ཕི་ལིབ་པི་པ། 4 - དོལ་པོ།

ལེའུ་བཞི་པ།

¹ འོ་དེ་ལེ་བརྟེན་ཏེ། ངའི་​མཛའ་བརྩེ་དིང་། སྙིང་ནས་​རྟག་ཏུ་​དྲན་ས་ཁྱེད་ཆོས་གྲོགས་​སྤུན་ཟླ་ཀྱ། ཁྱེད་ཀྱ་ནི་ངའི་དགའ་སྤྲོ་དིང་། གཙུག་རྒྱན་ཅོག་འདྲ་​ཡིན། ཇོ་བོ་ལེ་བརྟེན་ཏེ་བརྟན་པོ་སྡོད་ཅིག

སྐུལ་མ་​བཏང་བའི་སྐོར།

² ཡང་​བུ་མའ་ཨོ་དི་ཡཱ་​དིང་​སིན་ཏི་ཀེ་​ཁྱོད་གཉིས་​ལེ་​ཟང་​། ཇོ་བོའི་ནང་དུ་བློ་སེམས་མཐུན་དགོས་འོད་དིག་ཟིན་ངས་སྐུལ་མ་གཏོང་གྱོ་འོད།

³ ངའི་བདེན་པའི་​ལས་རོགས་​ཁྱོད་ཀྱིས་​ཟང་། བུ་མའ་​དེ་གཉིས་​ལེ་​རོགས་རམ་​གྱིས་ཟིན་ངས་ཞུ་བ་འབུལ་གྱོ་འོད། ཅི་​ལེ་​ཟེར་​ནི། བུ་མའ་དེ་གཉིས་ཀྱིས་ངའི་ལས་རོགས་ཀཱ་ལེ་མེན་དིང་། ངའི་ལས་རོགས་གཞན་མ་ཀྱ་ལེ་​གཏམ་བཟང་​ཤོད་རྒྱུ་ཆེད་དུ་འབད་བརྩོན་བྱས་བྱུང་། བུ་མའ་དེ་གཉིས་​ཀྱི་མིང་ནི་མཐའ་​མེད་པའི་ཚེའི་མིང་དེབ་ནང་ལེ་བྲིས་འོད་དིག

⁴ ཇོ་བོ་ལེ་བརྟེན་ཏེ་དུས་​རྒྱུན་དུ་​དགའ་སྤྲོ་​གྱིས་ཤིག ངས་​ཡང་དང་ཁྱེད་ཀྱ་ལེ་དགའ་སྤྲོ་​གྱིས་​ཟིན་ཟེར་ལས་བགྱིད་འོད།

⁵ ཁྱེད་ཀྱ་ཀྱི་སེམས་དུལ་པོ་དེ་ནི། མི་ཡེ་རེས་ཧ་གོ་རུ་འཇུག་དགོས་འོད་དིག ཇོ་བོ་མགྱོགས་པོ་ཕེབས་འོང་གྱི་དིག

⁶ སེམས་ཁྲལ་གཅིག་ཟང་མ་བྱས་ཏེ། དོན་ཡེ་རེའི་ཆེད་དུ་གསོལ་བ་སྨོན་ལམ་གྱི་བརྒྱུད་ནས་དཀོན་མཆོག་ལེ་ཐུགས་རྗེ་ཆེ་ཞུས་ཤིག

⁷ ཡང་​བློ་​ཡུལ་​ལེ་​མེད་མེད་དཀོན་མཆོག་གི་ཞི་བདེ་​དེས་ཁྱེད་ཀྱ་ཀྱི་བློ་སེམས་དེ། སྐྱབས་མགོན་​ཡེ་ཤུའི་བརྒྱུད་ནས་བསྲུང་གནང་གྱི་དིག

⁸ མཇུག་མཐའ་མ་དེ་ལེ། ཁྱེད་​ཆོས་གྲོགས་​སྤུན་ཟླ་ཀྱ། ཁྱེད་ཀྱ་ཀྱིས་​བདེན་པ་ཅི་ཡིན་དི་དིང་། བརྩི་བཀུར་ཅི་ཡིན་དི་དིང་། དྲང་བདེན་ཅི་ཡིན་དི་དིང་། ཡང་དག་པ་ཅི་ཡིན་དི་དིང་། ཡིད་དུ་འོང་བ་ཅི་ཡིན་དི་དིང་། སྙན་པོ་ཅི་ཡིན་དི་དིང་། བཟང་པོ་ཅི་ཡིན་དི་དིང་། བསྟོད་འོས་པ་ཅི་ཡིན་དི་དོན་དེ་ཡེ་རེ་ལེ་བསམ་བློ་གཏོང་ཞིག

