Tobit 6 - MUMA MALER 2015

¹ Kane min Tobias owinjo wechego, noyweyo pi wang’e mi oweyo ywak.

Wach Rech

² Kamano rawerano ne jowuok kaachiel gi malaika, kendo guoggi bende nodhi kodgi. Ji ariyogo nodhi nyime gi wuoth kanyakla, kendo kane piny ochope odhiambo, ne gibworo e bath aora Tigris.

³ Rawerano nodh e dho pi mondo olwok tiende, mi rech maduong’ nochikore koa e pi, mi both omwonyo tiende!

⁴ Rawerano nogoyo uwi, to malaika nowachone niya, “Mak rechno! Kik iweye odhi!.” Eka rawerano noyudho rechno mogolo oko e dho aora.

⁵ Malaika nochako owachone niya, “Bare, mi igol kedhno gi adundo kod chuny, ikan, nikech gin yien mithiethogo, to dhokchinde ema mondo iwiti.”

⁶ Omiyo rawerano nobaro rechno, mogolo kedhno gi adundo kod chuny. Eka notedo bathe konchiel mi gichamo, to bathe komachielo ne githolo. Bang’e ne gichako wuoth kendo, mi ne giwuotho nyaka gichopo machiegni gi piny Media.

⁷ Eka rawerano nopenjo malaika niya, “Azarias owadwa, en tuo mane ma adundo gi chuny kod kedhno mag rech thiedho?”

⁸ Malaika nodwoke ni, “Adundo gi chuny mag rechni iwang’o, kendo ithiedhogo dichwo kata dhako ma Satan kata Jachien chando, kendo, jachien ma kamano lal chuth ma ok chak ne ndache

⁹ Kedhno to ikonyruokgo kaka yadh awira mar wang’. Ka iwire e wang’ ng’at motimo kidayi kidayi marachere, mi ikudho kuonde motimo kidayi kidayigo to gichago.”

¹⁰ Kane gisedonjo e piny Media, mi koro gichiegni chopo Ekbatana,

¹¹ Rafael nolwongo Tobias niya, “Tobias, owadwa!” Mi Tobias noyiene ni, “An ka.” Eka malaika nowachone niya, “Otieno ma kawuononi ang’ wananind ka Raguel jadhoodu. En gi nyare ma nyinge Sara,

¹² to oonge gi wuowi kata nyako moro machielo maka mana Sarano. To in e jadhoodgi machiegni kode moloyo, omiyo onego Sara bed chiegi, moloyo bedo chi ng’at moro nono, kendo in ema wuon biro lamoni mwandune duto. En nyako mariek, kendo en jachir, bende en jaber ahinya. Wuon mare bende en ng’at mogen chutho.

¹³ In gi ratiro mar kendo nyakono, omiyo winji owadwa, otieno ma kawuononi abiro wuoyoni gi wuon mar mondo oyieni ikende. Kamano kwasea Rages mi wadok dala Raguel, to wanyalo timo nyasi mar kendnino. An gi adier ni raguel ok nnyal tami ni kik ikend nyareno, to bende ok onyal miye ng’ato nono mondo okende, nikech kapo ni otimo kamano to owinjore gi tho, kaluwore gi chik mondik e kitap Musa, nimar ong’eyo ni in ema chik oyieni mondo ikende moloyo jomoko duto, nikech in e watne machiegni moloyo. Omiyo owadwa, winj gima awachoni. Wabiro wuoyo kuom nyano gotienoni, kendo ang’ wanakwa Raguel mondo oyieni ikende. Kuom mano, chieng’ma waa Rages kwadok dala, to wanakawe, wadhi kode.”

¹⁴ To Tobias nodwoko Rafal niya, “Azarias owadwa, asewinjo ni nyakoni osemi chwo abiriyo mondo okende, to chwogo duto osetho e kinde ka kinde ma gidhi kode e od nindo. Bende asewinjo ka ji wacho ni jachien ema negogi.

¹⁵ Koro mano ema omiyo luoro omaka matin. Jachiendno ohero nyakono, omiyo ok onege, to ka dichwo moro otemo sudoi bute to jachiendno nege. An wuod wuora achiel kende, omiyo aluor ni ka atho, to mano dimi wuora gi mama mirima manyalo negogi, to bende gionge gi wuowi moro ma diyikgi.”

¹⁶ To malaika nopenje niya, “Wiyi osewil gi wach mane wuoru onyisi koso? Donge nowachoni ni mondo ikend mana nyako ma nyar dhoodu? Chik iti mondo iwinj gima awachoni, owadwa. Kik idew jachiendno, to in kend akenda nyakoni. Asingorani ni, otieno ma kawuononi ang’ nomiyigo mondo obed chiegi.

¹⁷ Ka usedhi e od nindo, to mondo ikaw adundo kod chuny mag rech chande, iketi e ubani mawang’. Eka tikne biro dum, kendo jachien biro biro winjo tigno, mi oringi.

¹⁸ Kamano mondo ing’eni ok nochak oduog but nyakono kendo ngang’. To kapok udhi nindo to nyaka ua malo uduto mondo ulem, kukwayo Ruodh Polo mondo obednu mang’won kendo oritu. Kik iluor, nikech Nyasaye ema noseyieroni nyakono nyaka nene, kendo in ema ibiro rese. Obiro yie dhi kodi, kendo awachoni adier ni, enonywolni yawuowi ma nobedni ka oweteni. Omiyo kik iriw gi kiawa.” Kane Tobias owinjo wach mane Rafael owachone, mi ong’eyo adier ni Sara en nyamin mare ma nyar dhoodgi, nochako here gi hera matut, ma koro chunye ne paro mana en kende!