Tobit 5 - MUMA MALER 2015

Jawuodh Tobias

¹ Tobias nodwoko wuon mare niya, “Wuora, abiro timo gik moko duto misewachona.

² To koro ere kaka dayud pesago kuom owadwano, nimar ok ong’eya, kendo an bende ok ang’eye. Ere ranyisi ma damiye mondo oyie koda, eka omiya pesago? To bende ok ang’eyo yo madaluw kadhi e piny Media.”

³ Eka Tobit nodwoko Tobias wuode niya, “Wan gi Gabael ne waketo sei e kalatas moro ma bang’e napogo ariyo, mondo ng’ato ka ng’ato kuomwa obed gi bathe achiel. Nakawo bathe konchiel, to bathe komachielo naketo kaachiel gi fedha. Koro en higni piero ariyo nyaka ne awene pesago! Omiyo koro nyathina, dwar ng’at ma ing’eyo ni igeno mondo oteri kuno. Wabiro chule kuom ndalo duto ma un kode nyaka chop uduogi. Kamano e kaka onego idhi mondo iom pesago kuom Gabael.”

⁴ Omiyo Tobias nowuok mondo odhi orang ng’ama ong’eyo yo madhi Media, gidhigo. Kane osewuok oko, nopo ka orado wang’ gi wang’ gi Rafael, to ne ok ong’eyo ni en malaika mar Nyasaye.

⁵ Ne openje ni, “Omera, ia kure?” Malaika nodwoke niya, “An ja-Israel ma jadhoodu, to asebiro mondo adwar tich kaeri.” Eka Tobias nopenje ni, “To bende dipo king’eyoe yo madhi e piny Media?”

⁶ Jalo nodwoke ni, “Ee, ang’eyo maber ahinya, nikech asedhi kuno ndalo mang’eny. Ang’eyo yore duto kata mana ka aumo wang’a, nimar asedhi Media ndalo mang’eny ka adhi limo Gabael, ma achiel kuom owetewa modak Rages e piny Media. En wuodh ndalo ariyo kia Ekbatana kidhi Rages, nimar Rages nie piny gode, to Ekbatana nie dier pap.”

⁷ Kane Tobias owinjo wechego duto, nowacho ni Rafael niya, “Yie irita ka, owadwa, mondo adhi anyis wuora, nikech adwaro ni mondo itera kuno. Abiro chuli kuom ndalo duto ma wan kodi.”

⁸ Jalo nodwoke ni. “Ber, ayie riti, to kik ideki.”

⁹ Tobias nodok ir wuon mare, mowachone ni oseyudo owadgi moro ma ja-Israel. Wuon mare nowachone niya, “Kele ka, mondo apenje ane libambane gi dhoodgi. Nyaka ang’e ka en ng’ama biro bedoni jaadiera e wuodhini, nyathina.” Kuom mano Tobias nowuok moluongo jalo kowachone ni, “Owadwa, bi; wuora dwaro neni.”

¹⁰ Eka malaika nobiro e ot, kendo Tobit nomose, mi nodwoko Tobit niya, “Nyasaye mondo oguedhi.” To Tobit nowachone ni, “Bende pod dayud gueth adier? An ng’at ma muofu ma ok nyal neno ler mar chieng’, kendo anyumora e mudho mana ka ng’ama otho ma ok nyal neno ler kendo. Kata obedo ni angima kamano, to achalo ng’ama otho, nikech awinjo ji kawuoyo, to ok anyal nenogi.” Malaika nodwoke niya, “Bed gi kue, nimar Nyasaye biro changi kapok ndalo mang’eny okadho. Omiyo bed abeda gi kue.” Bang’ mano Tobit nowachone niya, “Tobias wuoda dwaro dhi Media. Bende diyie udhi kode mondo inyise yo madhi kuno? Abiro chuli, owadwa.” Malaika nodwoke ni, “Ayie dhi kode, nikech ang’eyo yorego duto. Asedhi Media ndalo mang’eny, kendo aseng’ado e pewe kod gode duto man kuno, omiyo ang’eyo wang’yorene duto.”

¹¹ Eka Tobit nowachone niya, “Owadwa, diyie inyisae dhoodu kod libambau?”

¹² To malaika nodoke kapenje ni, “Dhoodwa to idwaro ng’eyo nang’o?” Tobit nowachone niya, “Adwaro ng’eyo malong’o ni in wuod ng’a kendo ni nyingi en ng’a.”

¹³ Malaika nodwoke ni, “An Azarias wuod Ananias ma jadhoodu marahuma cha.”

¹⁴ Kane Tobit owinjo kamano, nowachone niya, “A yaye owadwa, erokamano! Kik ine marach ni marang’o adwaro ng’eyo dhoodu. Adier, in jadhoodwa, kendo ia e dala maber kendo moluor. Ang’eyo Ananias gi Jathan, yawuowi ariyo ma yawuot Shemaya marahuma cha. Ne wathoro dhi kodgi lamo Nyasaye Jerusalem kanyakla, kendo nyaka nene pok giweyo yo makare. Joodu gin joma long’o, omiyo ia e dhoot maber. Erokamano ahinya kuom biro mibirogo ka.”

¹⁵ Eka Tobit nomedo wachone niya, “Abiro chuli siling’ apar odiechieng’ kodiechieng’, kaachiel gi pesa mikonyorigo e wuoth mana marom gi mago ma amiyo wuoda. To ka usetieko wuoth gi wuoda,

¹⁶ to abiro medi pesa moko e wi mago ma wawinjore.” Malaika nodwoke niya, “Wabiro tieko wuoth kode, omiyo kik idew gimoro. Ka wawuok wadhi to gik moko duto nodhi maber, kendo kwaduogo bende gik moko duto nobed mana kamano, nikech yo ber ahinya.”

¹⁷ Kane Tobit owinjo kamano, nowacho niya, “Nyasaye mondo obed kodi, owadwa.” Eka nowacho ni wuode niya, “Nyathina, ikri mondo udhi gi owadwani. Nyasaye manie polo mondo oritu e wuodhu, kendo odwoku ira ka ungima uduto. Kamano nyathina, malaika mare mondo owuoth kodu e yo, kendo oritu.” Bang’ mano, Tobias nogoyo ni wuon gi min oriti konyodhogi, mi owuok, kendo Tobit nowachonigi ni, “Wuothuru maber.”

¹⁸ Min mare to nochako ywak, kapenjo Tobit niya, “Ang’o momiyo ioro nyathina kuno? Donge en e ludhwa mwasirorego, kendo en e ma waore koni gi koni?

¹⁹ Chutho, pesa kende ok en gimoro ma dipim gi nyathiwa,

²⁰ kendo ngima ma Nyasaye osemiyowani bende oromowa.”

²¹ Tobit nodwoke niya, “Ok onego ibed gi paro ma kamano! Nyathiwa biro dhi kuno maber, kendo obiro dwogo kongima. Chieng’ dwoke, inine gi wang’i ka ongima, kendo onge gima ochame. Omiyo kik ibed gi paro ma kamano. Ooyo nyaminwa, kik chunyi chandre nikech ji ariyogo.

²² Malaika maber biro rito nyathiwa maber, mi oduog irwa kongima kendo komor.”