Marko 13 - Ecorit Aŋejuk 2003

Ikiana Yesu te Etatturio Haji Emojit enne Ittokon

¹ Ninyia hojiŋu Yesu to tua Haji emojit enne ittokon, ette obo olo lejifak jiaran jihonyi jio, “Hettiyanani, imijie! Ilamani amoruoi iko asik hunia bebe.”

² Itarraŋ Yesu inyi ojio, “Igonyu iyye asik hunne ettaha 'to hunia? Obeŋ adi obo amoruo dinia arasa idellia ihide obo. Ikukuri adi isi 'daŋ sar sar.”

Arrohojita iko Ettigemita

³ Ninyia itoŋori Yesu idoŋe Olifet, totto ŋati anna attany 'to Ahaji emojit enne ittokon, ofuonni nyia Petro iko Yakobo iko Yoane buo Andrea jihonyi isi hama,

⁴ ette ifiyo inyi jiojio, “Iramak hohoi, ofuonni adi erre hunia baya? Anyio itamijani adi enne itahutak 'to jio attuba asaa onno ofuarik erre hunia 'daŋ iduoŋ?”

⁵ Itarraŋ nyia Yesu isi jiojio, “Ihumata mijio, hèlaha obo atulo itisiaba itai.

⁶ Ofuonni adi aati arriai hulle ikianai ihuo alla arai isi ani. Ojiori adi isi jio, ‘Ani inyi!’ Itisiabari adi isi aati arriai.

⁷ Buo elle itaniŋuna itai jio owon afere, buo eram ojiori ono arem, hèlafuhoti. Iduoŋi adi erre hunia luŋa, ati obeŋi isi itahutani jio attu esidi fau.

⁸ Orriomonie adi afau iko afau, buo fe obuore iko obuore. Iboŋ adi olokitik iko ahure amasik 'daŋ. Arai erre hunia 'daŋ ihuo etteri honya hohe ŋotte onno ojio 'to esio.

⁹ “Itai ta ahuattek hatai, ihumata imijio. Inefuni adi itai, ette iyaru ilokikoi. Abahie adi itai ihasik Imojiti. Ifuatta adi itai iwotia ihosiere lettaha iko hobuok te eram hoŋ, buo fe iramaniere jihosi Asayyo Ayijok.

¹⁰ Ati, oŋida do luŋa ittittoye Asayyo Ayijok jio aati 'daŋ hutta fau.

¹¹ Buo elle inefuni itai, ette iyaru ilokikoi, hèlafuhoti do jio, anyio adi enne ifuatta itai ikiana. Ati ikianati erre hunne isiori adi jihatai jio asaa nyia. Nyio, obiaŋara adi itai ifuatta ikiana, ati Loholio Olibo adi ikiana.

¹² Itinefuni adi ellarak illarak oŋida ottohori, buo fe monyie itinefuni aduri hosi oŋida ottohori. Oyitonie adi aduri esiok hosi, ette itattohoro.

¹³ Oliwarik adi aati 'daŋ itai te eram hoŋ. Ati italuahuni adi lia ollo odihu 'to many isidi.

Arrohoji anna Aŋari enne Itabaŋio 'to

¹⁴ “Igonyuna adi itai ‘Arrohoji anna aŋari enne itabaŋio 'to’ owotia jio amaji onno obeŋ osiru jihonyi iwattari.” (Ijiara ehianani omijak awoyo hiram ono ekiana ana!) “Tania, ijiara hullo owoni 'to Yudea hotofuhohi itua doŋiok.

¹⁵ Ijiara lia, ollo owon 'to ihide haji, hotobiaŋa ollu ifau, iduhuniere obo ariŋ addi to tua haji.

¹⁶ Ijiara buo fe lia, ollo owon 'to imana, hotobiaŋa luŋa acaharu haŋ iyamari aboŋo honyi.

