2Korinto 13 - Ecorit Aŋejuk 2003

Esariti iko Efonyita Esidita

¹ Enyiahi etahunihi ana anna attuniere ni jihatai. “Ijiara luŋa etisiahita 'daŋ owoni iko asuuti arrihai kuyya hunihoi hulle isiye etisiahita hunia”…ihuo ojio abuk Hollum.

² Ijiara nani asar hia hunyia iyyauni 'to berien iko hullomuk 'daŋ. Asar nyia ni isi jio edahit hoŋ etarrihi; ihuania, ijiara nani enyiak isar isi buo ni halama jio, elle enyiak ni ittuna, obeŋ adi tulo iris ettigemio.

³ Ta awahan attanatai, irumana adi itai etahutita 'daŋ jio, Kristo elle ikiana 'to alia te etuk hoŋ. Obeŋ bunyi Kristo ilik, ati, obolo agolon ono ehanita honyi jihatai.

⁴ Owon nyia elihi to ninyia isihonierek inyi likruce; ati, isu nyia inyi ta agolon Hollum. Ewon buo fe iko elihi te enoso ikonyi; ati, ta amanya hohoi ikatai, edulo adi amanya ikonyi ta agolon Hollum.

⁵ Ihumata imi ahuattek hatai, imijaniere kuyya héduloro itai imanya te eruk hatai. Okiamata ahuattek hatai. Ibiaŋata soho itai imijana jio, owon Yesu Kristo ikatai? Arari fe elle ibiaŋata itai luŋa luŋa ikuahatti.

⁶ Eyihi ni jio ifuanna adi itai irumana jio, ellaŋ hohoi akemio ania.

⁷ Emojo hohoi jio hèlaha itai ihanata obo epali…obiaŋara itahutaniere jio ebis hohoi; ati, oŋida bati itai ihaniete erre hunno obisi, duadi bu eleyo hohoi ihuo aati hulla akuaharai 'to.

⁸ Nyio, ettallik hohoi ihanio obo ariŋ itihotiere nelahode, ati, ehanio hohoi erre hunne iyaŋunie 'to nelahode ijiai.

⁹ Emuno hohoi elle elik hohoi, buo itai igoloto. Tania, emojo buo fe hohoi jio, ijiara itai iyiyijotti.

¹⁰ Inyi enne egioroniere ni eram ana buo ni alama jihatai jio, alla afany ni dinia, hèlaha nani attu ihanio itai onno orroho te elohittok enne isiarak Lamonye jihoŋ…elohittok itaboloruniere itai, buo obiaŋara ittarrohojiere itai.

¹¹ Ihuania, illarak iko haniyarak hoŋ, ajio ni jihatai humenna 'daŋ! Ifurati ayiyijoro, itayiriete ekenita hoŋ, amanyati te egigilo abotie, itoŋoti te nelik tajia; buo Hollum olo abuaran taji iko nelik taji ette adi iwanan ikatai.

¹² Ifonyati ahuattek hatai ta ahucio 'yaha ono nelik tajia. Itifonyai aati Hollum 'daŋ itai.

¹³ Ijiara ayiji taji Yesu Kristo Lamonye, iko abuaran taji Hollum, buo enoso ono Loholio Olibo hatawana jihatai 'daŋ.