2Korinto 3 - Ecorit Aŋejuk 2003

Egiamak hulo Ecorit Aŋejuk

¹ Oleyo soho inyi ihuo elle enyiak hohoi itahuoro ahuattek hohoi? Ebeŋ hohoi ewak awaragaa hunne itamijanani 'to hohoi jihatai kuyya oŋida isiatta isi jihohoi itamijaniere hohoi jio aati hullomuk.

² Irata itai, ta ahuattek hatai, etamijanita hunne igioroni itajia hohoi jio oŋida aati 'daŋ omijani buo fe ihenuni.

³ Oleyo inyi luŋa jio, Kristo nyia igier awaraga ania ette isulana inyi to hohoi. Obeŋi igieri inyi ta agalam, ati to Oloholio Hollum lesuoni. Igioroni nyia inyi itajia waati obiaŋara ilottobohi.

⁴ Ekiana hohoi ihuo nyia nyio, eyihi hohoi jio Hollum to Kristo.

⁵ Obeŋ riŋ jihohoi ikafiere ossi jiojio, eremik hohoi ihanio egiama ania. Ottu agolon hohoi ihaniere egiama ania jio Hollum.

⁶ Inyi itaremik hohoi igiamari jio ecorit aŋejuk, onno obeŋ 'to ara te efahita hunne igioroni, ati to Oloholio. Iyaŋunie efahita hunne igioroni naye, buo Oloholio iyaŋuno nesu.

⁷ Ikiafani nyia egierita Ifahita ilottobohi. Ottu nyia akuatan Hollum to ninyia isiaranierek isi. Opipiak nyia akuatan ania bebe many ittallihorik Israele imijiere jio Mose, duadi bu ninyia iririohuno efaŋit otto homom honyi. Alla aremehini Efahita hunne iyaŋunie 'to naye ifuanna iko akuatan onno obolo,

⁸ obeŋ 'tadi akuatan ono ehanita Loholio agalik bebe?

⁹ Alla awon akuatan jio ariŋ enne iyaŋuno 'to ettigemio, obeŋ 'tadi akuatan ono ariŋ enne iyaŋuno 'to etalahuno agalik bebe?

¹⁰ Hode, eremik jiaran jio, ariŋ ninyia owon 'to iko akuatan berien, abeŋ inyiak iwanan iko akuatan, nyio, agalik akuatan ono ariŋ ana ahana.

¹¹ Alla awon akuatan jio ariŋ enne ittallik 'to isio 'tulaŋ, obeŋ 'tadi akuatan anna agalik bebe owon jio ariŋ onno osio 'to 'tulaŋ?

¹² Eŋere hohoi ta awanan hohoi iko eyihina ania.

¹³ Ebeŋ era ihuo Mose, linyia imuhok 'to omom honyi ta amannir jio, oŋida bati aati Israele obeŋi igonyuni esidi ono efaŋit ninyia olilitoro 'to.

¹⁴ Hode, ogoli nyia ossi hosi. Many iko ahana harasai ossi hosi imuho ta amannir nyia, elle ihenie isi abuhi huno ecorit amaruani. Obeŋ obo ekoi iduhara amannir nyia addi, arari fe elle inosonio atulo iko Kristo.

¹⁵ Hode, many iko ahana, harasa amannir nyia imuho ihossi hosi, elle ihianai isi Efahita Mose.

¹⁶ Ati, oremehini ibolohoro inyi addi, ihuo enne ikianari abuk Hollum te eram Mose jio: “Ibolohori nyia amannir honyi addi ninyia ayituno inyi jio Lamonye.”

¹⁷ Jio amaji ana, “Lamonye” ollo ojiori Oloholio. Jio amaji anna awanari Oloholio olo Lamonye, obeŋ buo fe epito teya.

¹⁸ Etaleyehi hohoi 'daŋ akuatan ono Lamonye to omomite hunna asalai. Ottu akuatan ania jio Lamonye, alla ara 'to Oloholio, ette iloit hohoi arrijiorita honyi, ta akuatan onno odulo 'to agalihina bebe.