Luka 15 - Ecorit Aŋejuk 2003

Aker ollo Olito 'to

¹ Nyia obo oloŋ, ofuonni nyia eddudduhak musuru iko eyyak jio Yesu itayiriere jihonyi.

² Ottoi Farisei iko ettiyanak ifahita iŋuŋunita jiojio, “Ifuotutta atulo alia eyyak buo fe oŋiyotio ikosi!”

³ Tania, ette Yesu iramani jihosi etarriamai ana:

⁴ “Alla awon obo alatai iko akioro esiha abotie (100) buo obo abotie ette ilitohina, obeŋ 'tadi inyi idiaharu huna atomuana hottoŋuan hohottoŋuan ihidiofo, ette leten ittittifiaru olobotie linyia olito 'to many onyuraniere inyi?

⁵ Ninyia lanyurak inyi, ette inyi iloruno buo omuno.

⁶ Ninyia lafany inyi ihaŋ, iloŋu nyia inyi mottiarak iko onyihari honyi arabotie, ette jiaran jihosi, ‘Hamunoti nyio, anyurak ni aker hoŋ linyia olito 'to!’

⁷ Ihuo nyia buo fe eramak ni itai, obolo adi amuno idou, te eyyani abotie ollo obusak 'to eyyata honyi agalik amuno ta abisak atomuana hottoŋuan hohottoŋuan hulle igigiloi 'to jio obeŋi eyyata jihosi ibusaniere.

Arobiya ollo Olito 'to

⁸ “Kuyya alla awon obo aŋotte iko arobiyaa 'tomon, buo ette italitohina arobiya abotie, ihan 'tadi inyi anyio? Itawulohi adi inyi allomo, ette ifie aaji buo ihum ittifia many onyuraniere inyi?

⁹ Ninyia lanyurak inyi arobiya lia, iloŋu nyia inyi mottiarak iko onyihari honyi arabotie, ette jiaran jihosi, ‘Hamunoti, nyio, anyurak ni arobiya loduo etalitohi ni!’

¹⁰ Ihuo nyia buo fe, eramak ni itai, omunoi adi ajilohien Hollum te eyyani abotie elle iha 'to eyyata honyi.”

Lonyi ollo Olito 'to

¹¹ Attati Yesu jiaran, “Owon nyia obo atulo iko lonyirok honyi arrihai,

¹² ette ollo odiha 'to jiaran jio monyonyi jiojio, ‘Baba obuanyak ani erre hoŋ.’ Buo monyosi ette ibibuanyana jihosi asaŋ honyi 'daŋ.

¹³ Ihalu omuk oŋitek kai, itinyiaŋak lonyi ollo odiha 'to asaŋ honyi 'daŋ, ette leten jio obo afau anna alama, ette ittarrohojana agurusi honyi 'daŋ ta amanya onno orroho 'to.

¹⁴ Ninyia latuhok inyi asaŋ honyi 'daŋ, attati ahure onno obolo ittuna jio afau ania ette inyi ilociaŋ.

¹⁵ Attati inyi leten igiama iko obo atulo olo afau ania, linyia ifak 'to inyi itua mana honyi iyyahatiere abataha.

¹⁶ Adaya nyia inyi iŋiyere abehenyita modoro hunyia oŋiye abataha, ati obeŋ nyia tulo isio inyi obo ariŋ.

¹⁷ Ninyia afuonni ofioro ihou honyi, ette inyi jiaran, ‘Omukajia egiamak monyoŋ hullo oŋiye 'to aŋiyo bai many ofitoro, buo nani ahure dini ettoho!

¹⁸ Adioto adi ni, ette ni leten jio monyoŋ, ette ni jiaran jihonyi, “Baba, eyyau ni ihosiere Hollum buo fe ihosiere hoi.

¹⁹ Abeŋ ni enyiak isiruna irari olonyi hoi, ijiara ani ara ihuo obo egiamani hoi.” ’

²⁰ Tania, odioto inyi ette leten jio monyonyi. “Ninyia halama inyi, igonyuni nyia monyonyi inyi, ette imehino jihonyi, ette iŋioron, ette imosouna inyi, ette ifony inyi ta ahucio 'yaha.

²¹ Attati lonyi honyi jiaran jihonyi, ‘Baba, eyyau ni ihosiere Hollum iko ihosiere hoi, abeŋ ni enyiak isiruna irari alonyi hoi.’

²² Ati ojio nyia monye jio egiamak honyi, ‘Oruhuniete! Iyaŋuniete aboŋo enne ilaman 'to bebe, itiyyafana inyi; itiyyafana buo fe abilata ihafialai buo amuha ihejek honyi.

²³ Orihuniete atawwo linyia itafiri, ocuhoto inyi, haŋiyete, buo fe hamunoti,

²⁴ nyio aye nyia lonyi hoŋ olo, ihuania inyiak inyi isu. Olitohi nyia inyi, buo ihuania arumanio inyi.’ Ania, ette isi itterio amuno.

²⁵ “Ta asaa ania, owon nyia lonyi honyi ahouti imana. Ninyia acohuno inyi many iger haŋ, itayiru nyia inyi edolo iko efufuoho.

²⁶ Ette inyi iloŋuna obo egiamani, ette ifiyo inyi jio, ‘Jai! Owon anyio diya?’

²⁷ Itarraŋ nyia inyi ojio, ‘Attu illahoi, ania, acuk monyohoi atawwo linyia itafiri; nyio ifuotu inyi illahoi ollo oyyu.’

²⁸ “Tania, iloŋojita leto ahouti alia bebe, ette ihara ajiŋana attua haŋ. Ania, ette monyonyi ijiŋuna, ette ittana jio ijiara inyi hotojiŋai attua.

²⁹ Buo inyi ette itarraŋ monyonyi ojio, ‘Imijie, egiama ni jihoi aŋasi hunia 'daŋ buo fe abeŋ amesio efahita hoi, ati ibeŋ iyye ani isio obo ariŋ ara duadi bu elloti alla aŋot ni imunori iko mottiarak hoŋ.

³⁰ Ati noduo lacohuno lonyi hoi alia, elle ittarrohojak 'to erre hoi 'daŋ jio asomok, buo iyye itte icuhonia inyi atawwo linyia itafiri!’

³¹ Itarraŋ nyia monyonyi ojio, ‘Lonyi hoŋ, idulo iyye itoŋo ikoŋ, arai buo fe asaŋ hoŋ 'daŋ ahunohoi.

³² Ati osiru jihohoi imunori; nyio aye nyia illahoi alia, ati ihuania inyiak inyi isu; olitohi nyia inyi, buo ihuania arumanio inyi.’ ”