Tobit 13 - MUMA MALER 2015

Wach Sayun

¹ Tobit nower niya: “Apako Nyasaye mantie nyaka chieng’, nikech lochne osiko mochwere. En ema okumo ji,

² kendo en ema okechogi. Oloro ji e Piny Joma Otho, to bende ogologi gia e tho. Onge ng’ama nyalo tony e lwete!

³ Un nyikwa Israel, pakeuru e nyim ogendini, nikech kata obedo ni osekeyou e kind ogendini kamano,

⁴ to kuondego bende osenyisoue kaka oduong’. Pakeuru e nym ji duto, nimar en e Ruodhwa, kendo en e Nyasachwa. Adier, en e Wuonwa, Kendo en e Nyasaye mochwere.

⁵ “Kata obedo ni okumou nikech richou, to enong’wonnu uduto. Enogolu e kind ogendini mosekeyoue, mi ochouku kanyakla.

⁶ “Ka uduogo ire gi chunyu duto kod parou duto, kutimo timbe makare e nyime, to en bende noduog iru, kendo ok nochak opandnu wang’e kendo. Paruru gik mabeyo mosetimonu, mondo ugone erokamano matek. Miuru Ruoth duong’ nikech en Jang’ad Bura makare. Adier, pakuru Ruoth ma nyaka chieng’. An to apake gi wer, e piny mosedara mokelaeni. Amiyo oganda ma jaketho ng’eyo tekone gi duong’ne. Duoguru ire un joricho, kendo timuru timbe makare e nyime nimar dipo ka obedonu mang’won, mi okechou.

⁷ An to amiyo Nyasaye duong’. Adier, chunya mor gi Ruodh Polo.

⁸ Ji duto mondo ohul duong’ne e dhogi kendo owerne wende pak e Jerusalem.

⁹ In Jerusalem, dala maler, Nyasaye osechwadi mana nikech timbeni maricho, to kata kamano, obiro kecho joma kare.

¹⁰ Goni Ruoth Nyasaye erokamano mowinjore kode. Adier, mi Ruoth mochwere duong’, mondo ibed mamor kochak oger Hekalu mari. Nyasaye mondo odwok ji duto mane odar moter e tuech kendo okue chunygi ka gidak kuomi, kendo onyis jogi duto mathagore e tienge duto mabiro kaka oherogi.

¹¹ “Ler maduong’ norieny kuonde duto e piny, kendo ogendini mang’eny nobi, koa kuonde maboyo e tung’ piny duto, mondo gidag machiegni gi Nying’ Maler mar Ruoth Nyasaye. Ginibi ka giting’o mich ma gikelo ni Ruodh Polo. Joma odak kuomgi nobed mamor kuom tienge duto, kendo nying miluongo ni Dala Moyier nosiki kuom tienge duto mabiro.

¹² “Okuong’ ng’ato ang’ata mayanyi, kata mokethi! Adier, okuong’ ng’ato ang’ata momuko ohingani, kata mogoyo gorofa magi piny, kata mowang’o uti Joma geri to mondo oyud gueth ma nyaka chieng’.

¹³ Emomiyo, in Jerusalem,, inibed mamor nikech joma kare, nikech nochokgi kaachiel kuomi, kendo ginimi Ruoth mochwere duong’.

¹⁴ “Mano kaka joma oheri gin johawi! Adier, mano kaka joma bedo mamor nikech iyudo kue, gin johawi! Mano kaka joma oseb edo kokuyo nikech sand duto mosesandigo gin johawi, nimar gibiro bedo mamor ka gidak kuomi, kendo ka gineno gueth duto mibiro yudo e ndalo mabiro.

¹⁵ Chunya pako Ruoth Nyasaye, ma en Ruoth maduong’, nikech Jerusalem gi od Nyasaye nochak oger, mondo obedie nyaka chieng’.

¹⁶ “Dibed hawi maduong’ ka jadhoodwa moro odong’ie kata mana ng’at achiel mondo one duong’ni maler, kendo opaki, A Nyasach Polo! Rangeye mag Jerusalem ibiro gero gi kite mabeyo mag safir gi emerald, kendo ohinga duto noger gi kite ma nengogi tek. To gorofe mag ohinga mar Jerusalem noger gi dhahabu, kendo wigi noger gi dhahabu maber.

¹⁷ Wang’yore mag Jerusalem nolos gi kite makwar ma nengogi tek, kod kite mogol Ofir. Dhorangaye mag Jerusalem nobed kopong’ gi wende mag mor, kendo ute duto nower niya, ‘Aleluya! Nyasach Israel mondo omi duong’!’ Joma odak kuomi nopak Nying’ Maler nyaka chiueng’.” Mano e giko wend Tobit.