2Korinto 4 - Ecorit Aŋejuk 2003

Esamiti Loholio hutto tua Tobuaha

¹ Ta amehino ottono Hollum, isiarak inyi jihohoi egiama ana ihaniere, tania, hèlaha ehorok.

² Ebusak hohoi ehanita hunne ihanie te edidima iko hunne iyaŋunie 'to ariri. Ebeŋ hohoi emanya te enyaba, kuyya te etarrohojio ekiana Hollum. Ati emanya hohoi te elahode ihosiere Hollum. Ewak hohoi itamijana ayiji manya hohoi itajia waati 'daŋ.

³ Elle idimani asayyo ayijok hunne ettittoyo hohoi hunia, idimani fe hama jio hia hullo otuhoroi 'to.

⁴ Obeŋi isi iruhi, nyio, ihianak ajiok ono afau ana ossi hosi. Itihotio inyi isi igonyuniere afaŋan anna afaŋ 'to jihosi; afaŋan onno ottu 'to jio Asayyo Ayijok huno akuatan Kristo, alla ara 'to luŋa ihuo Hollum.

⁵ Ebeŋ hohoi ettittoyo eram huattek hohoi; ettittoyo hohoi eram Yesu Kristo jio ara inyi Lamonye. Era hohoi a hegiamak hatai te neram honyi.

⁶ Hollum linyia ojio 'to jio, “Ijiara afaŋan hatawana idumele,” inyi ihanak afaŋan honyi itajia hohoi, isiaraniere jihohoi olofioro huno akuatan Hollum anna afaŋ 'to ihomom Kristo.

⁷ Ati, era hohoi hulle ewon 'to iko esamiti loholio ihuo atobuaha, itahutaniere jio ara agolon anna agalik 'to ahono Hollum, obiaŋara ahonohoi.

⁸ Ittigemie hohoi oŋitek 'daŋ, ati ebeŋ ettidanio; ekuaya omuk oŋitek, ati ebeŋ ehorok.

⁹ Oluaji amiorok hohoi, ati ebeŋ ekuronio; obo oloŋ iriafuni hohoi, ati ebeŋ eye.

¹⁰ Oŋitek 'daŋ owon naye Yesu ihuattek hohoi jio, oŋida buo fe nesu honyi owon ihuattek hohoi huna.

¹¹ Ta amanya hohoi 'daŋ, odulo naye iliaha jihohoi te eram Yesu jio, oŋida bati nesu honyi owon ihuattek hohoi huna, hunno obeŋi 'to isui 'tulaŋ.

¹² Itahutak ania jio, iliaha naye jihohoi, buo nesu owon jihatai.

¹³ Igioroni ibuk Hollum jio, “Ekiana nyia ni, nyio, eruk nyia ni.” Ihuo nyia buo fe, ekiana hohoi, nyio, eruk hohoi.

¹⁴ Emijak hohoi jio, Hollum linyia itubuhu 'to Yesu Lamonye toye, itubuhu adi buo fe inyi hohoi iko Yesu, ette iyaru hohoi arabotie ikatai ihosiere honyi.

¹⁵ Arai erre hunia 'daŋ tetai jio, ihuo afafanyaru ayiji taji Hollum jio aati arriai, isiorie adi isi a humo itakuaciere inyi bebe.

Amanya te Neruk

¹⁶ Inyi enne ebiaŋari hohoi ejio ehorok, duadi bu imimaruaharai ahuattek hohoi huna, inyiahi tibuo oloholioo hohoi iŋiŋejuhoro oŋitek 'daŋ.

¹⁷ Ihuhumie ettigemita hullo omutari 'to hulia hohoi, irumaniere akuatan onno obolo onno osio 'to 'tulaŋ agalik 'daŋ.

¹⁸ Nyio, ebeŋ emijio jio erre hunno oremik onyek igonyuna, ati emejio jio erre hunne ittallik onyek igonyuna. Obeŋ ariŋ enne igonyu onyek osio 'tulaŋ, buo enne ittallik onyek igonyuna osio 'tulaŋ.