Tobit 3 - MUMA MALER 2015

¹ Wachno nomiyo chunya odoko malit, kendo naywak ka achur, mi nachuogo wend ywak kama:

² “A Ruoth, in ng’ama kare, kendo timbeni duto bende ni kare. Yoreni duto gin yore mag ng’wono gadiera, kendo in jang’ad bura ni piny ngima.

³ Emomiyo Ruoth, para kendo ng’iya gi ng’wono. Kik isanda nikech richona gi kethona ma natimo ka ok aparo maber, kata kik isanda nikech timbe kwerena.

⁴ Wasetho e nyimi, kendo waseweyo chikeni’ emomiyo isechiwowa e lwet wasikwa, moseyakowa, kendo odarowa e pinywa, mi onegowa. Isemiyo ogendini duto misekeyowa kuomgi wuoyo kuomwa marach, ka ginyierowa kendo gijarowa.

⁵ Ayie ni buche duto miseng’adonwa kare, nimar itimona gima owinjore gi kethona, kod ketho mag kwerena, nikech ne ok warito chikeni, kendo ne ok wawuotho e nyimi gadiera.

⁶ Emomiyo koro timna mana kaka ihero. Yie ikaw ngimana, nikech agombo mondo ogola e pinyni, mondo achak alokra lowo. Tho berna moloyo ngima, nimar oseyanya kayiem nono, kendo chunya chandore mak wachi. “A Ruoth, arito bura mibiro ng’adona mondo iwarago kuom chandruoknani. Yie mondo adhi e dalana ma nyaka chieng’! A Ruoth, kik ilokna ng’eyi, nikech tho berna moloyo bedo mangima, nimar chandruok ma an-go ok wena thuolo, kendo aol gi winjo weche ma ji hangago.”

Wach Sara

⁷ Chieng’onogo, sara nyar Raguel ma nodak Ekbatana e piny Media, bende nochopo ka nyako matiyo ni wuon mare oyanye.

⁸ Noyudo osekend Sara nyadibiriyo, to Asmodeyo ma jachien marachie moloyo jochiende mamoko duto, nosenego chuogego duto achiel achiel, kapok gibet kode dichwo gi dhako. Mano emomiyo nyakono noyanye kawachone ni, “In iwuon ema inego chwogi! Isebedo gi chwo abiriyo, to pok iyudo hawi kata dichiel.

⁹ To kata kobedo ni chwogi tho kamano, to mano ok onyiso ni mondo ithagwa kaka ithagowani. Dhiyo ir chwogigo, mondo kik chieng’ moro wane nyathini ka!”

¹⁰ Chieng’no, Sara nokuyo kendo noywak ahinya, mi nodonjo e od wuon mare mondo odere kuno. To nochako oparo e chunye niya, “Kamoro dipo ka ji oketo wachni kuom wuora, ka giwachone ni, ‘Ne in gi nyako achiel kende mane ihero, to koro mirima osemiyo odere.’ Ooyo, ok anyal miyo wuora mirima ma dinege, to osedoko moti kama! Ok onego adera, to moloyo onego akwa Nyasaye oyiena atho athoya mondo kik achak awinj ayany ma kamago kendo.”

¹¹ Kuom mano nodhi ochung’ e dirisa koting’o bedene malo kendo olemo niya, “A Nyasach ng’wono, iduong’! Nyingi mondo oyud duong’ nyaka chieng’. Gik moko duto mane ichweyo, mondo omiyi duong’ mochwere.

¹² “Koro arangi, A Nyasaye, kendo chunya duto aketo kuomi

¹³ Yie igol chik mondo ogola e pinyni, mondo kik awinj ayany ma ji yanyago.

¹⁴ A Ruoth, ing’eyo ni aseritora maler, ma onge ng’at mosemula.

¹⁵ Ok aseketho nyingi, kata mana nying wuora bende ok aseketho, e piny mane odarwa mokelwaeni. “An e nyar wuora achiel kende, kendo oonge gi nyathi moro machielo madolamne mwandun e. Bende oonge gi owadgi kata watne moro ma dikenda, kendo ma dimi adwar bedo mangima. “Aseyiko chwo abiriyo, koro ang’o modongna ma dimi agomb bedo mangima? To ka ok iyie mondo igol ngimana to timna ngwono mondo kik achak awinj ayany ma kamago kendo.”

¹⁶ E sa mane Tobit gi Sara olemono, lemogi nochopo e nyim kom duong’ mar Nyasaye, kendo Nyasaye nowinjogi, omiyo nooro malaikane ma nyinge Rafael mondo okonygi giduto e thagruokgi.

¹⁷ Noore mondo ogol kuonde mane otimo kidayi kidayi marachere oko e wang’ Tobit, mondo ochak one ler mar Nyasaye kendo gi wang’e owuon. To bende noore mondo okaw Sara nyar Raguel omi Tobias wuod Tobit obed chwore, korese kuom Asmodeyo ma jachien marachie moloyo jochiende mamoko duto, nimar ne en dwaro mar Nyasaye mondo Tobias ema okend Sara, ma ok ng’at moro nono. Sa mane Tobit oa e laru kodonjo e ot, bende e sa mane Sara nyar Raguel olorie piny koa e ot mamalo kuma noyudo entie.