Marko 11 - Ecorit Aŋejuk 2003

Ajiŋana Yesu Yerusalem

¹ Ninyia iliahai isi Yerusalem, iger Besfeji iko Betani, hutteger doŋe Olifet, ette Yesu ifahina lejifak honyi arrihai ahosiere,

² buo iramak isi jiojio, “Ifuatta itua miji otto hosiere hatai nyia. Teya teya, héjiŋana itai diya ihuania, inyurana adi itai aŋarri sigiria atara diya, onno hobeŋ tulo adahari. Ohouniete inyi, iyaŋuniete dini.

³ Elle ifiyo obo atulo itai jio, ‘Nyio ihaniete itai ariŋ ania?’ Iramana inyi jio, ‘Awak Lamonye inyi, ati inyiahunie adi inyi kokuak.’ ”

⁴ Ania, ette isi ifuatan ette irumana aŋarri sigiria ilofirik anna atarani ikat haŋ. Ninyia hohoye isi inyi ihuania,

⁵ ette aati hunyia owotiai 'to diya ifiyo isi jiojio, “Nyio ihoyete itai aŋarri sigiria ania?”

⁶ Attati isi itarraŋ ihuo iramak duo Yesu isi, buo aati hia ette iŋatana isi ofuoi.

⁷ Attati isi iyaŋuno aŋarri sigiria nyia jio Yesu, ette ifiatana aboŋojin hosi ihoruoŋ honyi, buo Yesu ette idahina ihide honyi.

⁸ Ofiatani nyia aati arriai aboŋojin hosi ihikoi, buo omuk aratani abene hunyia ogiluni isi to tua matta.

⁹ Attati aati hunyia ofuoi 'to to osiere iko hunyia adahai 'to te ehalu iwuwoŋita jiojio, “Hétahabuyete Hollum! Hotomunoi lia, ollo ottu 'to ta afure ono Lamonye!

¹⁰ Hotokuata Olobie onno ottu 'to, ono monye hohoi Dafide! Hétahabuyete Hollum!”

¹¹ Ninyia afany Yesu Yerusalem, ojiŋak nyia inyi itua Haji emojit enne ittokon, ette iher erre 'daŋ. Ati, iliaha nyia attari, ette inyi leten Betani iko lejifak honyi hula 'tomon harrihai.

Ipitak Yesu obo Aŋaboli

¹² Jio ebotie holoŋ, ninyia acohunie isi to Betani, oniama nyia Yesu.

¹³ Ninyia igonyu inyi alamarai obo aŋaboli iko abene arriai, ania ette inyi leten imijio, kuyya alla aremik adi inyi irumana omuk aŋabolo diya. Ati ninyia afany inyi iwoyo honyi, obeŋ nyia inyi orumak obo ariŋ arari abene hama, nyio, obiaŋara nyia ayafa onno oŋijarik aŋabolo ania.

¹⁴ Attati inyi jiaran jio aŋoboli ania, “Ijiara obo atulo hotobiaŋa inyiak ideuna omuk eŋija jihoi 'tulaŋ!” Itayiruni lejifak honyi ekiana honyi.

Aleten Yesu Itua Haji Emojit enne Ittokon

¹⁵ Ninyia afanyi isi Yerusalem, olo nyia Yesu itua Haji Emojit enne ittokon, ette itterio efuhatio apocok 'daŋ iko enyiaŋak addi, ette itidelliara atteremejahien huno etattobok gurusi iko etoŋita huno etinyiaŋak amami.

¹⁶ Ati obeŋ nyia inyi aŋatak obo atulo akafaru obo ariŋ totto hiloŋoni Haji Emojit enne ittokon.

¹⁷ Attati inyi ittiyenio aati jiojio, “Igioroni nyia Libuk Hollum jio, ojio Hollum, ‘Iloŋoi adi aaji hoŋ, aaji emojit ono aati 'daŋ hutta fau.’ Ati iloitoto itai inyi ahinom hahalak!”

¹⁸ Ninyia itayiruni ehumak elettaha iko ettiyanak ifahita erre huna, ette isi ittifia obo ekoi ittohori inyi. Ati abaŋi nyia isi inyi, nyio, illillihai nyia aati 'daŋ ettiyenita honyi.

¹⁹ Ninyia ara akekai ette Yesu iko lejifak honyi ifuatan addi to tua abore gala ania.

Ettiyenuna jio Ayyani Ŋaboli

²⁰ To ninyia ofuarik isi te ehiji ikoi nyia motie hanyik, igonyuni nyia isi ayyani ŋaboli nyia aye many ihadde.

²¹ Iyiyiu nyia Petro erre hunyia iduoŋi 'to, ette jiaran jio Yesu, “Hettiyanani, imija! Aye ayyani ŋaboli oŋole ipitak iyye!”

²² Itarraŋ Yesu isi jio, “Awanata iko eruk jio Hollum.

²³ Hode, eramak ni itai, alla ajio obo jio adoŋe ana ‘Odiotoi, orruaŋak ahuan hoi itua hari enne ittokon,’ buo obeŋ okuaya itua taji honyi, ati iruk inyi jio iduoŋi adi hode erre hunno ojio inyi, ihani adi erre hunia jihonyi.

²⁴ Tania, eramak ni itai, ifuotuna adi itai erre 'daŋ hunne ifiyete itai ta amojo, elle iruhoto itai jio ifuotuna itai isi.

²⁵ Elle idioto iyye, itte imojo buo imijak jio owon eram hoi iko obo atulo, idehi eram nyia, oŋida buo fe Monyohoi ettedou idehi eyyata hoi.

²⁶ [Elle ibiaŋata itai idehina eyyata waati hullomuk, obeŋ adi buo fe Monyatai ettedou idehi eyyata hatai.]”

Eram ono Elohittok Yesu

²⁷ Inyiahi nyia isi icohuno Yerusalem. Ofuonni nyia ehumak elettaha iko ettiyanak ifahita buo lahou jio Yesu to ninyia ilattari inyi itua Haji emojit enne ittokon,

²⁸ ette ifiyo inyi jiojio, “Ta anani ilohittok ihanio iyye erre hunia? Kuyya ŋai isio jihoi elohittok ihaniere isi?”

²⁹ Itarraŋ nyia Yesu isi ojio, “Efiyo ni itai, itarraŋata ani, eramak adi buo fe ni itai ta anani elohittok enne ehaniere ni erre hunia.

³⁰ Iramana ani, ottu nyia elohittok ono Yoane tai itifuociere batisimo, jio Hollum kuyya jio aati?”

³¹ Attati isi itarisa isi hama jiojio, “Elle ejio ‘Jio Hollum,’ itarraŋ adi inyi jio, ‘Nyio nyiati ibiaŋata itai iruhoto eram Yoane?’

³² Ati elle ejio ‘Jio aati…’ ” (Abaŋi nyia isi aati, nyio, iruhi nyia aati 'daŋ jio ara nyia Yoane ahekianani Hollum.)

³³ Ania, itarraŋierek isi Yesu jiojio, “Etimo hohoi.” Buo Yesu ette jiaran jihosi, “Abeŋ adi buo fe ni eramak jihatai ta anani elohittok enne ehaniere ni erre hunia.”