फिलिप्पि 4 - Dhimal NT1 ओदोङ भाअ्सिङ काङको खान्धुराइ ओनेगेलाइ, का नेलाइहेङ हेन्जा मायारु पाङका कालाउ नेलाइहेङ भेतिलि चाहिखा। नेलाइ काङको आनन्द कालाउ हाउसा दोङ, काङको आनाउगेलाइ, काङको दोअ्का आन्सार लागातार प्रभुता भरोसा ताअ्काताङ वाको आग्या केम्सु। पावलको उपदेसगेलाइ 2 का इयोदिया कालाउ सुन्तुखे बेबाल ओनेगेलाइहेङ बुङ प्रभुता मिलिसु दोअ्तेङ बिन्ति पाखा। 3 काङको खाङधुरि योग्य दोफाङको सानाइति, का नासेहेङ बिन्ति पाखा, कि इदोइ न्हेमि बेबाललाइहेङ मिलि पालि साघाइसु, हाइपालिपानु इम्बालाइ का दोफाङ सुसमाचार पालि क्लेमेस दोफा कालाउ काङको आरु दोफाङको सानाइतिगेकाइ दोफा परिस्रोम पाका हि, जाइको मिङ जिबनको कितापता हि। जेलाउ बुङ आनान्दित हिसु 4 दिनाङ प्रभुता आनान्द पासु, का आरोङ बुङ द्वाङका प्रभुता आनान्द पासु। 5 नेलाइको सभ्य स्वभाव गोताङ द्याङगेलाइहेङ थाहा ज्याको, प्रभु धेमाङ लोदोङखे। 6 हिदोइ बुङ काथाको फिकिरि मापासु, भरु गोताङ परिस्थितिता प्रार्थाना कालाउ निबेदनसो धन्यबाद दोफाङ नेलाइको बिन्ति परमेस्वरता प्रस्तुत पासु। 7 कालाउ परमेस्वरको सान्तिहोइ जेदोङ द्याङको सोचाइ खान्तेङ बाहार हि, नेलाइको मन कालाउ ह्रदयहेङ येसु ख्रिस्टता जोगाइतेङ ताअ्प्याङ। 8 आम्तिमता खान्धुराइ ओनेगेलाइ, जेदोङ काथा सत्ये हि, जेदोङ काथा आदारनिय हि, जेदोङ काथा ठिक हि, जेदोङ काथा सुद्द हि, जेदोङ काथा झालाफालापा हि, जेदोङ काथा क्रिपामय हि, जेसापा हाइ दोङ स्रेस्थता, कालाउ बाखिन योग्य हाइ दोङ हि पानु इदोइ दोङ काथागेलाइता मन लागाइसु। 9 नेलाइ जेदोङ काथागेलाइ कासो कालाउ काङको व्यवभारसो धिरसुन्हा कालाउ ग्रहन पासुन्हा, इङकोहेङ व्यवभारता चुमासु कालाउ सान्तिको परमेस्वर नेलाइ दोफा ह्यावा। भेतिको भाअ्सिङ धन्यबाद 10 प्रभुता का मेनाङ सुकापा हिघा, कि हेन्जा दिना न्हुसो काङको भाअ्सिङ ताका पिगिल्तेङ नेलाइ आरोङ काङको वास्ता पासुन्हा। नेलाइ जातिङकोङ काङको भाअ्सिङ चिन्ताता हिघासुखेना, कालाउ नेलाइ कासेहेङ साघाइलि मौका निङका मान्थु घासुखेना। 11 कासेहेङ गोइका हिदोइ बुङ आमेनेको खाचो हि दोअ्तेङ का गुनासो पाका माको, पाइपालिपानु जिसिकालाउ बुङ परिस्थितिता हिलाउ बुङ इङकोता सन्तोस हिलि का धिर्का हिघा। 12 का आतुइसाता बुङ बान्चिलि द्वाङका कालाउ हेन्जा हिलाउ बुङ हेसा जिबन जियाइलि गोइखे का गिखा। हेन्जा चाका-आम्का ह्याको माकुनु आतुइसा चाका-आम्का ह्याको, हेन्जा हिलाउ बुङ माकुनु आतुइसा हिलाउ बुङ, गोताङ परिस्थितिता सोन्तसता हिलि का धिरका हिघा। 13 ख्रिस्ट जाइ कासेहेङ सरबुङ पिखे वाकोसो दोङ का गोताङ काम पालि द्वाङका। 14 कालाउ बुङ नेलाइ कासेहेङ ताका पिगिल्तेङ दुखता साघाइकाता धन्यबाद हि। 15 नाअ् फिलिप्पिको द्याङगेलाइ ताइमिङ गिसुखेना, कि नेलाइहेङ सुसमाचार प्राचार पाका दिनासो जेलाउ का नेलाइको थामेसो म्यासिडोनिया प्रदेसता हानिघा, कासेहेङ नेलाइ बाहेक आरु हिदोइ बुङ मन्डलि ताका पितेङ मासाघाइहि। 16 हाइपालिपानु का थेसलोनिकि सहरता हिलाउ बुङ खाचोता परिका हिघाखा, कालाउ नेलाइ कासेहेङ न्हे पोल्ति ताका पिगिल्तेङ साघाइसुन्हा। 17 का नेलाइसो भेति भोका माको, कालाउ चाहिखा कि नेलाइको पाका कामको इनाम निङलि दोसु। 18 का निङलि गोइका खान्तेङ हेन्जाङ निङका हिघा। इपाफ्रोडाइट्सो नेलाइहेङ पिगिल्का काङको भाअ्सिङ नेलाइको उपाहार परमेस्वरहेङ चढाइका ताअ्का बासाना लोका भेति कालाउ भोग भाइका हि। जाइ परमेस्वरहेङ हेन्जा मान्दा ताअ्खे कालाउ ग्रहन योग्य हि। 19 काङको परमेस्वर ताइको महिमाता वाको सम्पति आन्सार नेलाइको गोताङ खाचो येसु ख्रिस्टता पुरा पापियाङ। 20 केलाइको आबा परमेस्वरको महिमा जेलाउलाउ बुङ ह्याको। आमेन। आम्तिम आभिबादन 21 येसु ख्रिस्टता हिका झाराङ परमेस्वरको जनगेलाइहेङ काङको सेउपाखा दोअ्पिसु। इता का दोफा हिका खान्धुराइ ओनेगेलाइ बुङ नेलाइहेङ सेउपाखा पिगिल्का हि। 22 गोताङ परमेस्वरको जनगेलाइहेङ कालाउ बिसेस पातेङ रोमि साम्रातको महलता हिका खान्धुराइगेलाइ नेलाइहेङ सेउपाखा पिगिल्का हि। 23 केलाइको प्रभु येसु ख्रिस्टको आनुग्रह नेलाइ झाराङ दोफा हितेङ ह्याको। आमेन। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation