “Hibetina, ahuan hoŋ ana.”

²³ Attati inyi buo fe iduhuna ematit, ette isio ahumo jio Hollum, ette isiarana jihosi, buo isi 'daŋ ababo ette imat inyi.

²⁴ Buo Yesu ette jiaran jihosi, “nooto hoŋ ana, ono ecorit aŋejuk, onno owouno 'to te eram waati arriai.

²⁵ Ahode, eramak ni itai jio, abeŋ adi ni enyiak imat afino ana, many iholoŋ anna amatari ni afino aŋejuk Ilobie Hollum.”

²⁶ Attati isi idol afure etahabui Hollum, ette ifuatan idoŋe Olifet.

Ikilu Yesu Arisa Petro Inyi

²⁷ Ojio nyia Yesu jihosi, “Ifuhoroti adi itai 'daŋ addi, ittata idiaharu ani, nyio, igioroni nyia ibuk Hollum jio, ‘Ottoho adi Hollum eyyahani, buo akioro 'daŋ ette adi isarrara.’

²⁸ Ati, elle itubuhuni nani, ekiomoro adi ni Galilea to osiere hatai.”

²⁹ Ati itarraŋ nyia Petro ojio, “Ettallik adi ni idiaharu iyye, duadi bu ofuhororoi hullomuk 'daŋ addi!”

³⁰ Buo Yesu ette jiaran jihonyi, “Hode, eramak ni iyye jio, irisa adi iyye ani arue ana ahana enyiahita hunihoi, hobeŋ ahohoro illok enyiahita arrihai.”

³¹ Ati ihum Petro inyiak ikiana onno ogol bebe jiojio, “Ettallik ni luŋa irisa iyye, duadi bu luŋa ojiori ottohori ani ikoye!” Ojiori nyia buo fe lejifak hullomuk 'daŋ ihuo nyia.

Omojo Yesu Liginana Jessemani

³² Attati isi ifuatan jio obo amaji anna anya Jessemani, attati Yesu iramana lejifak honyi jio, “Itoŋoti dini, buo ni amojo.”

³³ Iyaru nyia inyi Petro iko Yakobo buo Yoane. Obolo nyia bebe ejiriŋa iko amijan taji jihonyi,

³⁴ ette inti jiaran jihosi, “Obolo amijan taji jihoŋ bebe ihuo ejio nani ettoho. Itoŋoti dini, oduloro amijio.”

³⁵ Ihut inyi alamarai kai, ette irruaŋana ahuan honyi ifau, ette imojo jio, kuyya ollo oremik, hèlaha duo asaa ono ettigemio ania ottu jihonyi.

³⁶ Omojo nyia inyi jiojio, “Baba, Monyoŋ, iremik iyye ihanio erre 'daŋ. Iyai addi jihoŋ ematit ono ettigemio ana. Ati, obiaŋara awahan hoŋ, ati hétera ihuo iwak iyye.”

³⁷ Attati inyi icohuno, ette irumana lejifak honyi hula hunihoi ajotoroi, ette inyi ifiyo Petro ojio, “Simone, ijototi itai? Ittallihoto itai imijio ara duadi bu asaa abotie?

³⁸ Ihumata mijio, omojoti jio, hèlaha itai imuahata jio esusuta. Oyiji egigilita hatai, ati ibiaŋata itai igoloto nyio, irata itai awaati.”

³⁹ Inyiak inyi icaharu imojori, ette idasio emojiti hoduo omojori inyi.

⁴⁰ Ninyia inyiak inyi icohuno jihosi, orumak nyia inyi isi ajotoroi, nyio, ittigemie nyia aajo isi bebe, many otimorik isi ejio adi isi anyio jio Yesu.

⁴¹ Ninyia lacohuno inyi enyiahi etahunihi, ojio nyia inyi jihosi, “Hèrasati fe itai ijoto buo fe iyiriata? Aremik! Attuba asaa enne isiaraniere Lonyi Tulo ihas waati eyyak.

⁴² Ottenna, efuo. Imijata etinyiaŋani hoŋ olo!”

Enefuna ono Yesu

⁴³ Teya teya, ninyia hekiana Yesu, afany nyia Yuda, lobo olo lejifak hula 'tomon harrihai. Ottu nyia inyi iko eluluŋ waati hunyia irumuni 'to iko ademio erremiti buo eluhi. Ehumak elettaha iko ettiyanak ifahita buo lahou nyia ifahuni isi.

⁴⁴ Iramak nyia etinyiaŋani jihosi etamijani jio, “Atulo elle efony ni ta ahucio 'yaha, inefuna inyi, inyiamatti inyi addi, buo ihumata irriria.”

⁴⁵ Teya teya, ninyia afany Yuda, obotik nyia inyi jio Yesu, ette jiaran, “Hettiyanani!” ette ifony inyi ta ahucio 'yaha.

⁴⁶ Ania, ette isi inefuna Yesu cok, ette iyaru.

⁴⁷ Attati obo latulo jio aati hinyia owotia 'to diya isutuna ademi honyi, ette isaluna tub eyyok ono apit olo ehumani elle ittokon.

⁴⁸ Attati Yesu ifiyo isi jio, “Osiru jihatai irumuniere iko ademio erremiti buo eluhi inefuniere ani, ihuo ara ni olohoho?

