फिलिप्पी 3 - डोटेली नयाँ करार

जीवनको लक्ष्य

¹ छाड्डीबार मेरा बिश्वासि भाइन हो, प्रभुमि आनन्दित होउ। त्यइ कुरणी तमनलाइ दोहर्याउन म झर्को माण्नैन, रे त्यइ कुरणीले तमनलाइ झुटा शिक्षक बठेइ सुरक्षित राख्द्या हो।

² तिन मान्सन बठेइ होस अर्या जइले कुकुरका जसो ब्यबहार अददाहान, जइले ननिका काम अददाहान। तिन मान्सन बठेइ होस अर्या जइले भण्नाहान कि उद्दार पाउनाइलाइ खतना भया हुनु पणन्छ।

³ क्याकि हाम परमेश्वरका आत्मामी आराधना अद्द्या, रे येशू ख्रीष्टमी घमण्ड अद्द्या रे मानब प्रयासमी भरोसा नराख्द्या मान्स हौ, जो साच्ची परमेश्वरका मान्सन हुन।

⁴ पइलगइ मसित आफनो प्रयासमी भर पड्डा निका कारण छन। यदि कसइले सोचन्छ कि उइसित आफनाइ प्रयासमी भरोसा राख्द्या कारण छन भण्या मेरा त झिक बड्ता कारण छन।

⁵ जब म जन्म्या आठ दिन भयाथ्यो, तब परमेश्वरले आज्ञा अर्या अनसार मेरो खतना भया हो। म जन्मिया बठेइ इस्राएल देशको हु, बेन्यामीन कुलको हु, मेरा पुर्खा सब हिब्रु हुन तबइकिलाइ म एक हिब्रु हु, फरिसि मान्स भइबर मइले मोशाको कानुन कडाइसित पालन अर्या छु।

⁶ जोसका बारेमी हो भण्या म मण्डलिलाइ सताउन्या हु, यहुदि कानुन पालन अद्द्या बारेमी भणन्या हो भण्या, म धर्मि मान्स थ्या, क्याकि मइले तिन सब कानुन पालन अर्याथ्या।

⁷ तर जति सब चिज मेरा निउति फाइदाको थ्या, तिन सब चिज मइले आब ख्रीष्ट सितका सम्बन्धका लाग्दा हानि जसाइ माण्या।

⁸ क्याकि म मेरा प्रभु येशू ख्रीष्टलाइ जाण्न चाहानउ जो सब चिज भण्ना बहुमुल्य छन। म सब कुरणीलाइ बेकारका माण्नौ। जइकि निउति सब कुरणी छाडया छु, रे तिन सबलाइ फोहर कुरणी जसाइ बेकार माण्नउ, ताकि म पूरा रुपमी ख्रीष्टको हुन सकु।

⁹ रे म ख्रीष्टसित एकतामी हुन सकु, रे मेरो धार्मिकता मोशाको कानुन पालन अर्या आधारमी होइन, तर परमेश्वरले दिन्या धार्मिकताको आधारमी हो, जो ख्रीष्टमी मेरो बिश्वास भया हुनाले मान्तर आउछ।

¹⁰ म ख्रीष्टलाइ जण्न रे अनुभव अद्द चाहानउ। रे उनलाइ मर्या बठेइ जिउना बनाउन्या सक्ति अनुभव अद्द चाहानउ, रे उनरो मराइमि उन जसा भइबर उनरा दु:खमी सहभागी हुन सकु।

¹¹ ताकि म मर्या बठेइ जिउनो हुन सकु।

लक्ष्य तिर अगाडी बड्डु

¹² मइले यिन सब कुरणी पइल्ली बठेइ पाइ सक्या छु, अथवा सिद्द भइ सक्या छु भणबर म दाबि अदइन, तर म सिद्द मान्स हुनाइ प्रयास अददाछु जइकी निउति येशू ख्रीष्टले मलाइ छान्या छन।

¹³ बिश्वासि भाइन हो, म जाण्नउ कि म तइ लक्ष्य सम्म त पुग्या आथिन, तर एक काम म अद्दउ कि जी पइल्ली भया छ तइका बारेमि बिसरिबर पछा हुन्या कुरणीकिलाइ लगातार कठीन मिहिनत अरिबर अगाडी बड्डउ।

¹⁴ म पुरुस्कार पाउनाइ निउति निसाना तिर अगाडी बड्डउ। पुरुस्कार भण्या परमेश्वरले मलाइ स्वर्गमि बोलाउना छन, क्याकि येशू ख्रीष्ट मेरी निउति मर्या।

¹⁵ हाम आत्मिक रुपमि परिपक्व हुन्या सबले यिसेरी बिचार अददु पणन्छ। रे यदि तमरो आजी और बिचार छन भण्या परमेश्वरले तमनलाइ त्यो लगइ स्पष्ट पाडीदिन्या हुन।

¹⁶ तबइकिलाइ परमेश्वरले पइल्ली हामलाइ प्रकट अर्या सत्यता अनसार हामले काम अददु पणन्छ।

हाम स्वर्गका हु

¹⁷ बिश्वासि भाइन हो, तमन सब मेरो अनुकरण अर। हाम तमनसित हुनज्या जो ब्यबहार तमनले हाममि धेक्या तसो ब्यबहार अद्द्या मान्सलाइ लगइ अनुकरण अर।

¹⁸ मइले तमनलाइ भौत बेर भणि सक्या छु, अइल लगइ रोइबर भण्नाछु, भौत मान्सन तिनरो व्यबहारले यो धेकाउनाहान कि तिननले ख्रीष्ट क्रुसमि मर्या सन्देसलाइ बिरोध अददाहान।

¹⁹ तिनरो अन्त्य बिनास हो, तिनन आफ्नो शारीरिक अभिलाषा पुरा अददाइ मान्तर जिउनाहान, रे तिनन लाज लाग्द्या काममी घमण्ड अद्दाहान रे तिनन सदाइ संसारको चिज तिर मन लाउनाहान।

²⁰ तर हाम त स्वर्गका हु। हाम स्वर्ग बठेइ फर्किबर आउन्या एक मुक्तिदाता प्रभु येशू ख्रीष्टलाइ पखिरइछौ।

²¹ उनले जइ सक्तिको प्रभाबले सब कुरणीलाइ उनरो अधिनमी ल्याउन सक्दाहान, तसइ सक्तिले हामरा भौतिक शरीरलाइ आफ्नो महिमाको सरीरमि बदल दिनाहान।