ફિલિપ્પીઓ પત્રો 1 - દુબલી નવો કરાર

આદર

¹ ઓ પત્ર પાઉલ આને તિમોથી વેલેને હાય, જે ઇસુ ખ્રિસ્તુ સેવક હાય. ઇ ઇસુ ખ્રિસ્તુ તીયા પવિત્ર લોકુ, આગેવાનુ આને સેવકું માટે બી હાય જે ફિલિપ્પી શેહેરુમે રેતાહા.

² આપુ પિતા પરમેહેરુ આને પ્રભુ ઇસુ ખ્રિસ્તુ વેલેને તુમનેહે કૃપા આને શાંતિ મિલતી રેઅ.

પાઉલુ પ્રાર્થના આને ધન્યવાદ

³ આંય જાંહા-જાંહા તુમનેહે યાદ કીહુ, તાંહા-તાંહા પોતા પરમેહેરુ ધન્યવાદ કીહુ,

⁴ આને જાંહા બી આંય તુમા બાદા માટે પ્રાર્થના કીહુ, તા સાદા ખુશીકી પ્રાર્થના કીહુ.

⁵ ઈયા ખાતુરે કા તુમુહુ જીયા દીહુલને ઇસુ ખ્રિસ્તુ વિશે હારી સુવાર્તાપે વિશ્વાસ કેયોહો, તાંહાને લીને આજ હુદી, તીયા હારી સુવાર્તાલે ફેલાવા માટે માઅ ભાગીદાર રીયાહા.

⁶ માને ઈયુ ગોઠીપે વિશ્વાસ હાય કા પરમેહેરુહુ તુમામે હારો કામ શુરુ કેયોહો, તોજ તીયાલે ઇસુ ખ્રિસ્તુ આવુલો દિહુલે હુદી પુરો કેરી.

⁷ તુમા બાદા વિશે માઅ ઓ વિચાર યોગ્યો હાય, કાહાકા આંય તુમા બાદા આરી પ્રેમ રાખુહુ. કાહાકા આંય જેલુમે આથો તાંહા બી તુમુહુ હારી સુવાર્તા રાખવાલી કેરામે આને તીયુલે સાબિત કેરામે તુમુહુ બાદા માઅ આરી પરમેહેરુ કૃપામે ભાગીદાર હાય.

⁸ ઇયામે પરમેહેર માઅ સાક્ષી હાય, કા આંય ઇસુ ખ્રિસ્તુ સમાન પ્રેમ કીને તુમનેહે બાદાહાને મીલા ઈચ્છા રાખુહુ.

⁹ આંય એ પ્રાર્થના કીહુ કા એક-બીજા માટે તુમા પ્રેમ, જ્ઞાન આને બાદા પ્રકારુ હોમુજુ આરી આજી બી વાદતો જાય.

¹⁰ કા તુમુહુ બાદા કેતા હારી ગોઠીહીને ઓખી સેકા, આને ઇસુ ખ્રિસ્તુ ફાચે આવુલો સમયુહી હુદી નિર્દોષ આને પવિત્ર રેજા આને ઠોકર નાય ખાય સેકા.

¹¹ પેન પરમેહેરુ મહિમા આને પ્રસંશા માટે તીયા ધર્મી કામુકી ભરપુર વેતા જાઅ, જો ઇસુ ખ્રિસ્તુ મારફતેજ ઉત્પન્ન વેહે. આને પરમેહેરુ સ્તુતિ આને મહિમા વેતી રીઅ.

પાઉલુ જેલ જાવુલી કી સુવાર્તામે વાદારો

¹² ઓ પાવુહુ, આંય ઈચ્છા રાખુહુ કા તુમુહુ ઇ જાંયલ્યા કા માઅ આરી જે ઘટના વેયીહી તીયાકી હારી સુવાર્તાજ વાદારો વેયોહો,

¹³ ઇહી લોગુ કા મોડા રાજા રાજમેહેલુ સૈનિકુ બાદી ટુકળી આને બાકી બાદા લોકુહુને ઇ માલુમ વી ગીયોહો, કા આંય ઇસુ ખ્રિસ્તુ સેવા કેરા લીદેજ જેલુમે હાય.

¹⁴ આને પ્રભુમે જે વિશ્વાસી પાવુહુ હાય, તીયામેને ખુબુજ માને જેલુમે જાંઅ લીદે વિશ્વાસ રાખીને પરમેહેરુ વચન બહાદુર વીને ઉનાવા ખાતુરે હિંમત કેતેહે.

¹⁵ કાયક લોક તા જલનુ કી આને ઝગળા લીદે ખ્રિસ્તુ હારી સુવાર્તા પ્રચાર કેતાહા, પેન કાયક લોક હારા ઈરાદાકી પ્રચાર કેતાહા.