⁹ ཁྱེད་ཀྱ་ཀྱིས་ང་ནས་ཅི་བསླབས་པི་དིང་། དང་ལེན་བྱས་པི་དིང་། ཐོས་པི་དིང་། མཐོང་པི་དེ་ཀྱ་ལེ་ཉམས་ལེན་བགྱིད་དགོས་འོད་དིག ཡང་ཞི་བདེ་གནང་མཁན་དཀོན་མཆོག་ནི་ཁྱེད་ཀྱ་དིང་སྐྱེན་ལེ་བཞུགས་གནང་འོད་དིག

ཞལ་འདེབས་ཕུལ་ལི་དེ་ལེ་ཐུགས་རྗེ་ཆེ་ཞུས་པ།

¹⁰ ཁྱེད་ཀྱ་ཀྱིས་​ད་ལྟ་​ཡང་དང་ངའི་སྐོར་ལེ་སེམས་ཁྲལ་བགྱིད་འོད་ཕེན། ངས་ཇོ་བོ་ལེ་བརྟེན་ཏེ། དགའ་རི་འཇུ་གུ་བགྱིད་འོད། སྔོན་མ་​ནས་ཕེན་ཁྱེད་ཀྱ་ཀྱིས་ང་​ལེ་ངོ་ཐོག་​སེམས་ཁྲལ་བྱས་ནའང་། ང་ལེ་རོགས་རམ་བགྱིད་རྒྱུ་གོ་སྐབས་དེ་མ་བྱུང་པི་དིག

¹¹ ང་​ལེ་དགོས་པ་ཅི་གང་མེད་དི་རྐྱེན་གྱིས་འོ་འདི་གི་ཟེར་རི་མན། ཅི་ལེ་ཟེར་ནི། གནས་ཚུལ་​ཅི་ཞིག་གི་འོག་ཏུ་རང་གི་བློ་​ཚིམ་​པི་བགྱིད་རྒྱུ་གོམས་གཤིས་དེ་ང་ལེ་ཆགས་འོད་དི་མ་ཟད།

¹² ངས་​སྐོམ་པོའི་འཚོ་བ་དིང་། ཕུན་སུམ་ཚོགས་པའི་​འཚོ་བ་​གཉིས་ཀ་སྐྱེལ་​མྱངས་འོད། གྲོད་པ་འགྲང་བོ་​དིང་​ལྟོགས་པ། ལྷག་མ་ཡང་ནི་ཆད་པ། གནས་ཐང་ཡེ་རེ་ལེ་ཅི་གི་བྱས་ཏེ་བཟོད་སྒོམ་བགྱིད་རྒྱུ་གོམས་གཤིས་དེ་ང་ལེ་ཆགས་འོད།

¹³ ང་ལེ་སྟོབས་ཤུགས་གནང་མཁན་གྱི་བརྒྱུད་ནས་ངས་ཡེ་རེ་​བགྱིད་ཐུབ་གྱོ་འོད།

¹⁴ ཡིན་ནའང་། ང་​ལེ་དཀའ་ངལ་​མྱོང་​རྒྱ། ཁྱེད་ཀྱ་ཀྱིས་​ང་​ལེ་​ཞལ་འདེབས་ཀྱི་རོགས་ལམ་བྱས་པི་​དེ་ནི་དགའ་མོ་ཡིན་དིག

¹⁵ ངས་གཏམ་བཟང་​དང་པོ་ཤོད་​རྒྱ། ང་མ་ཀེ་དོན་ཡཱ་ལུང་པ་ནས་ཁ་བྲལ་ལི་རྗེས་ལེ། ཁྱེད་ཀྱ་ཀྱིས་མ་གཏོགས། ཆོས་ཚོགས་གཞན་མ་སུ་ཞིག་གིས་ཟང་། ང་ལེ་ཞལ་འདེབས་ཀྱི་རོགས་རམ་མ་བྱས་པི་དེ་ནི། ཁྱེད་ཕི་ལིབ་པི་པ་ཀྱ་ཀྱིས་ཧ་གོ་གོ་བ་ཡིན་དིག

