Efeso 2 - Ecorit Aŋejuk 2003

Attuna Toye jio Nesu

¹ Berien, ta amesio iko te eyyauna hatai, irata nyia itai ihuo ayaak.

² Jio oŋitek hua, ijifatiete nyia itai ekotia afau ana hunno orrohoji 'to. Iniŋiete nyia itai elettok olorroho, elle ilohittok 'to jio erre 'daŋ huttehiji edou iko afau, ollo ogottiere agolon honyi aati 'daŋ hullo omesie 'to Hollum.

³ Emanya nyia 'daŋ ihua isi, te ejifatio ewahiti huattek hohoi, buo fe ehanio ewahiti 'daŋ huno ahuattek iko huno ossi hohoi. Efuo nyia 'daŋ ifuotuna ettigemio jio Hollum ihuo aati hullomuk 'daŋ.

⁴ Ati obolo amehino ono Hollum buo fe ataji honyi obuor hohoi bebe.

⁵ Duadi bu era nyia ihuo ayaak ta amesio hohoi, ihan inyi hohoi a hesuok to Kristo. Italahuni itai ta ayiji taji Hollum,

⁶ ette itubuhuna hohoi arabotie te enoso iko Kristo Yesu jio, oŋida efuo ilohittok arabotie ikonyi lidou.

⁷ Ihan nyia inyi ihuo nyia, itahutaniere abolori iko agalihina ono ayiji taji honyi jio oŋitek huno moi 'daŋ; ta abuaran taji enne itahutak inyi jihohoi to Kristo Yesu.

^8-9 Italahuni nyia itai ta ayiji taji Hollum te neruk hatai; obiaŋara te ehanita hatai, ati ara inyi esiorio Hollum jio, oŋida obo atulo obeŋ itadara tenyi.

¹⁰ Ihan nyia Hollum hohoi irari ihua ana; buo te enoso iko Kristo Yesu, oyyeu nyia inyi hohoi ihaniere erre ayijok hunyia ihuhumak inyi jihohoi ihaniere.

Enoso to Kristo

¹¹ Tania, itai Alufajak, hèguotti iwanata nyia itai berien aŋai. Ojiori nyia Yudei jio, “Ibiaŋata itai ibosoti”. Itadarai isi ta aboso huattek hosi.

¹² Omijana jio, berien, itimoti nyia itai Kristo. Irata nyia itai aterejok. Ibiaŋata nyia itai irata onyimot Hollum. Obeŋi nyia ecoriti hunyia ocorok Hollum jio aati honyi, arai tetai. Imanyati itai jio afau ana obeŋ eyihina, buo fe itimoti Hollum.

¹³ Ilamajata nyia itai jio Hollum, ati ihuania, te enoso iko Kristo Yesu, itanyihuno nooto Kristo itai jio Hollum.

¹⁴ Itimuarak Kristo hohoi, ta attubana honyi arabotie Yudei iko Alufajak. Ta naye honyi, itattur inyi aliwa ninyia obuany 'to hohoi tehiji ihuo olohitir.

¹⁵ Te enoso hohoi ikonyi, itapuak Kristo Efahita Yudei iko ehanita buo ewahiti hosi 'daŋ jio, oŋida inyi attubak Yudei iko Alufajak irari awoyo abotie anna ara 'to aŋejuk; ania, itimuaraniere inyi hohoi te ekoi ania.

¹⁶ Itattur Kristo aliwa ette hiji hohoi ta naye honyi likruce, ette buo fe ittubana Yudei iko Alufajak irari ihuo ahuan abotie, ette itimuarana isi 'daŋ iko Hollum.

¹⁷ Tania, ottu nyia Kristo ette ittittoyo eram ono nelik taji jihatai, Alufajak, hinyia ilamajata 'to jio Hollum, buo fe ittittoyo jihohoi, Yudei, hinyia enyiha 'to jio Hollum.

¹⁸ To Kristo, eremik 'daŋ ifuatan jio Monye to Oloholio abotie.

¹⁹ Tania, ibiaŋata itai inyiahata irahan aterejok kuyya atamonok; ati ittubaniete itai arabotie iko aati Hollum, buo fe irata aduri Hollum.

²⁰ Irata itai ihuo aaji, buo lefahat iko ekianak Hollum arai ihuo etawojita huno aaji ania; buo Kristo Yesu, ta ahuan honyi, ara amoruo otto gul.

²¹ Inyi iniafak aŋacio aaji ania daŋ arabotie, ette itaboloruna inyi ahaji elibo emojit enne ittokon, enne igialani ahono Lamonye.

²² Te enoso ikonyi, aduhoni buo fe itai 'daŋ arabotie iko aati hullomuk irari amaji anna amanyari Hollum to Oloholio honyi.