Luka 19 - Ecorit Aŋejuk 2003

Yesu iko Sakeyos

¹ Ojiŋak nyia Yesu Yeriko ette iŋutoro tolia.

² Owon nyia obo atulo diya afure honyi Sakeyos. Ara nyia inyi ahèddudduhani musuru elettok buo fe a sam.

³ Awak nyia inyi igonyuna Yesu, ati ta asuhon honyi buo fe ta aluaji waati, ittallik nyia inyi igonyuna Yesu.

⁴ Ania, ette inyi iŋioron ahosiere iluluŋ, ette idahina ihide bule igonyuniere Yesu linyia olo 'to ittuna tolia.

⁵ Ninyia afany Yesu jio amaji ania, ibonno nyia inyi ahide 'yani, ette jiaran jihonyi, “Sakeyos, isuru kokuak, nyio, ahana alo ni luŋa itoŋo ihaŋ hoi.”

⁶ Ania, ette Sakeyos isuruna kokuak, ette irraŋuna inyi ta amuno.

⁷ Iŋuŋunitai nyia aati 'daŋ hunyia igonyuni 'to eram ana jiojio, “Alo atulo olo irahan atamononi ihaŋ tulo leyyani!”

⁸ Attati Sakeyos idioto, ette jiaran jio Lamonye, “Lettok, itayirie! Esiarak adi ni anus hirre hoŋ jio alociaŋak, buo elle emumun ni obo atulo, aduma adi ni enyiahita aŋuan.”

⁹ Buo Yesu ette jiaran jihonyi, “Ahana, afany etalahuno jio ahaŋ ana, nyio ara atulo olo buo fe alonyi Abramo.

¹⁰ Nyio, ottu Lonyi Tulo ittifiari iko italahuniere aati hullo olitohini 'to.”

Etarriamai ono Agurusi Ayyeli

¹¹ Ninyia hétaniŋie aati ekiana ana, so so Yesu iramana isi obo etarriamai, nyio, iliaha nyia inyi Yerusalem buo fe aati igigiloi jio alo adi Olobie ono Hollum iduoŋ teya teya.

¹² Ania, ette inyi jiaran, “Olo nyia obo elettok jio obo afau anna alama ifuotuniere nelohobu attati icohuno.

¹³ Ette inyi iloŋuna egiamak honyi 'tomon, ette isiarana jihosi agurusi 'yeli 'tomon, ette jiaran jihosi, ‘Opocotti isi many acohuniere ni.’

¹⁴ Ati ihari nyia aati hutto miji hosi inyi, ette isi ifahina omuk eyak sayyo te ehalu honyi héfuahi jiaran jio, ‘Ebeŋ hohoi ewak atulo alia ahobu hohoi.’

¹⁵ “Ihanani nyia atulo alia ahobu, ette inyi icohuno. Teya teya, iloŋu nyia inyi egiamak honyi imijaniere omuk ajia agurusi hunno opocouni isi.

¹⁶ Otto etteri ittuna, ette jiaran, ‘Lettok, apocou ni agurusi ayyeli 'tomon to linyia isiarak iyye ani.’

¹⁷ Buo inyi ette jiaran jihonyi, ‘Oyyu bebe. Iyye egiamani elle iyyu 'to! Ihuo ittoŋotio nyia iyye erre hullo omutari 'to onno oyyu, ehanak adi ni iyye elettok olo aborejin gala 'tomon.’

¹⁸ Ette buo fe egiamani etarrihi ittuna, ette jiaran, ‘Lettok, apocou ni agurusi ayyeli miyet to linyia isiarak iyye ani.’

¹⁹ Buo inyi ette jiaran jihonyi, ‘Ira adi iyye elettok olo aborejin gala miyet.’

²⁰ “Otto buo fe ollobo ittuna ette jiaran, ‘Lettok, hibe agiris 'yel hoi olo. Abubunak nyia ni inyi ta amannir, ette ni ittunana inyi onno oyyu;

²¹ nyio, abaŋ nyia ni arahan hoi atulo olorroho. Iduhutta iyye erre hunno obeŋi 'to arai ahunohoi buo fe idioŋotio erre hunne ibeŋ iyye iyehi.’

²² Buo hobu ette jiaran jihonyi, ‘Iyye legiamani elle irroho 'to! Aŋot adi ni eram hoi te ekenita hunno ofuonni 'to to hutuk hoi! Imijak iyye jio ara ni atulo olorroho, eduhutta ni erre hunno obeŋi 'to arai ahunoŋ buo fe adioŋotio erre hunna abeŋ ni ayehi.

²³ Nyio nyiati ibeŋ iyye itunak agurusi hoŋ ibeŋk? Nyio, ŋaduo ni efuotu isi, iko efoniti hosi ninyia lacohuno ni.’

²⁴ “Attati inyi jiaran jio hia hinyia owotiai 'to diya, ‘Iduhuna agiris 'yel alia addi jihonyi, isiatta jio lia ollo owon 'to iko agurusi ayyeli 'tomon!’