¹⁶ ང་​ཐེ་ས་ལོ་ནི་ཀེའི་​རྒྱལ་ས་ལེ་འོད་རྒྱ་ཟང་། ཁྱེད་ཀྱ་ཀྱིས་ང་ལེ་​ཞལ་འདེབས་​ཀྱི་རོགས་རམ་ལན་མ་ཁ་ཤས་བགྱིད་མྱངས་འོད་དིག

¹⁷ ད་ལྟ་ངས་རང་གི་དོན་ལེ་​ཞལ་འདེབས་ཀྱི་རོགས་རམ་​འཚོལ་ལི་མན། ངས་ཁྱེད་ཀྱ་ཀྱི་དོན་ལེ་དཀོན་མཆོག་གི་དྲུང་དུ་ཕན་པའི་འབྲས་བུ་འཚོལ་གྱོ་འོད།

¹⁸ ཁྱེད་ཀྱ་ཀྱིས་ཨེ་པབ་རེ་​དི་ཁོའི་བརྒྱུད་ནས་ཅི་བསྐུར་རི་དེ་འབྱོར་ཏེ། ང་ལེ་ཅི་དགོས་པ་དེ་ཡེ་རེ་འོད་དི་མ་ཟད། ལྷག་མ་ཟང་འོད་ཕེན་ངའི་ཡིད་ཚིམ་འོད། ཁྱེད་ཀྱ་ཀྱིས་བསྐུར་རི་ཞལ་འདེབས་ཀྱི་རོགས་ལམ་དེ་ནི། དཀོན་མཆོག་གི་ཐུགས་​དགྱེས་པའི་དྲི་ཞིམ་གྱི་མཆོད་པ་​དིང་ཅོག་འདྲ​་​ཡིན་དིག

¹⁹ ཡང་ངའི་དཀོན་མཆོག་​གིས་རང་གི་ཕུན་སུམ་ཚོགས་པའི་གཟི་བརྗིད་དིང་བསྟུན་ཏེ། སྐྱབས་མགོན་​ཡེ་ཤུའི་བརྒྱུད་​ནས་ཁྱེད་ཀྱ་ལེ་​དགོས་པ་​ཅི་འོད་ཡོད་དེ་​ཡེ་རེ་བསྐང་གནང་གྱི་དིག

²⁰ འུ་ཀྱ་ཀྱི་དཀོན་མཆོག་དིང་​ཡབ་​ཁོང་ལེ་དུས་རྒྱུན་དུ་གཟི་བརྗིད་དིང་བསྟོད་པ་འཐོབ་པར་ཤོག ཨ་མེན།

མཇུག་​མཐའི་​འཚམས་འདྲི།

²¹ སྐྱབས་མགོན་​ཡེ་ཤུའི་མཚན་ནང་​ལེ་​དད་པ་​བགྱིད་​མཁན་​རེ་རེ་ལེ་འཚམས་འདྲི་བཀྲ་ཤིས་བདེ་ལེགས་ཞུས་འོད། ང་དིང་​སྐྱེན་​ལེ་​འོད་ཡོད་​ཆོས་གྲོགས་སྤུན་ཟླ་ཀྱ་​ཀྱིས་ཟང་། ཁྱེད་ཀྱ་ལེ་འཚམས་འདྲི་བཀྲ་ཤིས་བདེ་ལེགས་ཞུ་འདུག

²² དད་པ་བགྱིད་མཁན་ཡེ་རེ་དིང་། དམིགས་བསལ་རྒྱལ་པོ་​ཆེན་པོ་སེ་བཟིར་གྱི་​ཕོ་བྲང་​ནང་​ལེ་​གཡོག་པོ་རྒྱུགས་མཁན་ཀྱ་ཀྱིས་ཟང་། ཁྱེད་ཀྱ་ལེ་འཚམས་འདྲི་བཀྲ་ཤིས་བདེ་ལེགས་ཞུ་འདུག

²³ ཇོ་བོ་སྐྱབས་མགོན་​ཡེ་ཤུའི་​ཐུགས་རྗེ་​གཟིགས་སྐྱོང་དེ་ནི། དུས་རྒྱུན་དུ་ཁྱེད་ཀྱ་ཀྱི་སེམས་ནང་ལེ་གནས་པར་ཤོག ། ། །