Tobit 7 - MUMA MALER 2015

Wach Raguel

¹ Kane gidonjo Ekbatana, Tobias nowacho niya, “Azarias owadwa, tera ka Raguel owadwa piyopiyo.” Eka Azaria notere ka Raguel, mi giyudo ka Raguel obet e dhoranga dalane. Kane gisemose, nodwokogi niya, “Misawauru owetena, kendo erokamanouru kuom biro ma ubirogo limowa.” Bang’ mano noterogi e ode,

² Mowacho ni Edna chiege niya, “Mano kaka rawerani chalo gi Tobit owadwa!”

³ Edna nopenjogi kuma giaye, mi ne gidwoke ni gin jodhood Naftali mane odar moter Nineve.

⁴ Eka nochako openjogi niya, “Bende ung’eyo Tobit

⁵ owadwa?”

⁶ Mi ne gidwoke ni, “Ongima maber.” To Tobias nomedo nyise ni, “En e wuora.”

⁷ Kane Raguel owinjo kamano, noa malo piyopiyo mi onyodho Tobias kendo oywak.

⁸ Bang’e, kane chunye osekue, nowacho ni Tobias niya, “In jahawi, nyathina, nikech in wuod ng’ama long’o ahinya. To awuoro kaka en hawi marach moloyo mondo ng’ama ber kendo ma jang’wono kamano, odok muofu!” Eka nokwako Tobias ka oywak,

⁹ kendo Edna chiege kod Sara nyare bende ne joywak ka giparo Tobit. Bang’e Raguel nonegonigi rombo mondo gicham, kendo ne girwakogi gi mor maduong’ ahinya. Kane giselwokore mi gibet piny mondo gichiem, Tobias nowacho ni Rafael niya, “Azarias owadwa, yie ipenj Raguel mondo omiya Sara nyamera.”

¹⁰ To Raguel nowinjo gima owacho, omiyo nodwoke niya, “Chiem kendo imethi, kendo ibed mamor otienoni. Onge ng’ama nyalo kawo Sara nyara kata matin, mak mana in, nyathi owadwa. Kata da wach bed machal nadi, to chik ok oyiena mondo amiye ng’at moro machielo, nikech in e wadgi machiegni moloyo, monego kende. To kata kamano wuoda, nyaka awachni adier.

¹¹ Asetemo yudone dichwo kuom joodwa nyadibiriyo, to giduto ne githo e otieno kotieno mane moro ka moro dhi kode e od nindo. To e sani wuoda, chiem achiema kendo imethi. Ruoth Nyasaye biro miyi ng’wonone kod kue.” To Tobias nodwoke niya, “Chiemo gi metho ok nyal donjona kapok itieko wachnani.” Mano omiyo Raguel nowachone ni, “Ber! Chik mondiki e kitap Musa ochiko ni mondo obed mari. Kamano Nyasaye manie polo bende ochiko ni mondo obed mari. Mano omiyo amiyi nyameru kageno ni ibiro rite maber. Chakre kawuono in owadgi, to en bende en nyameru. Amiyigo chakre kawuono nyaka chieng’. Ruodh Polo mondo oguedhi gotienoni, nyathina, kendo omiyi hape kod kue moa kuome.”

¹² Eka Raguel noluongo Sara nyare, kendo kane Sara osebiro, nomako lwete momiye Tobias kowacho niya, “Amiyigo mondo irite maber. Chik mondiki e kitap Musa ochiko ni mondo omiyigo, obed chiegi. Kawe, itere dala wuoru ka chunyi oyangore.”

¹³ Eka Raguel nowichore ir min nyako, mowachone ni mondo okel kalatas mindikoe. Nondiko wach kendno e kalatasno, konyiso kaka nochiwo Sara nyare ni Tobias mondo obed chiege kaluwore gi chik manie kitap Musa.

¹⁴ Bang’ mano ne gichako chiemo gi metho.

¹⁵ Raguel nowacho ni Edna chiege niya, “Nyamera, dhiyo ilos ot mar ariyo maiye mondo iterie nyarwa.”

¹⁶ Kamano Edna nodhi mopedho kitanda e odno kaka chwore nosenyise, kendo notero nyare kuno. Eka noywak, to bang’e noyweyo pi wang’e, kowacho ni nyare niya, “Bed gi kue, nyathina. Kamoro Ruodh Polo biro miyo kuyo ma in go lokre mor. Bed abeda gi kue, nyathina!” Bang mano, nowuok moa.