Efeso 5 - Ecorit Aŋejuk 2003

Amanya Ifaŋan

¹ Ta arahan hatai aduri Hollum hullo obuor ataji honyi, okiamata luŋa irari ihuo inyi.

² Ijiara luŋa abuaran taji ogottiere amanya hatai, ihuo ninyia obuarari ataji Kristo hohoi, ette iye te eram hohoi, irari esiorio ehumi onno oŋuo 'to gir gir onno omuno Hollum.

³ Ta arahan hatai awaati Hollum, hèlaha luŋa ojiori jio, owon asomon kuyya asilara kuyya anahan tua ihiji hatai.

⁴ Obeŋ buo fe osiru jihatai ikianari te ekenita hunno oŋuoji 'to kuyya hunno orrohoji 'to kuyya hunna aŋariji 'to te etayirio. Ati isiatta luŋa ahumo jio Hollum.

⁵ Omijana jio, ittallik olosomo kuyya olosila kuyya atulo ollo onok tua irahan a hulo Olobie Kristo iko olo Hollum. (Nyio, omuno atulo ollo onok tua erre ihuo alla arai isi Hollum.)

⁶ Hèlaha obo atulo inyob itai te ekenita asai. Isi erre hunia hunne iyaŋunie 'to Hollum ijoriari jio hia hullo omesie 'to inyi.

⁷ Tania, hènyihati luŋa iko aati ihuo hulia.

⁸ Iwanata nyia itai idumele; ati ta arahan hatai a waati Lamonye, iwanata itai ifaŋan. Tania, amanyati luŋa a waati hulo afaŋan;

⁹ nyio, afaŋan, inyi iyaŋuno ehanita 'daŋ hunno oyiji 'to, hunno obisi 'to iko hunna arai 'to hode.

¹⁰ Okiamata luŋa iyiyenuniere ariŋ enne itamunoyo 'to Lamonye.

¹¹ Alamajata jio erre asai hunne ihanie idumele, ati asalana isi 'daŋ. (

¹² Ati, ara luŋa bebe ariri ikianari eram ono erre hunne ihanie te edidima.)

¹³ Buo alla asalanie erre 'daŋ illet, oleyo adi ahode hode hosi 'tel 'tel;

¹⁴ nyio, ariŋ 'daŋ enne italeyehini 'tel 'tel, ara afaŋan inyi onno ojiarik jio “Hajotoni, ohenyune, ibuhu toye, afaŋ adi Kristo jihoi.”

¹⁵ Tania, ihumata imijio imanyati itai aŋai. Hèmanyati ihuo atimok hirre, ati amanyati ihuo alofiorojok.

¹⁶ Ihaniete onno oyyu elle irumana itai obo ekoi, nyio, oŋitek huna hunno orrohoji 'to.

¹⁷ Hèsata awaati hullo obeŋi ossi, ati omijana ariŋ anna awak Lamonye oŋida ihaniete.

¹⁸ Hètarrohojiata ahuattek ta arumatio; ati, ijiara Oloholio ifut imanya hatai.

¹⁹ Ihiji hatai, ikianati te ekenita hutto buk fureta Dafide, te edolita iko ta afureta etahabuta Hollum; idoloti afureta etahabuta Lamonye, ta atajia hatai 'daŋ.

²⁰ Ta nafure Yesu Kristo, Lamonye hohoi, oduloro esiorio ahumo jio Hollum, Monye, te erre 'daŋ.

Aŋoruo iko Habiok

²¹ Ta abaŋi hatai Kristo, ijiara abaŋi huattek owon ihiji hatai.

²² Itai aŋoruo, abaŋata habiok hatai ihuo enne ibaŋatti itai Lamonye.

²³ Nyio, ilohittok alle jio ŋoruoi honyi ihuo enne ilohittohori Kristo jio eluluŋ heruhok; Kristo ta ahuan honyi ara etalahani olo eluluŋ heruhok, anna ara 'to ihuo ahuan honyi.

²⁴ Tania, ijiara luŋa aŋoruo odulori abaŋi habiok hosi ihuo anna abaŋari eluluŋ heruhok Kristo.

²⁵ Itai habiok, itabuarata atajia jio aŋoruo hatai ihuo onno obuarari ataji Kristo eluluŋ heruhok, ette buo fe iye te eram honyi.

²⁶ Ihan nyia inyi eram ania, igialaniere eluluŋ heruhok jio Hollum ta agolon ono ekiana honyi. Illilla nyia inyi eluluŋ heruhok ta aari italiborori inyi,

²⁷ jio oŋida eluluŋ heruhok, te elamani iko ta alibori honyi 'daŋ, ara ahononyi; obeŋ obo epali, kuyya arrohoji, kuyya eyyau, kuyya obo ariŋ onno orroho.

²⁸ Ijiara luŋa alle itabuor ataji jio ŋoruoi honyi, ihuo onno obuarari inyi ahuan honyi. Nyio, atulo ollo obuor ataji honyi ŋoruoi, obuor buo fe ataji honyi ahuan honyi. (

²⁹ Obeŋ obo atulo oliwari ahuan honyi; ati itaŋiyo inyi ahuan honyi buo fe ihum ittoŋotio inyi, ihuo enne ihaniere Kristo jio eluluŋ heruhok.

³⁰ Nyio era aŋacio huan honyi.)

³¹ Ihuo ojio abuk Hollum, “Te eram ania, idiaharu adi alle monyonyi iko honyonyi ette inosonio iko ŋoruoi honyi, ette isi 'daŋ arrihai irahan ahuan abotie.”

³² Owon elahode anna agalik 'to bebe ofioro waati jio egierita hunia, ati amijak ni jio, ikiana inyi te eram Kristo iko eluluŋ heruhok.

³³ Ati ikiana buo fe inyi tetai. Ijiara habiok 'daŋ itabuori atajia jio aŋoruo hosi; ijiara buo fe aŋoruo 'daŋ abaŋi habiok hosi.