⁴⁹ Oŋitek 'daŋ awattatio nyia ni ikatai buo fe ettiyanatio Ihaji emojit enne ittokon, buo itai ibiaŋata inefuna nani. Ati ijiara luŋa itasiruni egierita hutto Buk Hollum.”

⁵⁰ Ania, attati lejifak honyi 'daŋ idiaharai inyi, ette ifuhororo.

⁵¹ Ijifaru nyia obo anyarhaluti Yesu. Iyyafatio nyia inyi obo aboŋo elle igarawa ihuan honyi. Awahi nyia isi inefuna inyi,

⁵² ania, ette inyi ifuhororo aŋaturoi buo idiaharu aboŋo lia diya.

Itawojie Yesu Ilokikoi Yudei

⁵³ Iniafarai nyia isi Yesu ihaŋ ehumani elle ittokon, amaji ninyia ottubarik ehumak elettaha iko lahou buo ettiyanak ifahita.

⁵⁴ Ijifaru nyia Petro Yesu alamarai, many ihiloŋoni ehumani elle ittokon, ette inosonio isujari eema iko erririak.

⁵⁵ Tania, ottifiai nyia ehumak elettaha iko aati lokikoi Yudei 'daŋ, omuk erre itisiahiniere Yesu oŋida ottohori inyi, ati obeŋi nyia isi onyurani obo.

⁵⁶ Oluaji nyia asuuti hunyia orosoni 'to erre arriai jio Yesu, ati abahasai nyia erositi hosi.

⁵⁷ Attati omuk aati idioto, ette irosonia erre huna jio Yesu:

⁵⁸ “Etayiru nyia hohoi inyi ojio jio, ‘Etattur adi ni Aaji emojit enne ittokon ana ninyia oduhoni aati ania, buo ihalu oŋitek hunihoi enyiak iduhonia obo onno obiaŋara aati oduhi.’ ”

⁵⁹ Ara duadi bu erositi hosi hunia, abahasai nyia isi 'daŋ.

⁶⁰ Odioto nyia ehumani elle ittokon ihosiere hosi 'daŋ, ette ifiyo Yesu jio, “Ibeŋ iyye iwon iko obo ekiana itarraŋiere etisiahita hosi hunia?”

⁶¹ Ati oduahino nyia Yesu 'liŋ 'liŋ obeŋ ikenu obo eram. Buo ehumani elle ittokon inyiak ifiyo inyi ojio, “Iyye Olonyimoto, Lonyi Hollum, Hollum elle itahabuye?”

⁶² Itarraŋ Yesu ojio, “Aafe: igonyuna adi itai Lonyi Tulo itoŋo ihani iŋet ono Laduarani. Igonyuna adi buo fe itai inyi osuu te edohuo hutteduo!”

⁶³ Tania, igiguas nyia ehumani elle ittokon aboŋo honyi, ette jiaran, “Anyio suuti hulle enyiak iwahan?

⁶⁴ Itaniŋuna itai inyi ittarrohojio afure Hollum. Igigiloti itai anyio?” Oŋoti nyia isi 'daŋ eram Yesu, ette jiaran ijiara ottohori inyi.

⁶⁵ Itterie nyia omuk hulosi amitata amilak jihonyi buo fe atarani aboŋo ihomom honyi, ette ibak inyi buo ojiori jio, “Ottenu ŋai abak iyye?” Iyarai nyia buo fe erririak inyi ette innaŋio.

Arisa Petro Yesu

⁶⁶ Ninyia harasa Petro iwor, ihiloŋoni, ottu nyia nobo ono egiamak hehumani elle ittokon diya.

⁶⁷ Buo ninyia igonyu inyi Petro osuja eema, ette inyi iyohojonia jihonyi 'tok 'tok, ette jiaran, “Iwon nyia buo fe iyye iko Yesu a Nasaretanani.”

⁶⁸ Ati orisa nyia Petro jiojio, “Atimo ni erre hunne ikiana iyye hunia,” ette Petro ikoddaŋ ijiŋara allet attany ekat haŋ. Teya teya, ette ahohoro illok.

⁶⁹ Inyiak nyia egiamani nyia igonyuna Petro, ette fe inyiak itterio edasio ekiana jio aati hinyia owotiai 'to diya jiojio, “Obo olosi alia!”

⁷⁰ Ati inyiak nyia Petro irisa eram ania. Ojio gaa kai, inyiahi aati hunyia owotiai 'to diya jiaran jio Petro jio, “Hode hode, ira iyye aholosi, nyio, ira iyye a Galileatanani.”

⁷¹ Attati Petro itterio ettuŋo jiojio, “'Tuŋ, ekiana ni ahode hode! Ijiara Hollum ottoho ani elle enyobio ni! Atimo ni atulo elle ikianati itai alia!”

⁷² Teya teya, ette ahohoro inyiak illok enyiahi etarrihi. Attati Petro igiluna ekiana ninyia iramak Yesu jihonyi jio, “Hobeŋ ahohoro illok enyiahita arrihai, irisa adi iyye ani enyiahita hunihoi.” Ania, ette ahuan Petro ilihuna, ette inyi ikoddaŋ iyyoo.