फिलिप्पि 2 - Dhimal NT

ख्रिस्टको मोनोइ

¹ हाइपालिपानु नेलाइ ख्रिस्टको हिनाङ नेलाइ हाउसाइका हिसुना, हाइपालिपानु नेलाइ ख्रिस्टको प्रेमसो सान्तावाना निङका हिसुना, हाइपालिपानु नेलाइको पबित्तरो आत्मा दोफा सङगति हि, हाइपालिपानु ख्रिस्ट नेलाइ दोफा मोनोइ कालाउ दायाका हि,

² नेलाइ एनोङ दोङ मनको जेङतेङ, कालाउ एनोङ दोङ प्रेम तातेङ, एनोङ दोङ बिचार जेङतेङ कालाउ एनोङ दोङ उदेस्यसो काङको आनान्द पुरा पासु।

³ स्वार्थ कालाउ घमन्डता हाइ दोङ मापासु, कालाउ मोनोइता एमिसो-भेनेङहेङ ताइमिहेङ खान्तेङ हेन्जा महत्व पुर्न थानेसु।

⁴ नेलाइ झाराङ ताइको भाअ्सिङ खिनिङ भलाइ माभोसु, भरु भेनेङगेलाइको भाअ्सिङ बुङ भलाइ सोचेसु।

ख्रिस्टको मोनोइ कालाउ माहानता

⁵ नेलाइता इसिका मन ह्याको जेदोङ ख्रिस्ट येसुता बुङ हिघाहि।

⁶ वा परमेस्वर जेङतेङ वा दोङ, परमेस्वरको बानाबोरको जेङका काथाहेङ एनोङ रिम्तेङ ताअ्का आमेने भाइपा माथानेहि।

⁷ कालाउ वा दोङ गोताङ आमेने लाअ्हि, कालाउ बान्धाइति स्वभाव भाङघाइहि, कालाउ वा द्‍याङ जेङतेङ जोलोमहि।

⁸ कालाउ द्‍याङको रुपता जेङतेङ ताइमिहेङ मोनोइ बानाइहि, कालाउ परमेस्वरको आग्याकारिता, वा आपाराधि कोनिङ क्रुसता सिलि बुङ तियार जेङहि।

⁹ ओदोङ भाअ्सिङ परमेस्वर वासेहेङ हेन्जा बारका पदता ताअ्हि, कालाउ वासेहेङ इङको मिङ पिहि, जेदोङ गोताङ मिङ खान्तेङ बारका हि।

¹⁰ कि स्वर्ग, प्रिथिबि ह्रुता कालाउ प्रिथिबि लेता हिका झाराङ येसुको मिङता तिरु थोलि गोयाङ।

¹¹ कालाउ झाराङ आबा परमेस्वरको महिमाको भाअ्सिङ येसु ख्रिस्टहेङ प्रभु हि दोअ्तेङ सुइकार पावा।

ज्योति कोनिङ चिल्कालि

¹² काङको आनाउ खान्धुराइ ओनेगेलाइ, का नेलाइ दोफा हिलाउ जेलाउ बुङ आग्या केम्का हिघा सुखेना। एला का नेलाइसो दुरे हिघा, ओदोङ भाअ्सिङ का नेलाइ दोफा माहिलाउ बुङ झन हेन्जा आग्याकारि हिलि गोइस्वाना। नेलाइ झाराङ थितेङ कालाउ फिरतेङ इङको काम पालि गोइखे, जेदोङ उङको द्‍याङगेलाइको भाअ्सिङ उचित हि, जाइहेङ परमेस्वर मुक्ति पिका हि।

¹³ हाइपालिपानु परमेस्वर नेलाइकोता काम पादोङखे, जेदोङ कामहोइ वासेहेङ लेङचापाखे इङको काम पाका इच्छा कालाउ सरबुङ नेलाइहेङ वा दोङ पिखे।

¹⁴ गोताङ काम गनगन माकुनु झर्क मामानिसिङ पासु।

¹⁵ कालाउकि दुस्ट कालाउ भ्रस्ट द्‍याङगेलाइ भरिका सुमिङता परमेस्वरको सुद्द जामाललाइ भाइका सुद्द कालाउ मादुसिका जिबन जियाइसु। इदोइ सुमिङता मारेम्का काम पाका द्‍याङगेलाइको माझाता नेलाइ आकासको फुरुगेलाइ भाइपाङ चिल्कालि गोइखे।

