1Korinto 2 - Ecorit Aŋejuk 2003

Asayyo Kristo elle Isihoni Ikruce

¹ Illarak iko haniyarak hoŋ, ninyia attuniere ni jihatai ittittoyere eram Hollum, abeŋ nyia ni ekiana te ekenita hunno ogoli kuyya te elofioro.

² Nyio, ninyia hawon ni ikatai, odioto nyia to hou hoŋ idehiniere erre 'daŋ arari fe Yesu Kristo hama iko naye honyi ikruce.

³ Awon nyia ni ikatai olofiaha, elle ekikiro bebe ta abaŋi.

⁴ Obeŋ nyia buo fe ettiyenio hoŋ iko asayyo hunyia eyaŋuno ni, arai te ekiana ono elofioro tulo. Ati aduaran ono Oloholio Hollum nyia luŋa itahutak erre hunia jihatai,

⁵ jio, ŋadi neruk hatai ara te elofioro tulo, ati ta naduaran Hollum.

Olofioro Hollum

⁶ Ati, ettiyenio ni olofioro jio aati hulla agol neruk hosi. Obeŋi olofioro hunia arai a huno afau ana kuyya a huno elettaha afau ana…hullo ofuoi luŋa agolon hosi ituhoro.

⁷ Ettiyenio ni olofioro Hollum hunna agalihini 'to ofioro waati, hunne itidimani, hunyia ocorok inyi itakuaciere hohoi hobeŋi ikoddaŋ oyyeuni nafau.

⁸ Obeŋ obo jio elettaha afau ana omijak olofioro hunia; nyio, alla amijani nyia isi, obeŋi nyia isi isihoni Lamonye olo akuatan ikruce.

⁹ Ati ihuo ojio abuk Hollum jio, “Ariŋ onno hobeŋ tulo igonyu kuyya itayiru, ariŋ onno hobeŋ tulo igigilo jio iduoŋ adi, inyi enne ihuhumak Hollum jio hia hullo obuori atajia hosi inyi.”

¹⁰ Ati, itahutak Hollum jihohoi, to Oloholio honyi, erre hunyia obeŋi omijani. Nyio, ikukubu Oloholio erre 'daŋ duadi bu ewahiti hunne idimai 'to itua taji Hollum.

¹¹ Oloholio onno owon 'to ihuattek hohoi fe hama oremik imijana egigilita tulo. Ihuo nyia buo fe, Oloholio Hollum fe hama oremik imijana egigilita Hollum.

¹² Ihuania, ebeŋ hohoi egigilo ihuo aati hutta fau, ati efuotu hohoi Oloholio onno ottu 'to jio Hollum, jio oŋida bati hohoi emijak erre hunyia isiarak Hollum jihohoi.

¹³ Tania, ebeŋ hohoi ekiana ekenita hunne ittiyenie to olofioro tulo, ati ekenita hunne ittiyenio Oloholio; buo hohoi etahucio ekenita loholio jio hia hullo owoni 'to iko Oloholio.

¹⁴ Lia, ollo obeŋ 'to owon iko Oloholio, ittallik inyi ifuotuna esiorita hunno ofuonni 'to jio Oloholio Hollum. Obeŋ luŋa atulo alla ara 'to ihuo nyia omijak esiorita hunia. Arai esiorita hunia jihonyi ihuo erre asai nyio, oremehini imijana ayiji hosi to Loholio hama.

¹⁵ Oremik atulo alla amanya 'to to Oloholio iŋot eram 'daŋ, ati, ittallik obo atulo iŋot eram honyi.

¹⁶ Ihuo ojio abuk Hollum jio, “Ŋai omijak egigilita Lamonye? Ŋai oremik isiŋio inyi?” Ati ewon iko egigilita Kristo.