Ebrei 3 - Ecorit Aŋejuk 2003

Agalik Yesu, Mose

¹ Itai Kristiani ihua ani, hunyia buo fe onyimu Hollum, igigiloti to Yesu. Ifahu nyia Hollum inyi irari a Hehumani elle ittokon, olo neruk onno owon 'to ana jihohoi.

² Oniŋio nyia Yesu eram Hollum, linyia onyimu 'to inyi, ihuo ninyia oniŋiere Mose igiamari jio aati Hollum.

³ Ati osiru olohuo jio Yesu agalik jio Mose, ihuo onno osiruniere inyi jio aduhoni agalik jio aaji.

⁴ Nyio, owoni asik 'daŋ ababo iko aduhok hosi, ati Hollum oyyeu erre 'daŋ.

⁵ Ara nyia Mose a hegiamani oloyijio te egiama honyi jio aati Hollum. Iramatta nyia inyi erre hunno olo Hollum ikiana moi.

⁶ Ati ara Kristo a Hito oloyijio ollo ottoŋotio 'to aati Hollum. Era a waati honyi, elle edulo etagolio tajia, ebeŋ ehorok.

Nayiri jio Aati Hollum

⁷ Tania, ihuo ojio Loholio Olibo jio, “Ahana, elle itayiruna itai etuk Hollum,

⁸ Hètagoloto ossi, ihuo hohonyiok hatai; omesie nyia isi Hollum, to ninyia okemierek isi inyi ihidiofo.

⁹ Ojio nyia Hollum jio okemie nyia isi ani, duadi bu igonyuni nyia isi erre hunyia ehanio ni aŋasi atomuana aŋuan.

¹⁰ Ania, eloŋojitari ni jihosi ette ni jiaran, ‘Odulori isi amesio ani buo fe ihari ejifatio efahita hoŋ.’

¹¹ Ejoria nyia ni, ette ni ittuŋo jio: ‘Ittallihi adi isi ifanyan jio afau anna aremehiniere ni isiaraniere jihosi ayiri!’ ”

¹² Illarak iko haniyarak hoŋ, ihumata mijio; hèlaha obo jihatai owon iko ataji onno orroho, onno obeŋ 'to owon iko neruk, ŋadi iyitonia Hollum lesuoni, oruoŋitek.

¹³ Ati, alla ara ekiana otto buk Hollum, onno ojio 'to jio, “Ahana”, to hohoi, oluahiete ahuattek oŋitek daŋ, ŋadi iyyauna ittata iruk agesemi enne iyaŋuno 'to jihatai agolon hossi.

¹⁴ Egiama 'daŋ luŋa arabotie iko Kristo, elle egottiere many isidi, eyihina ninyia owon 'to jihohoi tetteri.

¹⁵ Erre huna, hunyia ojio abuk Hollum jio; “Ahana, elle itayiruna itai etuk Hollum, hètagoloto ossi, ihuo hohonyiok hatai, to ninyia omesierek isi Hollum.”

¹⁶ Haŋai nyia soho hunyia itaniŋuni 'to etuk Hollum, buo arasai mesio inyi? Obiaŋara soho aati 'daŋ hinyia iyaŋuno Mose addi to Masir.

¹⁷ Jio baŋai nyia soho iloŋojita Hollum aŋasi atomuana aŋuan? Obiaŋara nyia soho jio aati hinyia iyyauni 'to, aati hinyia ibibiatai ahuattek hosi ihidiofo?

¹⁸ Eram baŋai nyia soho enne ikiana Hollum, ninyia ojiari inyi jio, “Ittallihi adi isi fanyan jio afau anna aremehiniere ni isiaraniere jihosi ayiri”? Ikiana nyia inyi eram hia hinyia omesie 'to inyi.

¹⁹ Emijak tibuo jio, ittallihi nyia isi jiŋana jio afau ania nyio, obeŋ nyia eruk jihosi.