Tobit 4 - MUMA MALER 2015

Wach man kuom Tobias

¹ Chieng’ono, Tobit noparo fedha mane oseweyo ni Gabael e dala mar Rages e piny Media,

² mi noparo e chunye niya, “Kaka koro asekwayo Nyasaye mondo atho, ber mondo aluong Tobias wuoda anyise wach pesago kapok atho.”

³ Omiyo noluongo Tobias wuode, mowachone niya, “Kasetho, to ilos lienda maber. Bende mondo iluor meru kaka owinjore, kendo kik ijwang’e ndalo duto ma un kode, to itimne gik moko duto modwaro.

⁴ Nyathina, par masiche duto mane oneno ka en gi ichni. Omiyo ka otho to iyike buta e liel moyikae.

⁵ “Nyathina, kik iwe paro Nyasaye e ngimani duto, kendo kik ibed gi paro mar timo richo, kata mar ketho chikne. Bed gi timbe mabeyo e ngimani duto, kendo kik iluw yore mobam ngang’,

⁶ nikech ka timbeni beyo, to gik moko duto mitimo nodhi nyime maber, kaka gik moko duto dhi maber ni ji duto ma timbegi kare.

⁷ “Nyaka ipog gigi moko ni joma odhier, kendo kik ilok ng’eyi ni ng’at ma jachan, eka Nyasaye ok nolokni ng’eye.

⁸ Pim mich michiwo gi mwandu ma in-go. Ka in gi mwandu mange’ny, to mondo ichiw mang’eny; to ka in gi mwandu manok, to mondo ichiw manok. To kik ibed jamgundia kipogo gigi ni joma odhier,

⁹ nikech kichiwo mabup, to ikano mwandu mathoth ma chieng’ moro nokonyi ka inie chandruok.

¹⁰ Konyo joma odhier reso dhano e tho, kendo okonyo ji mondo kik dhi e mudho.

¹¹ Chutho, konyo jomodhier e misango maduong ahinya ma Ng’ama Duong’ Moloyo oyiego.

¹² “Nyathina, bed mabor gi timbe mag dwanyruok. Nyaka iyier mana nyako moro ma nyar dhoodwa ema mondo obed chiegi. Kik ikend nyako ma ok nyar dhoodwa, nimar wan nyikwa joanbi. Ket chunyi mondo ine ni kwerewa machon ma Nowa gi Ibrahim gi Isaka kod Jakobo, ne jokendo mana nyi dhoodgi giwegi, mi nyithindgi noyudo gueth, kendo gin ema ginikaw piny duto.

¹³ In bende nyathina, nyaka iher oweten i, kendo kik item jaro jowadu, nikech gin yawuotu gi nyiu. To gin ema nyaka iyier nyako achiel kuomgi obed chiegi. Ng’eni sunga kelo masira gi thagruok mang’eny; nyawo to kelo gombo gi dhier, nikech nyawo e min kech.

¹⁴ “Kik iwe kata mana odiechieng’ achiel kadhi, mak ichulo jotichni, to chulgi mana chieng’ ma gitiyoeno. Kamano ka itiyo maber ni Nyasaye, to iniyud pokni. Nyathina, bed motang’ kuom gik moko duto mitimo, kendo ritri maber kuom timbeni duto.

¹⁵ Kik itim ni ng’ato gima ok diher mondo otimni, kendo kik imethi nyaka chop imer, bende kik itim gima okadha ndaga.

¹⁶ “Pog chiembi ni joma kech kayo, kendo kaw lepi irwakgo joma wuotho duk. Nyaka ipog gimoro amora ma in go mang’eny ni joma odhier, kendo kipogonigi kamano, to kik ipognigi king’ur.

¹⁷ Bed mang’won kipogo makati gi divai e liete joma kare, to kik ipog ni joricho.

¹⁸ “Pile penj ng’ato ang’ata mariek wach mondo ong’adni rieko, kendo kik icha rieko moro amora mong’adni manyalo konyi.

¹⁹ Nyaka imi Ruoth Nyasaye duong’ kuom gik moko duto, kendo nyaka mikwaye mondo otelni e yoreni, mondo yoreni gi paroni ochop kare. Kik ipar ni ogendini duto yudo rieko machalre, to Ruoth Nyasaye owuon ema chiwo gik moko duto mabeyo. En ema oting’o ng’ato malo kohero, kata onyalo nyume piny nyaka e Piny Joma Otho, mana kaka odwaro. Nyathina, nyaka ipar wechegi ndalo duto, kendo kik gia e chunyi nyaka chieng’.

²⁰ “To koro nyathina, nyaka ahulni ni naweyo kilo mia adek mag fedha ni Gabael wuod Gabrias modak Rages e piny Media.

²¹ Omiyo kata ka wasebedo modhier kamano, to kik mano thag chunyi. Inibed gi mwandu mathoth kiluoro Nyasaye, kendo ibet mabor gi richo, kitimo gik malong’o ni Ruoth Nyasachi.”