¹⁶ કાયક લોક જે હારા ઈરાદાકી પ્રચાર કેતાહા, તે લોક માઅ આરી પ્રેમ રાખુલો લીદે કેતાહા કાહાકા તે જાંતાહા કા આંય હારી સુવાર્તા રક્ષણુ ખાતુરે જેલુમે બંદ હાય.

¹⁷ પેન કાયક ખારાબ ઈરાદાકી ઇ વિચારીને પ્રચાર ઇસુ ખ્રિસ્તુ પ્રચાર કેતેહે, કા એહેકી કેરા કી પાઉલુલે જેલુમે વાદારે તકલીફ વેરી.

¹⁸ કાયજ તકલીફ નાહ, દરેક પ્રકારુકી નેતા ખારાબ ઈરાદાકી નેતા હારા ઈરાદાકી ખ્રિસ્તુ હારી સુવાર્તા પ્રચાર કેરામે આવેહે, ઈયા ખાતુરે આંય ઇયાકી ખુશ હાય આને ખુશ બી રેહે.

જીવતો રેવુલો ખ્રિસ્ત હાય

¹⁹ કાહાકા આંય જાંહુ તુમા પ્રાર્થના મારફતે આને ઇસુ ખ્રિસ્તુ મોક્લુલી પવિત્રઆત્મા મદદુ મારફતે, તીયા પ્રતિફલ જેલુમે માઅ ઉદ્ધાર પામુલો વેરી.

²⁰ માઅ ખુબુજ ઈચ્છા આને આશા એ હાય, કા આંય કેલ્લીજ ગોઠીમે નાય નાજ્વાવુ, પેન મામે ઇસુ ખ્રિસ્તુમે ગોગુલી હિમત રેઅ, જેહેકી કા ફાચલા દિહુમે કેલો. કાદાચ આંય જીવતો રીવ્યુ કા મોય જાંવુ આંય માઅ પુરા જીવનુકી ઇસુ ખ્રિસ્તુ સન્માન કેતો રેહે.

²¹ કાહાકા આંય જીવતો રેહે તા ઇસુ ખ્રિસ્તુ માટે જીવતો રેહે, આને મોય જાહે તા માઅ માટે લાભ વેરી.

²² પેન કાદાચ શરીરુ જીવતો રીવ્યુ તા ઇસુ ખ્રિસ્તુ માટે લાભદાયક કામ કી સેકેહે, ઈયા ખાતુરે આંય નાહ હોમજી સેકતો કા કાય પસંદ કિવ્યુ.

²³ કાહાકા આંય બેનું વોચ્ચે લોટકી રીયોહો, મન તા કેહે કા શરીરુમે મોયને ઇસુ ખ્રિસ્તુ પાહી જાયને રીવ્યુ, કાહાકા ઇ ખુબુજ હારો હાય.

²⁴ પેન તુમા મદદ કેરા ખાતુરે માને શરીરુમે જીવતો રેવુલો વાદારે જરુરી હાય.

²⁵ આને માને ઈયા ભરોષો હાય, ઈયા ખાતુરે આંય જીવતો રેહે આને તુમા બાદા આરી રીને તુમનેહે વિશ્વાસુમે મજબુત વેરા આને તીયામે ખુશ રાંઅ ખાતુરે મદદ કેહે.

²⁶ કા જાંહા આંય ફાચે તુમા આરી રેહે, તાંહા તુમુહુ માંઅ લીદે ખ્રિસ્ત ઇસુ વિશે આજી બી વાદારે ઘમંડ કી સેકાહા.

²⁷ ખાલી ઓતોજ કેરા કી તુમા ચાલ-ચલન ખ્રિસ્તુ સુવાર્તા યોગ્યો રેઅ, કા કાદાચ આંય આવીને તુમનેહે હીવ્યુ, કા નાય બી આવુ, તુમા વિશે ઇ ઉનાવુ કા તુમુહુ એક મન આને એક ધ્યાન વીને હારી સુવાર્તા વિશ્વાસુ ખાતુરે મેહનેત કેતા રેતાહા.

²⁸ આને કેલ્લી બી ગોઠીમે વિરોધ કેનારાહાને બીતા નાહ. એ તુમા હિંમત તીયાં માટે નાશુ ચોખ્ખી નિશાણી હાય, પેન તુમા માટે ઇ પરમેહેરુ વેલેને ઉદ્ધારુ નિશાણી હાય.

²⁹ કાહાકા ઇસુ ખ્રિસ્તુ લીદે તુમાપે કૃપા વીયી કા તુમુહુ નાય ખાલી તીયાપે વિશ્વાસ કેરા પેન તીયા માટે દુઃખ બી ઉઠાવા.

³⁰ આને તુમનેહે તેહેકીજ દુઃખ વેઠુલો હાય જેહેકી તુમુહુ માને ફિલિપી શેહેરુમે દુઃખ સહન કેતા હેયોહો, આને આમી બી તુમુહુ ઉનાતાહા કા તેહેડોજ દુઃખ સહન કી રીયોહો.