2Korinto 2 - Ecorit Aŋejuk 2003

¹ Tania, odioto nyia to hou hoŋ ibiaŋari inyiak ittuniere jihatai jio, ŋadi aleten hoŋ olo iyaŋuno ejiriŋa.

² Nyio, elle eyaŋuno ni ejiriŋa jihatai, ŋai 'tadi itamunoyo nani? Ahuattek waati fe hunyia eyaŋuno ni jihosi ejiriŋa.

³ Ania, egioroniere ni jihatai awaraga ania jio, alla attu ni, oŋida bati ani abeŋ arumak obo arrohoji jio hia hullo oremihini 'to iyaŋuno jihoŋ amuno. Nyio, amijak ni luŋa jio, alla amuno ni, imunoti buo fe itai 'daŋ.

⁴ Egiorok nyia ni jihatai te eyyoo arriai; obolo nyia ettigemio iko ejiriŋa itaji hoŋ. Abeŋ nyia ni egiorok jihatai iyaŋuniere ejiriŋa, ati, itamijaniere jihatai abuaran taji hoŋ itai 'daŋ.

Edehina Epalita Tulo

⁵ Ati, elle iyaŋuno obo ejiriŋa jio obo, itajiriŋ inyi arriai hatai, buo obiaŋara ani hama. (Ekiana ni ihuo nyia nyio, abeŋ ni awak isehina ajore jihonyi.)

⁶ Jio atulo ihua alia, aremik ettigemio ninyia isiori arriai hatai jihonyi.

⁷ Ihuania, idehina luŋa epalita honyi, itagoloto ataji honyi, ŋadi ejiriŋa ottoho inyi, ette ihoronia.

⁸ Tania, attana ni itai jio itahutana luŋa jihonyi jio obuori atajia hatai inyi.

⁹ Ania, egioroniere ni jihatai awaraga, ikemiere itai buo fe imijaniere kuyya iduloro itai niŋio ettiyenita hoŋ 'daŋ.

¹⁰ Elle idehina itai epalita obo atulo, edehi buo fe ni isi. Buo elle edehi ni obo epali…alla awon hode obo eram idehiniere…edehi ni inyi te eram hatai, omijak Kristo.

¹¹ Ehan ni ihuo nyia jio, ŋadi Sittan orumak obo ekoi imumuniere hohoi, nyio, emijak bebe ahou honyi.

Ihawwa Paulo Imiji Trowas

¹² Ninyia afany ni imiji Trowas ittittoyere Asayyo Ayijok huno Kristo, arumak nyia ni jio aŋahi Lamonye ekoi jihoŋ igiamari diya.

¹³ Ati, ehawwa nyia ni bebe ta abiaŋan hoŋ irumana illa hohoi Tito diya. Ania, ette ni ifonyana aati, ette ni iculana Masedonia.

Agalihina to Kristo

¹⁴ Ati, ta agalihina Kristo erre 'daŋ, ejio hohoi humo jio Hollum, ollo odulo 'to itibilatta hohoi jio akuatan ono Kristo. Te egiama hohoi, itamijanak Hollum eram Kristo imasik 'daŋ ihuo ariaa onno oŋuo 'to gir gir.

¹⁵ Nyio, era ihuo olottogoŋ onno oŋuo 'to gir gir, enne isiarak Kristo jio Hollum, anna attadaru 'to jio hia hulle italahuni iko jio hia hullo otuhoroi 'to.

¹⁶ Jio hia hullo obeŋi 'to italahunie, ara ariaa ania eyeri attohoni, buo jio hia hulle italahunie 'to, ara inyi nesu. Ŋai oremik ihanio egiama ania?

¹⁷ Ebeŋ era ihuo aati arriai hulle iluttarik ekiana Hollum irumaniere obo ariŋ. Ati era a waati hulle ebeŋ 'to egesem to hosiere Hollum, nyio, inyi nyia ifahu hohoi irari a hegiamak Kristo.