फिलिप्पि 3 - Dhimal NT

जिउता भरोसा मातालि

¹ आम्तिमता खान्धुराइ ओनेगेलाइ, प्रभुता आनान्द जेङसु। नेलाइहेङ ओदोङ काथागेलाइ दोहोराइतेङ कासेहेङ झर्को मालागिखे, हाइपालिपानु ओदोङ काथाहोइ नेलाइहेङ धाताइका सिक्स्यकसो सामाराइतेङ ताअ्तावा।

² उङको द्‍याङगेलाइसो चङख हिसु, जाइ खियागेलाइ भाइका ब्यभार पाखे। कालाउ जाइ मारेम्का कामगेलाइ पाखे। कालाउ उङको द्‍याङगेलाइसो चङख हिसु जाइ दोअ्खे कि मुक्ति निङलिको भाअ्सिङ खाताना जेङका हिलि गोइखे।

³ हाइपालिपानु केलाइ परमेस्वरको आत्मासो आराधाना पानाखे, कालाउ येसु ख्रिस्टता गर्ब पानाखे कालाउ मानिमुइ कोसिसता भर मापरिनाखे, हाइपालिपानु केलाइ जातिङकोङ परमेस्वरको द्‍याङगेलाइ दोङ हिनाहि।

⁴ कालाउ बुङ का ताइमिङ दोफा ताइको कोसिसगेलाइता भरोसा पाका रेम्का कारान हि, जेसापा हासु बुङ सोचिखे कि वा दोफा इसिका मानिमुइ कोसिसगेलाइ भर परिका कारन हि पानु, काङकोते झन हेन्जा कारान हि।

⁵ जेलाउ का येए दिनाता हिघाखा परमेस्वरको आग्या पिका आन्सार काङको खाताना जेङहि। जोलोम सोङ का एमि इस्राएललि दोङ, कालाउ बेन्यामिन वङसको दोङ हिघा। काङको पुर्खागेलाइ झाराङ हिब्रु दोङ हि ओदोङ भाअ्सिङ का बुङ एमि हिब्रु हिघा। कालाउ व्यवस्था केम्नाङ का बुङ फारिसि दोङ हिघाखा।

⁶ जोसको बिसोइता दोअ्नु मन्डलिहेङ सान्ताइका, धार्मिकताको बिसोइता दोअ्नु यहुदि व्यवस्था केम्का का एमि धर्मि द्‍याङ दोङ हिघा हाइपालिपानु का इङको गोताङ व्यवस्था केम्का हिघाखा।

⁷ कालाउ जेथे काथा काङको भाअ्सिङ फाइदा हिघाहि, इङको गोताङ काथा का एला ख्रिस्ट दोफा काङको सम्बनधको भाअ्सिङ हान्ति दोङ थानिघा।

⁸ इङको झोको खिनिङ माको, का येसु ख्रिस्ट प्रभुहेङ नाल्लि भोखा, जेदोङ गोताङ काथा खान्तेङ माहान हि, का गोताङ काथागेलाइहेङ बेकार थानिखा। कालाउ ख्रिस्टको भाअ्सिङ गोताङ काथागेलाइ लाअ्का हिघा, कालाउ इङको गोताङहेङ फोहोरगेलाइ भाइपा सम्झिखा, कालाउकि का पुरा रुपहोइ ख्रिस्टको जेङलि द्वाको।

⁹ कालाउकि का ख्रिस्ट दोफा ए जेङलि द्वाको, कालाउ काङको धार्मिकता व्यवस्था केम्लि पाका आधारता माको, कालाउ काङको धार्मिकता परमेस्वरसो पिका धार्मिकताको आदार दोङ हि, जाइ का ख्रिस्टता खाङधुरि पानाङ खिनिङ लोखे।

