Tobit 12 - MUMA MALER 2015

Wach Rafael

¹ Kane kinde mar nyasi oserumo, Tobit noluongo Tobias wuode mowachone niya, “Nyathina, nyaka ine kaka dichul jawuodhi pesa mane wasingore ni wanachule. Ber mondo imiye pesa mang’eny moloyo kaka ne wawinjore kode.”

² Tobias nopenjo wuon mare niya, “Wuora, pesa adi mowinjore amiye kuom kony duto mosekonyago, nikech kata ka amiye nus mwandu mane wabirogo kode, to pod ok awang’?

³ Parie kaka osedwoka iri maber ka angima, kendo kaka osethiedho chiega, kendo kaka osekelo pesa! To bende parie kaka in bende koro osethiedhi. Ere gima onego amiye kuom tim maber machalo kama duto?”

⁴ Tobit nodwoke ni, “Owinjore chutho mondo oyud bath mwandu mosekelogi konchiel!”

⁵ Omiyo Tobias noluongo jawuodhe, mowachone niya, “Kaw nus mwandu duto mane wabirogo kodi, kaka pokni kuom gik moko duto misetimona, kendo idhi maber gi kue.”

⁶ Eka Rafael noluongo Tobit gi Tobias tenge, mowachonigi niya, “Miuru Nyasaye duong’, kendo pakeuru e nyim ji duto kuom ng’wono duto mosetimonu. Pakuru nyinge kendo dendeuru. Huluru ni ji duto timbene mabeyo kaka owinjore, kendo kik uol gi goyone erokamano.

⁷ Ka ruodh pinyni moro nigi wach moro mopondo, to wachno ok onego hul; timbe Nyasaye to nyaka hul ratiro kendo landi e lela. Nyaka ugone erokamano kaka owinjore, kendo nyaka utim mana gik mabeyo, eka wach moro marach ok nomaku.

⁸ Lemo mowir gi tueyo chiemo kod konyo joma odhier gi tim makare, ber moloyo bedo gi mwandu kod timbe maricho. Konyo joma odhier bende ber moloyo choko dhahabu mogundho.

⁹ Adier, konyo joma odhier reso ji duto e tho, kendo pwodho kit richo duto. Jogo makonyo joma odhier dak aming’a,

¹⁰ to joma timo richo kendo timo timbe mamono, hinyore mana kendgi giwegi.

¹¹ “Koro adwaro nyisou adiera duto ka ok apandou kata wach achiel. Asenyisou ni ok onego hul wach mopondo mar ruodh piny; gik ma Nyasaye timo to nyaka hul e yo mowinjore.

¹² Omiyo, in Tobit, nyaka ing’e ni ka ne un gi Sara ulemo, an ema ne atero kwayou e nyim kom duong’ mar Ruoth Nyasaye. Kamano bende e kaka ne atimo kane iyiko joma otho.

¹³ Bende e kinde mane iweyoe chiemo mi ia malo piyopiyo mondo idhi iyik ng’at motho cha, Nyasaye noora mondo abi atem ane yie ma in-go.

¹⁴ To bende noora mondo abi athiedhi, kaachiel gi Sara chi wuodi.

¹⁵ An e Rafael, ma achiel kuom malaika abiriyo mochung’ koikore tiyo ni Ruoth Nyasaye, kendo madhi e nyim kom duong’ mare pile.”

¹⁶ Kane Tobit gi Tobias wechego, luoro nomakogi, mi gipodho piny auma kam gitetni.

¹⁷ To malaikano nowachonigi niya, “Kik ubed maluor, to beduru mana gi chir, kendo umi Nyasaye duong’ nyaka chieng’.

¹⁸ To an kik ugona erokamano kuom bet ma asebetgo kodu, nikech en mana dwaro mar Nyasaye. En ema nyaka umiye duong’ e ngimau duto, kendon en ema nyaka upake.

¹⁹ Ne ugalo ni uneno ka achiemo, to mano ne mana fweny ema ne uneno.

²⁰ Koro un miuru Ruoth Nyasaye duong’ e pinyka, kendo ugone erokamano. An to achiegni dok e polo ir Jal mane oora. To nyaka undik gik moko duto mosetimorenu.” Gikanyono nodum molal e kor polo,

²¹ kendo kane gichako gichung’, to ne ok ginene. Eka ne gipako Nyasaye gi wer, ka gigoyone erokamano kuom timonigi honni madongo e kinde mane malaika ofwenyorenigi.