Nyuuth 10 - JAM DE NHIALIC 2011

Tunynhial ku Awerek thiin Duɔlic

¹ Na wën, ke ya tïŋ tunynhial däŋ ril, ke bɔ̈ piny nhial, aceŋ luät cït man ë lupɔ, ku ceŋ mïït ë deŋ ë yenɔm, ku cït nyin akɔ̈l, ku cït cök mëën ke mac.

² Ku muk awerek thiin pɛtic ë yecin: go cöök cuëc tuɛɛl ë wɛ̈ɛ̈ric, ku tueel cöök cam piny,

³ ku cööt ë röl dït, acït man ë köör të kiiu en: na wën, aacï cööt, ke deŋ määr raandhorou.

⁴ Na wën, aacï deŋ määr raandhorou, ke yɛn, an, gäär: guɔ röl piŋ abɔ̈ nhial röl luel en, an, “Mony kak ë lueel määrëdeŋ kadhorou du ke gäär!”

⁵ Na wën, ke tunynhial wën cä tïŋ ke kääcë wɛ̈ɛ̈ric ku piny, ke jɔ ciin cuëc yaak nhial,

⁶ ku lueel gutguut në Raan pïïr aɣet athɛɛr ya, Raan ë cak nhial, kekë ka nu thïn kedhie, ku ciɛk piny kekë ka nu thïn kedhie, ku ciɛk wɛ̈ɛ̈r kekë ka nu thïn kedhie, an, “Acïn agääu bï bɛ nu!

⁷ Ku në aköölkë yiic kööl ke röl ë tunynhial ee kek dhorou, të bï en kaaŋ gɔl ë kuöth, ke këcïmoony de Nhialic abï thök, acït ɣɔn cï en e lɛ̈k tït lïïmke.”

⁸ Go röl wën cä piŋ ke bɔ̈ nhial, go bɛ jam ke yɛn, an, “Lɔ, nöm awerek thiin nu ë tunynhial ciin tuny kääc ë wɛ̈ɛ̈ric ku piny.”

⁹ Guɔ lɔ tëde tunynhialë, la ku lɛ̈k en, an, “Gämë yɛn awerek thiinë.” Go a yɔ̈ɔ̈k, an, “Ŋö, cam, thöl, ku abï yï tɔ kec yäc, ku abï tamëtam ë yïthok cït man ë kiëc.”

¹⁰ Guɔ awerek nööm ë tunynhial ciin, ku ja cam thäl, go tamëtam ë yathok cït man kiëc: na wën, acä ye cam, ke ya jɔ yäc kecëkec.

¹¹ Go a yɔ̈ɔ̈k, an, “Yïn bï jam dhil bɛ guiir ë kɔc juëc nïïm, ku juöör nïïm, ku kɔc jam ë thok mɛɛn nïïm, ku meliik nïïm.”