2Korinto 6 - Ecorit Aŋejuk 2003

¹ Alla ara te egiama hohoi jio Hollum, ettana hohoi itai hulle ifuotuna 'to ayiji taji Hollum jio, hèlaha olo asai.

² Itayiruna eram onno ojio Hollum jio: “Ninyia attuba asaa hoŋ italuahiere itai, etayiru nyia ni eram hatai; ninyia attuba oloŋ hoŋ italahuniere itai, etaluahu nyia ni itai.” Itayiriete! Asaa ana ono aluahio, ahana oloŋ ono etalahuno!

³ Ebeŋ hohoi ewak obo atulo orumak obo epali jio egemita hohoi, ania, ebiaŋari hohoi ehananiere etakuahi ihikoi obo atulo.

⁴ Ati, te ehanita 'daŋ, etahutak hohoi jio, era hohoi a hegiamak Hollum ta adihan hohoi dee ettigemita, agolon manya, arrohojita,

⁵ abahio, efita ibabus, eŋiŋario, epito onno ogol, aŋotihina joto, iko ehuria.

⁶ Era hohoi a hegiamak Hollum ta alibori tajia, ta amijana, ta adihan, ta anyalami, to Loholio Olibo, te etabuorio tajia hode,

⁷ te ekiana anna ara 'to hode, iko ta agolon Hollum. Ara abisan a hilluk iko abuhu hohoi, irumoniere buo fe ifauniere ahuattek hohoi.

⁸ Itahabuye buo fe itafittaŋie hohoi; emori hohoi buo fe etahuye. Omijie hohoi ihuo era hohoi agesomok, ati, ekiana hohoi ahode hode;

⁹ ihuo ollo otimoi hohoi, ati omijani hohoi 'daŋ; ihuo elle eye hohoi, ati esu hohoi ihuo igonyuna itai. Duadi bu ittigemie hohoi, ati obeŋi ottohori hohoi;

¹⁰ itajiriŋi, edulo amuno; era ihuo elle elociaŋ, ati etasamak aati arriai; era ihuo elle ebeŋ ewon iko obo ariŋ, ati ewon iko erre 'daŋ.

¹¹ Illarak iko haniyarak hohoi hutto Korinto, ekiana hohoi jihatai sar sar; obuori atajia hohoi itai 'daŋ.

¹² Itai hulle itamutarata 'to abuaran tajia hatai jihohoi, buo obiaŋara hohoi etamuta abuaran tajia hohoi jihatai.

¹³ Ekiana ni jihatai ihuo elle irata itai aduri hoŋ: ihaniete jihohoi ihuo enne ehaniere hohoi jihatai. Itabuarata atajia hatai.

Asario te Eram H atimok Hollum

¹⁴ Hègiamati ihuo elle irriamara itai iko aati hullo obeŋi 'to arai a heruhok. Aŋai oremik abisan inoso iko epali? Aŋai oremik afaŋan itoŋo arabotie iko edumele?

¹⁵ Anyio itaruaŋak Kristo iko Sittan? Anyio inosok eruhoni iko atulo ollo obeŋ 'to ara a heruhoni?

¹⁶ Anyio itaruaŋak Aaji emojit enne ittokon ono Hollum iko arrijiorita jiohin? Era a haji Hollum lesuoni! Ihuo ojio nyia Hollum jio: “Etoŋo adi ni iko aati hoŋ, amanya adi ni ihiji hosi; ara adi ni a Hollum hosi, buo isi arai a waati hoŋ.”

¹⁷ Inyi buo fe onno ojiari Lamonye jio, “Idehina luŋa isi, opiahatti addi jihosi. Hèttiroto obo ariŋ enne ibot 'to, buo ni adi ette iruk itai.

¹⁸ Ojio Lamonye Laduarani jio, ara adi ni a monyatai, buo itai irata a lonyirok iko aŋarriok hoŋ.”