किताब नाल्पाका
साल्तेङ दिङगिल्का पावल इदोइ चिथि फिलिप्पि पुरको मन्डलिता हिका खान्धुरिगेलाइहेङ पिगिल्का एइ। फिलिप्पि माकेदोनिया दोअ्का रोमि सारभिको ए पुर हिघाहि। एला इङको युरोप सारभिको बाराका पुरता परेखे। ए पहरता पावल फिलिप्पिता हानेतेङ रेम्काबानाल पारचार पाहि। कालाउ इङकोन्हुअ्सो इन्ता मन्डलि जाअ् पाहि (साल्तेङ दिङगिल्का १६:११-४०)।
इदोइ चिथि लेखेलाउ पावल थुनाता थुनिन्हाका हिघाखे। इङको पहरता फिलिप्पिको मन्डलिगेलाइता धाताइका बिद्या पारचार जेङतेङ हिका खातिरहोइ वाको मन हारेस चाका हिघाहि। कालाउ इदोइ चिथिता पावलको पाका खान्धुरहोइ फिलिप्पिको खान्धुरिगेलाइता लेङ रो हाउसा चुमापिहि। इदोइ चिथि लेखेलिङ गोइका खातिर हाइ हिघाहि पानु फिलिप्पिको खान्धुरिगेलाइहेङ च्याबास पिलि हिघाहि। हाइदोनु एम्बालाइ पावलहेङ हारजाता परेलाउ साघाइका हिघाखे।
पावल फिलिप्पिको खान्धुरिगेलाइता तु: पिर निङचालाउ एम्बालाइहेङ हाउसा पिलि रो बल पिलि दोअ्तेङ इदोइ चिथि लेखेका एइ। का खिनिङ चाङका, का खिनिङ आमाङका दोअ्तेङ तुजुक पातेङ हिका खान्तेङ इसुको नोइका रो एल्का आनिबानिहेङ मानेलि गोयाङ दोअ्तेङ बिनइ पाहि। कालाउ ख्रिस्टदोफा ए जेङका ज्यानहेङ परमेस्वरको सहसाम्पा रो बर एइ दोअ्तेङ दोअ्हि।
इङकोन्हुअ्सो इसु ख्रिस्टता खान्धुर पातेङ वादोफाङ ए जेङकालाइ परमेस्वरसो निङका लेङचाका रो बेराजाको बारेता लेखेतेङ पिगिल्हि। इदोइ चिथिहोइ खान्धुरि ज्यानता रो खान्धुरता निङका निङका लेङचाका, खान्धुरलाएकता, एजेङका रो खान्धुरता थिर जेङतेङ लागेतेङ हिलि गोइका काथाको बारेता दोअ्का हि। फिलिप्पिको मन्डलिता हिका खान्धुरिगेलाइहेङ पावल हेथे हेन्जा माया पाहि दोअ्का काथा जातिङकोङ इदोइ चिथिता तिङखे।
पोतोका बिसइ नामेसि
नाल्पाका १:१-११
पावलको ताइको हालत १:१२-२६
ख्रिस्टता हिका ज्यान १:२७-२:१८
तिमोथि रो इपाफ्रोडिटसको भाअ्सिङ उपाइ २:१९-३०
बाइरिगेलाइ रो बिपतसो जोगिका चेतानि ३:१-४:९
पावल रो फिलिप्पि सानाइतिगेलाइ ४:१०-२०
दो:का ४:२१-२३