¹⁶ कालाउ नेलाइ इम्बालाइहेङ आनान्त जिबन पिका बचन हिङपासु, कालाउकि जेलाउ ख्रिस्ट आरोङ ल्वाङ का गर्ब पालि द्वाको, कि का बेर्थता परिस्रोम पाका मान्थुघा कालाउ काङको मेहेनत बेर्थता हानिका मान्थु।

¹⁷ जेलाउ का नेलाइहेङ सुसमाचार प्राचार पाघा, नेलाइ प्रभु येसुता खाङधुरि पासुन्हा कालाउ ताइको जिबन वाको बलिदानको रुपता वाको सेवाता पिसुन्हा, ओदोङ भाअ्सिङ इङको कासेहेङ सुसमाचार प्राचार पाकानाङ इम्बालाइ कासेहेङ सेअ्न्हालाउ बुङ का नेलाइ झाराङ दोफा खुसि कालाउ आनान्दित जेनाङका।

¹⁸ एसा पासोङ नेलाइ बुङ का दोफा खुसि कालाउ आनान्दित जेङलि गोइस्वाना।

तिमोथि कालाउ इपाफ्रोडिटस

¹⁹ तिमोथिहेङ नेलाइकोता धेमाङ दिङगिल्लाङका दोअ्तेङ का प्रभु येसुता आस पाखा। कालाउकि नेलाइको बारेता हिङतेङ का हाउसाइ याङका।

²⁰ तिमोथि भाइका नेलाइको जातिङको मनहोइ वास्ता पाका आरु द्‍याङ का दोफा हासु बुङ मान्थु।

²¹ हाइपालिपानु झाराङ ताइकोङ स्वार्थि भोखे कालाउ येसु ख्रिस्टको बारेता महत्य पुर्न हाइ हि इङको वास्ता पाका हासु बुङ मान्थु।

²² कालाउ नेलाइहेङ थाहा हि, कि हेसा वा ताइमिहेङ खाङधुरि योग्य तिङपाहि, जेसाङ चान आबा दोफा सेवा पाखे, एन्साङ दोङ तिमोथि का दोफा सुसमाचारको कामता सेवा पाहि।

²³ ओदोङ भाअ्सिङ का दोफा हाइ जेनाङ इङको काथागेलाइ थाहा निङका बितिकै का तिमोथिहेङ नेलाइकोता दिङगिल्लि आस पाखा।

²⁴ कालाउ का बुङ धेमाङ ल्वाङका दोअ्तेङ प्रभुता भोरोसा ताअ्का हिघा।

²⁵ का इपाफ्रोडाइट्सहेङ नेलाइकोता दिङगिल्लि आवस्यक थानिघा। वा काङको खान्धुराइ ओने, कालाउ का दोफा काम पाका कालाउ सुसमाचारको रक्स्या पाका सिपाइ कालाउ कासेहेङ खाचो परिलाउ साघाइका कालाउ नेलाइको बानाल काङकोता चुमाका द्‍याङ हि।

²⁶ हाइपालिपानु वा नेलाइ झाराङहेङ भेतिलि बार्का इच्छा पातेङ हि। वा माअ्साधिका बानाल नेलाइ थाहा निङनाङ वा फिक्रि पातेङ हि।

²⁷ वा जातिङकोङ मासाधेका हिघाहि, कालाउ सिलिना हिलि जेङका हिघाहि, कालाउ परमेस्वर वासेहेङ दाया पातेङ एल्पाहि। वासेहेङ खिनिङ माको भरु कासेहेङ बुङ दाया हि, कालाउकि का या खान्तेङ हेन्जा दुख ल्होपालि मागोयाको हाइपालिपानु का लाम्फासोङ दुखता परिका हिघा।

²⁸ ओदोङ भाअ्सिङ का वासेहेङ दिङगिल्लि उत्सुक हिघा। कालाउकि वासेहेङ आरोङ तिङतेङ नेलाइ लेङचास्वाना कालाउ काङको चिन्ता बुङ कम जेनाङ।

²⁹ ओदोङ भाअ्सिङ हेन्जा आनान्द दोफा वासेहेङ प्रभुता स्‍वागत पासु, कालाउ इपाफ्रोडाइट्सहेङ कालाउ नाअ् भाइका आरु द्‍याङहेङ बुङ आदार पालि गोइखे।

³⁰ हाइपालिपानु वा ख्रिस्टको कामको भाअ्सिङ झान्डाइ सिहि। कालाउ नेलाइ काङको भाअ्सिङ पुरा पालि माअ्दोका सेवा वा पुरा पाहि।