Tobit 11 - MUMA MALER 2015

Wang’ Tobit ochango

¹ Kane gichiegni chopo Kaserin, ma en dala momanyre gi Nineve,

² Rafael nowacho ni Tobias niya, “Ing’eyo chandruok mane waweyogo wuonu.

³ Onego wawe chiegi chien kabiro gi ji mamoko, to wan watel nyime wadhi walos ot.”

⁴ To bende nonyiso Tobias mondo okaw keth rech odhigo. Omiyo ne gitelo gidhi nyime kanyakla. Guok bende ne luwo bang’gi.

⁵ Noyudo ka Ana obet piny ka rango yo mane wuode diluw kaduogo dala,

⁶ kendo gikanyono mane onenoe Tobias, nong’eye, omiyo nowacho ni Tobit ni, “Wuodi e cha biro kaachiel gi jawuodhe.”

⁷ Rafael nowacho ni Tobias kapok kapok gichopo ir wuon mare niya, “Anyisi adier ni wang’ wuoru biro yawore.

⁸ Dhiyo mondo iket keth rechno e wang’e, kendo kedhno biro miyo wang’e lunge ahinya, mi pien marachere mareprep wuogi e wang’e. Bang’ mano, wuoru biro neno.”

⁹ Min Tobias noringo mokwako wuode, kowacho niya, “Koro kata ka atho, to onge wach, nikech aseneni kendo!” Eka noywak.

¹⁰ Tobit noa malo mowuotho ka kwang’ kong’ado laru, mi owuok e dhorangach. Tobias nobiro ire,

¹¹ koting’o keth rech e lwete. Nokudho wang’ wuon mare kokueyo chunye ni, “Kik iluor wuora.” Eka noketo yath e wang’e mi oweyo kuno kuom kinde matin.

¹² Bang’e nopoko pien mareprep e bath wenge wuon mare gi lwetene ariyo.

¹³ Wuon mare nokwake,

¹⁴ kaywak kendo kok niya, “Aneni wuoda! In ema isemiyo wang’a ler!” Eka nomedo wacho ni, “Nyasaye omi duong’, kendo nyinge maduong’ mondo opaki! Malaikane maler duto omi duong’! Nyinge maduong’ mondo opaki nyaka chieng’,

¹⁵ nikech nochwada, to koro osetimona ng’wono, kendo koro aneno Tobias wuoda.” Tobias nodonjo e ot, kendo nopako Nyasaye matek komor ahinya. Eka nohulo ni wuon mare gik moko duto mane osetimrene. Nonyise kaka ne giwuotho maber, kendo kaka osekelo fedha. Bende nonyise kaka nokendo Sara nyar Raguel, kendo kaka noweye chien machiegni mondo oluw bang’e, ma koro ne oparo ni osechopo e dhoranga Nineve.

¹⁶ Kane Tobit owinjo kamano, nowuok kodendo Nyasaye gi mor, mi odhi e dhoranga Nineve mondo orom ni chi wuode. To kane jo-Nineve onene kowuotho kaonge ng’ama taye, kendo onyono piny motegno mana kaka ne onyono chon, ne giwuoro ahinya!

¹⁷ Tobit nonyisogi kaka Nyasaye notimone ng’wono moyawo wang’e. Eka noromo gi Sara chi Tobias wuode, mi nokwayo Nyasaye mondo oguedhe, kowacho niya, “Erokamano kuom bironi, nyara! Nyasachi mosekeli kuomwa ka, mondo omi duong’. Nyasaye mondo oguedh wuoru gi Tobias wuoda, kod in bende, nyara! Koro donji e odi gi mor, kendo mondo Nyasaye oguedhi. Donji, nyara.”

¹⁸ Chieng’no Tobit notimo nyasi ni jo-Yahudi duto modak Nineve,

¹⁹ kendo omine Tobias ma bathe ma Ahikar gi Nadab ne jobiro mondo jobed mamor kaachiel gi Tobit.