Tobit 9 - MUMA MALER 2015

Nyasi mar kend Tobias

¹ Bang’ mano Tobias norango Rafael, mowachone niya,

² “Azarias owadwa, kaw jotich ang’wen kod ngamia ariyo, idhi Rages

³ e dala Gabael mondo imiye risit, kendo ilos kode wach pesagi. Eka inyise obi e nyasi mar kendna.

⁴ Ing’eyo ni nyaka bed ni wuora kwano ndalo, kendo odiechieng’ kodiechieng’ ma watieko kaeri, koro chando chunye.

⁵ To ang’eyo ni isewinjo gima Raguel osewacho kokwong’ore ni obiro timo,, kendo an bende kuong’ruokneno otueya.” Kuom mano Rafael nowuok modhi Rages gi jotich ang’wen kod ngamia ariyo. Ne gichopo e od Gabael, kendo Rafael nomiye risit, eka nonyise wach kend Tobias, kendo nokwaye mondo obi e nyasi mar kendno. Gabael nokwanone gunde mag fedha, motwang’ dhogi, mi ne gitueyogi e dieng’e ngamia.

⁶ Kinyne gokinyi mang’ich, ne giwuok kaachiel ka gidhi e nyasino, kendo ka ne gichopo e od Raguel, ne giyudo Tobias kachiemo. Nochung’ momoso Gabael, to Gabael nomuoch gi ywak kawacho niya, “In wuowi malong’o ma wuod ng’ama ber, ma ok nyal yud gimoro marach kuome! Adier, wuoru en ng’ama kare kendo ma jang’wono mokadho! Ruodh Polo mondo oyie oguedhi gi chiegi kaachiel gi wuon kod min mare. Opak Nyasaye mosemiyo aneno kido mangima mar Tobit owadwa!”