¹⁷ Orroho adi bebe to oŋitek hua jio aŋoruo ayedurok iko etadasak.

¹⁸ Omojoti jio Hollum oŋida erre huna obeŋi iduoŋi to ayafajin hacoro!

¹⁹ Nyio, agalik adi arrohoji ono ettigemita huno oŋitek hua, ettigemita 'daŋ hunyia iduoŋi 'to tetteri ninyia hoyyeu Hollum afau, many iko ahana. Obeŋ adi obo ariŋ inyiak irahan ihuo nyia.

²⁰ Ati alla abeŋ nyia Lamonye oŋuto addi omuk jio oŋitek hua, obeŋ duo tulo ofituno. Ati te eram ono olonyimot honyi, hinyia onyimu inyi, aŋuto inyi omuk oŋitek addi.

²¹ “Tania, alla ajio obo jihatai, ‘imijiete, Olonyimoto olo dini!’ kuyya, ‘imijiete fe lia!’ hèruhoto.

²² Nyio, ofuonni adi olonyimot enyabak iko ekianak enyabak hullo ojiori 'to jio, ekiana isi eram Hollum. Ihanie adi isi eduariti iko ellillihita inyobiere ara duadi bu olonyimot Hollum.

²³ Ihumata irriria! Nyio, eramak nyia ni itai erre hunia hobeŋi isi iduoŋi.

Attuna Lonyi Tulo

²⁴ “Ihalu oŋitek huno ettigemita hua, itayei adi oloŋ, obeŋ adi ayafa inyiak ibuaran.

²⁵ Okuahunie adi elelefi tedou buo fe erre 'daŋ huttedou ette ittanniŋa.

²⁶ Tania, igonyuni adi isi Lonyi Tulo ottu te dohuo, ta agolon onno obolo iko ta akuatan.

²⁷ Ifak adi inyi ajilohien jio aguli aŋuan huno afau, ittuttubuniere aati olonyimot Hollum, tesidi fau obotie many jio onnobo.

Ettiyenuna jio Ayyani Ŋaboli

²⁸ “Ittiyenuna jio ayyani ŋaboli. Alla ayitoi atanata honyi egaraa buo abene itterie ayisuno, omijana jio iliaha atahas.

²⁹ Ihuo nyia buo fe, elle igonyuna itai erre huna 'daŋ iduoŋi, imijana adi jio iliaha inyi luŋa attuna.

³⁰ Hode, eramak ni itai jio, iduoŋi adi erre hunia 'daŋ hobeŋi aati hulo ahana otuhoroi.

³¹ Olitohini adi edou iko afau muluyaŋ, ati obeŋi adi ekenita hoŋ olitohini.

Obeŋ Tulo Omijak Noloŋ nyia Kuyya Nasaa nyia

³² “Ati obeŋ tulo omijak iduoŋ adi noloŋ nyia kuyya nasaa nyia baya, ara duadi bu ajilohien huttedou kuyya Lonyi, arari fe Monye hama.

³³ Ihumata irriria, ihumata mijio, nyio, ibiaŋata itai imijana afany adi nasaa nyia baya.

³⁴ Ara adi inyi ihuo atulo ollo olo 'to jio obo amaji, buo idiaharu ahaŋ honyi jio egiamak honyi oŋida omijie. Ninyia atuhok inyi ehiharana jihosi egemita hosi 'daŋ ababo, iramaru nyia buo fe inyi erririani hikat oŋida ihum irriria.

³⁵ Ihuania, ihumatati imijio, nyio, ibiaŋata itai imijana ottu adi lamonye haŋ baya; ta akekai, kuyya ta attiŋ harue, kuyya ta ataŋatio motie, kuyya ta amotie.

³⁶ Alla attu inyi turunyaŋ ihuo nyia, hèlaha inyi luŋa onyurak itai ijototi.

³⁷ Ekiana ni jihatai, erre hunne ekiana ni jio aati 'daŋ: Ihumata mijio!”