²⁵ Ati ojiori nyia isi jihonyi ‘Lettok awon bu inyi iko agurusi ayyeli 'tomon!’

²⁶ Itarraŋ nyia inyi ojio, ‘Eramak ni itai, jio lia ollo owon 'to iko asaŋ arriai, ofonihini adi jihonyi, buo lia ollo obeŋ riŋ jihonyi, iduhari adi addi jihonyi ara duadi bu obo ariŋ ollo owon 'to jihonyi.

²⁷ Ihuania, iyaŋuniete amiorok hoŋ hulia hunyia ojiori 'to jio ebeŋ isi ewak ani ahobu hosi, ottohoro isi ihosiere hoŋ!’ ”

Ojiŋak Yesu Yerusalem

²⁸ Ninyia latuhok Yesu ekiana, ette inyi leten Yerusalem to osiere.

²⁹ Ninyia iliaha inyi iger Besfeji iko Betani hutteger doŋe Olifet, ette inyi ifahina lejifak honyi arrihai ahosiere,

³⁰ ette jiaran jihosi, “Ifuatta jio amiji otto hosiere nyia; buo héjiŋana itai diya, inyurana adi itai obo aŋarri sigiria, anna atarani, onno hobeŋ tulo adahari; ohouniete inyi, iyaŋuniete dini.

³¹ Elle ifiyo obo atulo itai jio, ‘Nyio ihoyete itai inyi?’ Iramana jio, ‘Awak Lamonye’ inyi.”

³² Ofuoi nyia isi ette inyurana erre 'daŋ ihuo iramak nyia Yesu isi.

³³ Ninyia hohoyei isi asigiria nyia, ette amonyie sigiria jiaran jihosi, “Nyio ihoyete itai inyi?”

³⁴ Itarraŋi nyia isi jiojio, “Awak Lamonye inyi.”

³⁵ Ania, ette isi iyaŋuno inyi many jio Yesu. Attati isi ifiatana aboŋojin hosi ihoruoŋ asigiria ania, ette itadahina Yesu ihide honyi.

³⁶ Ninyia alari inyi ta asigiria, ofiatani nyia aati aboŋojin hosi ihikoi.

³⁷ Ninyia lafany inyi iger Yerusalem jio amaji onno orubuniere ekoi onno ottu 'to to doŋe Olifet, ette eluluŋ hejifak itterio amuno buo fe itahabuye Hollum woŋ woŋ, nyio, te eduariti 'daŋ hunyia igonyuni isi.

³⁸ Ojiori nyia isi, “Hotomunoi hobu ollo ottu 'to ta afure ono Lamonye! Ijiara nelik taji hatawana idou buo akuatan hatawana jio Hollum.”

³⁹ Attati lomuk hulo Farisei hunyia owoni 'to jio eluluŋ ania ikiana jio Yesu jio, “Hettiyanani, iŋerejanie jio lejifak hoi hotoduai.”

⁴⁰ Itarraŋ nyia Yesu jio, “Eramak ni itai, alla aduahinie isi, itterie adi amoruoi ta ahuattek hosi ewuwoŋita.”

Oyyoo Yesu to Yerusalem

⁴¹ Ninyia iliaha inyi, ette igonyuna Yerusalem, ette inyi iyyoo tenyi,

⁴² jiojio “Aii, ara duo hémijak iyye ahana erre hunne iyaŋunie 'to nelik fau! Ati ihuania idimani isi to hoŋite hoi.

⁴³ Nyio, ofuonni adi oŋitek hunne ikolonierek amiorok hoi iyye. Okudani adi iyye rid rid ta amariŋ itihiere iyye, attati irrioro attua ros ros totto ŋacio 'daŋ.

⁴⁴ Otuhi adi isi iyye iko aati hutto tua iliati hoi 'daŋ muk. Obeŋi adi isi idehini obo amoruo imaji honyi nyio ibeŋ nyia iyye imijak asaa onno ottuniere Hollum italuahuniere iyye!”

Olo Yesu Ihaji Emojit enne Ittokon

⁴⁵ Attati Yesu ijiŋara itua Haji Emojit enne ittokon, ette itterio efuhatio apocok addi.

⁴⁶ Ette jiaran jihosi, “Igioroni ibuk ono Hollum jio, ojio Hollum, ‘Iloŋoi adi aaji hoŋ, aaji emojit.’ Ati iloitoto itai inyi ahinom hahalak!”

⁴⁷ Ittiyanatio nyia Yesu oŋitek 'daŋ itua Haji emojit enne ittokon. Attati ehumak iko ettiyanak ifahita buo elettaha waati, iwahan ittohoro inyi.

⁴⁸ Ati obeŋi nyia isi onyurani obo ekoi ihaniere ihuo nyia; nyio, odulori nyia aati etaniŋio bebe, ekenita honyi 'daŋ.