¹⁰ का ख्रिस्टहेङ खिनिङ माको कालाउ परमेस्वर जाइ वासेहेङ सिकासो सिन्चाल पाहि वाको सरबुङहेङ गिलि भोखा। का येसुको कस्टको भागेदार जेङलि भोखा कालाउ वाको सिकाता वाको भाइपाङ भाइलि खाङखा।

¹¹ कालाउकि का बुङ सिकालाइसो आरोङ सिन्चाल्लि द्वाको।

लक्स्य भारि आगा हानिलि

¹² का इदोइ गोताङ लाम्फासोङ निङलि दोहोइका माकुनु लाम्फासो सिद्द जेङलि दोहोइका दोअ्तेङ ते माको, कालाउ इङको काथागेलाइहेङ निङलिको भाअ्सिङ का कोसिस दोफा आगा बाढेतेङ हिघा जेदोङ काथाको भाअ्सिङ येसु ख्रिस्ट कासेहेङ साल्का हि।

¹³ खान्धुराइ ओनेगेलाइ, का इङको गोताङ निङलि दोहोइका दोअ्तेङ का माथानिखा, कालाउ का एनोङ काम पाखा, कालाउकि लाम्फाको काथागेलाइ जेदोङ जेङका हिघाहि इङको निल्तेङ भबिस्यता हाइ जेनाङ इङको को भाअ्सिङ लागातार काडा परिस्रोम पादोङखा,

¹⁴ का स्वर्गको इनाम निङलिको भाअ्सिङ ल्क्स्य भारि हानिदोङखा इङको पुरुस्कार चाहि परमेस्वर कासेहेङ स्वर्गता काइका हि, हाइपालिपानु येसु ख्रिस्ट काङको भाअ्सिङ सिपिहि।

¹⁵ केलाइ जाइ आत्माता परिपक्का जेङका हिनाहि, कालाउ नेलाइ झाराङ बुङ एनोङ दोङ मनको जेङतेङ हिसु, कालाउ नेलाइ हिदोइ बुङ आरु बिचारता हिसुना पानु परमेस्वर नेलाइहेङ इङको बुङ झालाफालापा पाप्याङ।

¹⁶ ओदोङ भाअ्सिङ परमेस्वर केलाइहेङ तिङपाका सत्ये आन्सार जिबन जियाइलि गोइखे।

¹⁷ खान्धुराइ ओनेगेलाइ, नेलाइ का बान्चेका कोनिङ नेलाइ बुङ बान्चिसु। केलाइ इम्बालाइको भाअ्सिङ रेम्का उधारन जेङका हिनाहि, ओदोङ भाअ्सिङ इदोङ दोङ उधारन आन्सार बान्चिकागेलाइहेङ दोङ नेलाइ पिताइसु।

¹⁸ का हेन्जा पोल्ति दोअ्का हिघा, एला बुङ द्‍याङगेलाइको बारेता आरोङ बुङ का नेलाइहेङ खार्कताङ दोअ्खा, कि हेन्जा द्‍याङगेलाइको व्यवभारहोइ तिङपाखे कि इम्बालाइ येसु ख्रिस्ट क्रुस्टता सिकाता बिरोधि हि।

¹⁹ बिनास इम्बालाइको आन्त्य हि, इम्बालाइ ताइको जिउको इच्छा पुरा पालि खिनिङ जियाइखे, इम्बालाइ ताइको लेदेरका को कामता हाउसा पाखे, कालाउ इम्बालाइ लागातार सुमिङको काथागेलाइको बारेता सोचिखे।

²⁰ कालाउ केलाइ स्वर्गको बासिन्दा दोङ, इन्तासो आरोङ लोका केलाइको मुक्ति दाता माकुनु प्रभु येसु ख्रिस्टहेङ ह्रुम्तेङ हिनाखे।

²¹ वा, जेदोङ सरबुङ पाहासो गोताङ काथाहेङ वाको आधिनता चुमालि दोखे, ओदोङ सरबुङहोइ वा केलाइको कमजोर जिउहेङ ताइकोङ महिमाको जिउ भाइपाङ भाङगाइपिखे।